Read Mousgoum Yosva 16 Bible Online

Yosva 16 - Mousgoum bible

Yosva 16

¹Galni afti na a sa sini pinzibani Yosef pini wala zi vili ɗa, a fakasi sini Yurdan par wuzaɗi Yeriko ɗaw, piɗi futi na dawai par na wiini yem zi liwi na Yeriko; A Yeriko par hagaɗi a vuga edi war basga na kaɗataŋ ɗaw haa midiɗi huwuŋ na Betel.

²A Betel par a vugasi a luz ɗaw midini haga na wiiɗi Arkititekai n’e zi fuŋ warɗi Astarot ɗa.

³A bunda piɗi futi na koskoi sek midini haga na wiiɗi Yefletitekai ɗaw, wiiɗi Bet-Horon n’azumai ɗaw haa Gezer, a daba a agoɗom war wulani yem ra n’abai na Mediteraniya.

⁴Hanɗa a hlai na pinzibani Yosef, a dara a muɗa: Manase gaini Efrayim e niviŋ aŋ bulum ɗa.

⁵Haga na wiiɗi pinzibani Efrayim piɗi humuni humuni ɗa a na maini nɵa. Hagaɗi aftiɗi piɗi futi na dawai par a fakasi a Atarot-Adar par haa Bet-Horon n’amai.

⁶Wuzaɗi sek war gal na koskoi gobi gaiɗi Mikmeta war gal n’azumai, piɗi futi na dawai sek haa a Taanat-Silo a sirɓa wuzani sek piɗi futi na dawai par a Yanowa ɗaw.

⁷A Yanowa par a halasi haa a Atarot gaiɗi Barata ɗaw a vuga siɗi Yeriko haa a daba agoɗom war Yurdan.

⁸A Tapuwa a vuga piɗi futi na koskoi sek sini yem zi ki na Kana ɗaw, a daba a agoɗom war yem ra n’abai na Mediteraniya. Hanɗa a bulum na wiini pinzibani Efrayim pini humunini humunini.

⁹Fuŋ n’abakai gaini fuŋ n’agogoi na wiiɗi pinzibani Efrayim zamai a na arbani bulum na wiiɗi pinzibani Manase.

¹⁰E birgiɗi ɗai na Kananiya n’e zi fuŋ a Gezer ɗa kai. Kananiyakai hanɗa e simni arbaɗi pinzibani Efrayim haa girna, amma e tikiɗi sda zi bege midiɗi.