Read Mousgoum Yosva 18 Bible Online

Yosva 18 - Mousgoum bible

Yosva 18

¹Pinzibaɗi Izrayel paŋ e tipi a Silo, e pi gumu na e nivi gaini EPIƊ-ƊAI ɗa wonia; afti paŋ a gada piɗi.

²Piniziba na a hina a nava bulum kai hai ɗa a na muguzak.

³Yosva a miɗiɗi wiiɗi aliɗi Izrayel: siki ɵa haa kaswata ɗa, kapai ki tiki afti n’Epiɗ-ɗai Alaw na wiiɗi tamaiki a siŋki ɗa?

⁴Arbaki par ɗa, ki viri ɗai hu hu war piniziba paŋ paŋ, aga mu ɵiniɗi e tili afti ɗa, e kitisi ɓrawni ɗa kapai e wiyisi sa.

⁵Aga e ɓûrwi afti ɗa azi muguzak, pinzibani Yuda e simni midini aftini war gal n’amai sek, pinzibani Yosef e simni midini aftiɗi war galni n’azumai sek lai.

⁶Tiki ɗa, ki kitisi yelni ɓraw na wiini afti na muguzak ɗa, ki kiŋŋasi, kapai ta mu zilba diri na wiini Epiɗ-ɗai Alaw na wimu midini viri na midini ɗa.

⁷Pinzibani Levi ɗa, galni afti aga a sa siɗi arbaki kai, buri gal na wiiɗi ɗa a sda zi paakai zi ɓaka wuzani EPIƊ-ƊAI. Pini zibani Gat, Ruben, gaini galni pinzibani Manase lai, nagai e nivi bulumɗi anene duɓani Yurdan piɗi futi na dawai par, a ɓirwiŋɗi ɗa a Musus ɵeŋ na wiini EPIƊ-ƊAI.

⁸Won hlai na ɗai hanɗa e fiki e hili aŋ kitisi yelni ɓrawni afti ɗa, Yosva a gidiɗi maini nɵa: Hili, piyi midini afti paŋ, ki kitisi ɓrawni ki wiyisi sa. Asakal par aga mu ɓirwiŋɗi pini viri wuzani EPIƊ-ƊAI a Silo.

⁹Ɗai hanɗa e hili, e tilisi afti paŋ, e kitisi ɓrawni na muguzak ɗa pini fuŋni n’abakai ta ta, e wiyisi sini Yosva war kaŋ a Silo.

¹⁰Yosva a za viri buriɗi a Silo wuzani EPIƊ-ƊAI, a ɓurwa afti midiɗi aliɗi Izrayel, a sa sini a siya ɗi paŋ gal na wiini afti na a sa sini.

¹¹Gal na wiini pinzibani Benyamin ɗa a vara piɗi humuni humuni, afti na a sa siɗi ɗa a na arbaɗi pini zibani Yuda gaiɗi pini zibani Yosef.

¹²War gal n’azumai sek, hagani afiɗi a fakasi sini Yurdan par, azumai par piɗi Yeriko ɗaw, amai midiɗi huwuŋ na t'aŋ piɗi futi na koskoi par ɗaw lai, haa a daba edi warni basga na kaɗataŋ na Bet-Aven ta.

¹³Woni par a Luz ɗaw, a Betel amai midiɗi Luz par ɗaw, a niya a Atarot-Adar gobi gaiɗi huwuŋi na t'aŋsi amai par midiɗi Bet-Horon n’azumai ɗa.

¹⁴Piɗi futi na koskoi sek ɗa, aftini a hala haa a gunasi amai par midiɗi huwuŋ na t'aŋ midiɗi Bet-Horon, a sirɓa amai sek a daba a Bet-Baal na yikiɗi zamai ɗa ɓa Kiriyat-Yeyarim fuŋ n’abai na wiiɗi pinzibani Yuda. Hanɗa war gal na koskoi sek.

¹⁵Hagani n’amai sek a fakasi amai merfeŋni afti Kiryat'Yerarim par, a hala piɗi futi na koskoi sek haa won hlai na yem na Neftowa a liwasi woni par.

¹⁶Woni par a vugasi amai merfeŋɗi huwuŋ na t'aŋ midini huduk na Ben-Hinnom ɗaw, azumai war huduk na wiiɗi Refayim war gal n’azumai sek ɗaw war huduk Hinnom gobi gaiɗi Yebus, war gal n’amai sek haa a En-Rogel ta.

¹⁷A pa azumai sek cir a En-Semes ɗaw, asakal par a Gelilot na t'aŋ midini boŋor na Adumim tar. Woni par a vuga midiɗi fukuni na wiini Bohan n’ahini Ruben ɗaw.

¹⁸A vugasi war gal n’amai par ɗaw kokoɗi huwuŋ na te na midiɗi Bet-Araba ɗikat ɗa, a araba ɗaw.

¹⁹A hala wuzani war gal n’azumai sek piɗi Bet-Hogla par ɗaw, a daba azumai alesni yem ra n’abai zi manta, woni gal n’amai sek won hlai na Yurdan a niya a agoɗom woni. Hanɗa a hagani aftiɗi war gal n’amai sek.

²⁰War gal na piɗi futi na dawai par, Yurdan ɗa a aftiɗi. Ni ɗa a bulum na wiini pini zibani Benyamin piɗi humuniɗi humuniɗi, gaini hagani aftiɗi war gal na puɗu paŋ.

²¹Fuŋ n’abakai na wiini pini zibani Benyamin pini humuniɗi humuniɗi ɗa a hanɗa: Yeriko, Bet-Hogla, Emek-Ketsit,

²²Bet-Araba, Semarayim, Betel,

²³Awim, Para, Ofra,

²⁴Kefar-Ammonai, Ofni gaini Geba, Paŋ fuŋ n’abakai doogo pi sulu gaini fuŋ n’agogoi na pini lai.

²⁵Gabawon, Rama, Berot,

²⁶Mispe, Kefira, Motsa,

²⁷Rekem, Yirpeyel, Tareyala,

²⁸Sela, Elef, Yebus na yikiɗi zamai ɗa ɓa: Yeruzalem, Gibeya gaini Kiriyat-Yeyarim. Paŋ fuŋ n’abakai doogo pi puɗu gaini fuŋ n’agogoi na pini paŋ. Hanɗa a bulum na a sa siɗi pini zibani Benyamin ɗa, piɗi humuni humuni.