Read Mousgoum Yosva 22 Bible Online

Yosva 22 - Mousgoum bible

Yosva 22

¹Asakal hanɗa Yosva a yikiɗi ɗai na war pinzibani Ruben, Gad gaini galni pinzibani Manase lai.

²A miɗiɗi: Tiki ki zi pini wala na Musus ɵeŋ na wiini EPIƊ-ƊAI midini ɗa, ki zi kal kal maini na mu gidiki ɗa nɵa lai.

³Gamai par haa tiyana, ki hiniɗi tawalakaiki edi kai, ki zi pini gadai na wiini Epiɗ-ɗai Alaw na wiiki.

⁴Tiyana ɗa, Epiɗ-ɗai Alaw na wiiki a siɗi si n’amla wiiɗi tawalakaiki ya maini n’a miɗiŋɗi nɵa, tiyana ɗa wiyi aha sini gumuki midini afti na Musus ɵeŋ na wiini EPIƊ-ƊAI a siŋki piɗi futi na dawai par na wiini Yurdan.

⁵Amma ki zi pini gadai na Musus ɵeŋ na wiini EPIƊ-ƊAI a gidiki midini ɗa. Aga ki diri Epiɗ-ɗai Alaw na wiiki, ki piyi pini dirini, ki tipi siki gaini, ki zi ɵeŋni lai gaiɗi agulki paŋ gaini suŋfaɗi agulki paŋ lai.

⁶Asakal par Yosva a ɓikiɗi, a miɗiɗi buri e wiyi aha.

⁷Musus a siɗi bulum wiiɗi galni pinzibani Manase war Basan piɗi futi na dawai par sek, Yosva a sini bulum wiini gal n’a hina arbaɗi tawalakaiɗi piɗi futi na koskoi na wiini Yurdan sek. Won hlai na Yosva a hiniɗi aŋ hili aha sek ɗa, a ɓikiɗi.

⁸A miɗiɗi: Aga ki wiyi aha sini fuŋki gaini der n’abai, gaini farani farai viya, gaini arzaŋ, or, kiya na muɗukwi, kawai gaini sapakai viya lai. Der na ki niviŋsi piɗi gawki par ɗa ki ɓûrwiŋ gaiɗi tawalakaiki.

⁹Pinzibani Ruben, pinzibani Gad gaini gal na wiini pini zibani Manase na piɗi futi na dawai par lai, e wiyi, e hiniɗi aliɗi Izrayel a Silo midini afti na Kanaan, e hili midini afti na Galaad, afti na e niviŋ aŋ bulum pini miɗi na EPIƊ-ƊAI a miɗiŋni wiini Musus ɗa.

¹⁰Won hlai na e gizi midini afti n’a na gobi wulani Yurdan na a pɵa war gal na Kanaan sek ɗa, pinzibani Ruben, pinzibani Gad gaini galni pinzibani Manase na piɗi futi na dawai lai, e rgi gûwiŋ n’abai zi ɓaka gobi gaini Yurdan, a Kanaan war gal n’anene sek.

¹¹Aliɗi Izrayel e ɵini ɓa pinzibani Ruben, Gad gaini galni pinzibani Manase lai na piɗi futi na dawai par, e rgi gûwiŋ zi ɓaka hanɗa gobi wulani Yurdan war gal na wiiɗi Izrayel midini afti na Kanaan.

¹²Won hlai n’aliɗi Izrayel e ɵini hanɗa, gaini hlaiɗi e dingi a Silo buri e hili aŋ hitimiɗi tawalakaiɗi na piɗi futi na dawai par ɗa.

¹³E ɵini Pinehas n’ahini pai zi ɓaka Eliyazar piɗi pinzibani Ruben, Gad gaini galni pinzibani Manase lai midini afti na Galaad,

¹⁴gaiɗi ɗai n’abakai zamai doogo lai, war pini ziba paŋ ɗif ktai ktai, Nagai paŋ e ɗi tamaini dalam war piɗi humuni humuni war Izrayel.

¹⁵E hili siɗi pinzibani Ruben, Gad gaini galni pinzibani Manase lai midini afti na Galaad, e miɗiɗi maini nɵa:

¹⁶Pini zibaɗi Izrayel na zamai ɗa paŋ ɗa, a na zilba sini ɓa: Meefeŋ na ki ziŋ sini Alaw na wiiɗi Izrayel ɵa na ɗa a siŋka ɗa a maɗa? Girna ɗa, ki firiyi ki ɵini pini EPIƊ-ƊAI kai ɗa buri maɗa? Gûwiŋ zi ɓaka na ki rgiŋ hanɗa, ki fiki na ɗa a fiki amai sini EPIƊ-ƊAI koo!

¹⁷A Pehor mu zumu meefeŋ ta, gir n’abai a kɵa midini vokɗi ɗai paŋ, midiɗi ɗai na wiini EPIƊ-ƊAI, gaini gir hanɗa paŋ haa girna mu zumu edi aŋ hilu kai hai, hanɗa a kiɗa kai ɗi?

¹⁸Na tiyana tiki ki hini EPIƊ-ƊAI edi ɗa. Na ɓa girna ki fiki li amai sini EPIƊ-ƊAI ɗa, dawai hiy na wiini aga a kɵa midiɗi Izrayel gaiɗi abaiɗi paŋ.

¹⁹Na ɓa afti na a sa siki a tala arki hihir ɗa, bindisi midini afti na wiini EPIƊ-ƊAI, hlai na gumuni aŋ woni ɗa, ki mili afti arbayi. Amma ki fiki amai sini EPIƊ-ƊAI, ki fiki amai siyi kaalai aŋ rgi gûwiŋ zamai sini na wiini Epiɗ-ɗai Alaw na wimu kir kai.

