Read Mousgoum Yosva 17 Bible Online

Yosva 17 - Mousgoum bible

Yosva 17

¹Galni afti ktai a sa siɗi pinzibani Manase pini wala zi vili, buri ni a ahini Yosef zi wi n’avut. Makir n’ahini Manase n’abai epini Galaad, a niviti Galaad gaiɗi Basan buri ni a gaŋgalaŋ zi hatam.

²Pini wala zi vili, e siɗi galni afti wiiɗi pinzibani Manase na zamai n’e hini, piɗi humuni humuni, wiiɗi alini Abiyezer, wiiɗi alini Helek, wiiɗi alini Asriyel, wiiɗi alini Sikem, wiiɗi alini Hefer, wiiɗi alini Semida lai. Hanɗa e ɗi alini Manase n’ahini Yosef na maɵagai ɗa.

³Selofad n’ahini Hefer, n’ahini Galaad, n’ahini Makir, n’ahini Manase, a wa ali na maɵagai kai, e ɗi ali na falakai kiiɗi, yikiɗi maini nɵa: Makla, Nowa, Hogla, Milka gaiɗi Tirsa.

⁴E hilisi wuzani pai zi ɓaka Eliyazar, Yosva n’ahini Nun gaiɗi n’abakai n’arbaɗi ɗai e miɗi: EPIƊ-ƊAI a miɗini wiini Musus buri a siyi bulum arbaɗi alini epiyi. Nɵa e siŋɗi pini miɗi na wiini EPIƊ-ƊAI, arbaɗi alini epiɗi maini na zamai na war pinzibaɗi nɵa.

⁵Gal na wiini afti na a sa siɗi pinzibani Manase paŋ doogo, Galaad gaiɗi Basan n’anene duɓani Yurdan par arbani kai,

⁶buri alini Manase na falakai e nivi bulum arbaɗi alini na maɵagai, amma afti na Galaad ɗa a sa siɗi alini Manase na zamai.

⁷Hagani afti na wiini Manase ɗa a fakasi sini Aser par haa a Mikmeta na te na ɗikat wuzaɗi Sikem piɗi futi na dawai par war gal n’amai sek siɗi ɗai na En-Tapuwa.

⁸Afti na Tapuwa a wiiɗi pinzibani Manase, fuŋ n’abai na Tapuwa gaini midini a na war hagani afti na wiiɗi pinzibani Manase, amma a wiiɗi pinzibani Efrayim.

⁹Hagani afti a hala haa a agoɗom wulani yem zi ki na kana haa a vugasi amai par midini yem zi ki hanɗa ɗaw. Fuŋ n’abakai na woni a na midini aftini Manase, amma e ŋi midini ɗa e ɗi pinzibani Efrayim. Hagani afti na wiini Manase ɗa azumai sek pini yem zi ki hanɗa par, a daba a agoɗom wulani yem ra n’abai na Mediteraniya.

¹⁰Galni afti n’amai sek a sa sini pinzibani Efrayim, gal n’azumai sek siɗi pinzibani Manase lai, yem ra n’abai Mediteraniya a hagani afti na wiiɗi sulu paŋ. Hagani aftiɗi n’azumai sek a Aser, piɗi futi na dawai sek ɗa a Isakar.

¹¹Hlai na wiini Manase midini afti na wiini Isakar gaini Aser a na maini nɵa: Bet-Seyan gaini hlai na te ŋa midini paŋ, Yibleyam gaini hlai na te ŋa midini paŋ, ɗai na Dor paŋ gaini hlai n’e ŋi midini paŋ, ɗai na En-Dor gaini hlai n’e ŋi midini paŋ, ɗai na Megido gaini hlai n’e ŋi midini paŋ, paŋ afti n’abakai hu.

¹²Pinzibani Manase e kiɗi e simni war fuŋ n’abakai hanɗa paŋ kai, ɗai na Kanaan e simni wiiɗi woni ca.

¹³Won hlai n’aliɗi Izrayel e bindi gdaŋai li, e tikiɗi sda zi bege midiɗi, amma e birgiɗi kai.

¹⁴Pinzibani Yosef e hili sini Yosva e miɗini: Tuku ku siyi aŋ bulum ɗa a galni afti ktai pal buri maɗa? Paŋ ktai, tiyi mi vok n’abai buri EPIƊ-ƊAI a ɓikiyi haa girna.

¹⁵Yosva a miɗiɗi: Na ɓa ki ɗi vok n’abai ɗa, niyi amlai arni jur ɗa, ki fiɗiŋ azumai, kapai ki nivi hlai zi simni midini afti na wiiɗi Perizitekai gaiɗi Refayitekai, na ɓa hlai zi huwuŋ na wiiɗi pinzibani Efrayim e kiɗiki kai ɗa.

¹⁶Pinzibani Yosef e miɗi: Hlai zi huwuŋ ɗa a kiɗiyi kai, pra ɗai na Kanaan gaiɗi na Bet-Seyan, gaiɗi nagai na war huduk na Urzreyel gaini hlai na piɗi paŋ ɗa, saret zi gaw zi kawai aŋ tiɗi paŋ.

¹⁷Nɵa, Yosva a miɗiɗi wiiɗi pinzibani Yosef: Efrayim gaini Manase: Pinizibaki ɗa abai, gdaŋni a na lai, aga ki nivi midini afti ɗa a gal ktai kai.

¹⁸Amma hlai zi huwuŋ ɗa aga a sa siki, buri luwuŋ woni viya n’aga ki fiɗiŋ azumai kapai a bunda aŋ wiiki, aga ki birgiɗi pinzibaɗi ɗai na Kanaan ɗa edi, koo gaini saret zi kawai n’aŋ tiɗi paŋ, gaini gdaŋɗi paŋ tekeɗeɗi.