Read Mousgoum Yosva 14 Bible Online

Yosva 14 - Mousgoum bible

Yosva 14

¹Afti n’aliɗi Izrayel e niviŋ aŋ bulum aha midini afti na Kanaan ɗa, afti na pai zi ɓaka Eliyazar gaini Yosva n’ahini Nun gaiɗi tamaini dalam na war piniziba lai e ɓûrwiŋ midiɗi aliɗi Izrayel ɗa.

²Ɓraw a za pini wala zi vili maini n’EPIƊ-ƊAI a gada Musus midini aŋ zaŋ sini piniziba na ɵeeŋe gaini gal na e nivi kai hai ɗa nɵa.

³Buri Musus a sa bulum wiiɗi pinzibani na sulu gaini gal n’anene par duɓani Yurdan, buri Levitekai ɗa, a siɗi bulum arbaɗi kai.

⁴Alini Yosef ɗa e pɵi aŋ ziba sulu: Manase gaini Efrayim; E siɗi hlai wiiɗi pini zibani Levi aha warɗi Kanaan kai, sai a fuŋ n’abakai buri e simni woni gaini baŋa na ɵemaɗi burini faraiɗi gaini wazagaiɗi na zamai zamai lai.

⁵Aliɗi Izrayel e zi maini n’EPIƊ-ƊAI a miɗiŋni wiini Musus nɵa, e ɓûrwi afti ɗa.

⁶Mefeŋ ktai ɗa, ɗai na war pini zibani Yuda e hilisi sini Yosva war Gilgal, Kaleb n’ahini Yefune na war pinzibani Kenaz, a miɗini: Tuku ku sɗa seŋ n’EPIƊ-ƊAI a miɗiŋni wiini Musus ɗif na wiini Alaw buriya gaiku a Kades-Barneya.

⁷Won hlai na mu za buza doogo doogo puɗu, Musus ɵeŋ na wiini EPIƊ-ƊAI a ɵinaŋa a Kades-Barneya buri mu tala afti ɗa, mu kinisi labar na jre.

⁸Tawalakai n’e hili gaya e kisi labar na a waya hiiniɗi ɗai asakal, amma ta ɗa mu tika futi pini Epiɗ-ɗai Alaw na wiya gaiɗi agula paŋ.

⁹War mefeŋ ni ɗa, Musus a ha wala mini a muɗa: Afti na azuku a baza midini paŋ aga a sa aŋ wiiku gaiɗi aliku lai haa kureɗ, buri ku paya pɗem piɗi futi na wiini Epiɗ-ɗai Alaw na wiya.

¹⁰Tiyana buza a za doogo doogo puɗu n’EPIƊ-ƊAI a sa gadai hanɗa wiini Musus, a sarti n’aliɗi Izrayel e piyi warni basga na kaɗataŋ ɗa, war hlai ni par EPIƊ-ƊAI a hinaŋa kara maini n’a za ha midini nɵa, tiyana buzaŋa aza doogo doogo mitwis pi ɵim.

¹¹Girna ɗa mu na gdaŋ maini warni mefeŋ na Musus a ɵinaŋa ɗa nɵa, gdaŋ pa maini n’avut ɗa nɵa, buri hatam burini wazagai zamai zamai paŋ lai.

¹²Tiyana ɗa, saŋa hlai zi huwuŋ hanɗa n’EPIƊ-ƊAI a muɗa midini war mefeŋ ni ɗa, buri war mefeŋ ni tuku ku ɵina ya ɓa woni ɗa alini Anak e ɗa gaini fuŋ n’abakai zi ɵaga lai. A zuva ɓa EPIƊ-ƊAI a za gaya, mu birgiɗi edi maini n’EPIƊ-ƊAI a muɗaŋ ɗa nɵa.

¹³Yosva a ɓaka Kaleb n’ahini Yefune, a sini fuŋ n’abai na Hebron ɗa aŋ bulum ta.

¹⁴Nɵa Hebron haa girna te hina aŋ wiini Kaleb n’ahini Yefune war pinzibani Kenaz, buri ɓa a paya pini Epiɗ-ɗai Alaw gaiɗi agulni paŋ.

¹⁵Yikiɗi Hebron n’avut ɗa ɓa: Kiryat-Arba. Arba ɗa a ɗif n’abai n’arbaɗi alini Anak. Asakal hanɗa, afti a sumna ɵeɗ, hatam aŋ kai.