²⁰Won hlai na Akan n’ahini Zera a za meefeŋ won hlai na a mula wazagai n’aŋ ɗili ɗa, hiy ɗa a kɵa midiɗi aliɗi Izrayel gaini hlaiɗi, a ba kiini ktai kai.

²¹Pini zibani Ruben, Gad gaini galni pinzibani Manase e wiyiɗi seŋ wiiɗi n’abakai na piɗi humuni zamai zamai ɗa, e miɗiɗi:

²²EPIƊ-ƊAI ɗa a Alaw n’abai na a suwa alawai na zamai ɗa, Epiɗ-ɗai Alaw a sɗa hanɗa ya, Izrayel ɗa aga te sɗaŋ lai, na ɓa a fiki n’amai, a meefeŋ n’abai sini EPIƊ-ƊAI, a hiniyi karyi haa kai.

²³Na ɓa mi rgi gûwiŋ zi ɓaka hanɗa buri mi bindi edi sini EPIƊ-ƊAI par, zaw buri mi zi ɓaka zi yi gaini ɓaka zi seyem woni, zaw buri mi zi ɓaka zi ɵeɗ woni ɗa, a zuva ɓa EPIƊ-ƊAI a tika gir midiyi.

²⁴Mi rgiŋ burini hiini hanɗa kai, amma burini hunai gaini hiini n’a ɓa dawai sek ɗa, aliki e zilbiɗi aliyi ɓa bonu n’arbaki gaini Epiɗ-ɗai Alaw na wiiɗi Izrayel ɗa aŋ warni a ma ɗi ɗa?

²⁵EPIƊ-ƊAI a hina Yurdan aŋ haga arbayi tiyi gaiki, tiki pinzibani Ruben gaini Gad. Tiki ɗa buriki gaini EPIƊ-ƊAI kai, buriɗi aliki ɗa, aliyi aga e hûni EPIƊ-ƊAI kir kai.

²⁶Nɵa mi miɗi arbaɗi maryi ɓa, rgumu gûwiŋ zi ɓaka ktai ɓak, a na buri mi zi ɓaka zi yi gaini ɓaka zamai zamai warni kai.

²⁷Amma maini wala zi zaida ktai arbayi gaiki tiki, arbaɗi aliyi n’asakal sek gaiɗi aliki lai, aŋ siŋka ɓa tiyi lai mi zi ɓaka zi yi wiini EPIƊ-ƊAI, mi zi ɓaka zi bonu gaini ɓaka zamai zamai lai. Kapai wuzamu sek ɗa aliki aga e miɗiɗi wiiɗi aliyi kai ɓa buriki gaini EPIƊ-ƊAI kai nɵa kai.

²⁸Tiyi mi kitiŋ ɗa ɓa: Na ɓa avut sek, e miɗi miɗi na maini hanɗa nɵa ɗa, wiyi tiyi zaw, wiiɗi aliyi ɗi ɗa, aga mi wiyiɗi seŋ ɓa, tili gûwiŋ zi ɓaka na tamaiyi e rgiŋ burini EPIƊ-ƊAI ɗa, a na buri e zi ɓaka zi yi, gaini ɓaka zamai zamai woni kai, amma aŋ zaida arbayi gaiki tiki.

²⁹Hiini na ɓa mi fiki ɗa a fiki amai sini EPIƊ-ƊAI, zaw mi hiniŋ ɗa a hini edi ɗa aŋ waryi kai. Tiyi mi rgi gûwiŋ zi ɓaka ɓa kapai mi zi ɓaka zi yi midini, kapai mi zi ɓaka z'alini seyem gaini ɓaka zamai zamai lai midini nɵa kai, mi zi ɓaka warni hlai zamai kai, sai midini gûwiŋ zi ɓaka na wiini Epiɗ-ɗai Alaw na wimu n’aŋ warni Hlai zi simni na sɗik na wiini.

³⁰Won hlai na Pinas, pai zi ɓaka gaiɗi n’abakai na piɗi humuni humuni n’e ɗa gaini e ɵini gaglaini seŋ na pinzibani Ruben gaini Gad gaini Manase lai e miɗiŋɗi ɗa, e firiyi.

³¹Pinas n’ahini Eleyazar na pai zi ɓaka a miɗiɗi wiiɗi pinzibani Ruben, pinzibani Gad gaini galni pinzibani Manase lai maini nɵa: Tiyi mi siɗi tiyana ɓa EPIƊ-ƊAI a na arbamu, buri tiki ki zi wala na meefeŋ sini kai, nɵa ki piliɗi aliɗi Izrayel edi war tini EPIƊ-ƊAI par li.

³²Pinas n’ahini Eliyazar na pai zi ɓaka gaiɗi n’abakai na piɗi humuni humuni ɗa e hiniɗi pinzibani Ruben, pinzibani Gad e wiyi aha. E wiyisi midini afti na Galaad par a Kanaan siɗi aliɗi Izrayel e siɗi labar na e niviŋsi ɗa lai.

³³Aliɗi Izrayel e vi gaini firiyi, e zi tese sini Alaw, e hini hiini na ɓa e hitimiɗi pinzibani Ruben gaini Gad, e tûûri afti lai ɗa edi mak.

³⁴Nɵa pinzibani Ruben gaini Gad e sini yiki wiini gûwiŋ ɗa, e miɗi: Gûwiŋ hanɗa a zaida n’arbamu paŋ na a siŋka ɓa EPIƊ-ƊAI a Alaw.