Read Mousgoum Yosva 23 Bible Online

Yosva 23 - Mousgoum bible

Yosva 23

¹Mefeŋ viya asakal n’EPIƊ-ƊAI a siɗi si n’amla ya wiiɗi Izrayel ɗa, na a piliɗi edi tiɗi gawɗi na e gûniɗi azumai ɗa par, Yosva a za wel abai ta.

²Nɵa a tipiɗi ɗai na Izrayel paŋ, n’abakai zi ɵi wuze, n’abakai n’arbaɗi ɗai, paakai zi sariya gaiɗi ɗai ɗi zi ɗû wazagai ɗa lai, a miɗiɗi: Mu za wel gara ta,

³Tiki ki tili wala na Epiɗ-ɗai Alaw na wiiki a zaŋ sini piniziba hanɗa buriki ya, buri Epiɗ-ɗai Alaw na wiiki a ni n’a hitima buriki.

⁴Tili haw, mu ɓirwiki afti ɗa pini wala zi vili, pini ziba ziba. Afti na a hina sini yurdan par, gaini afti na wiiɗi ɗai na mu rɗa amai midiɗi, haa a agoɗom wulani yem ra n’abai piɗi futi na koskoi sek ta.

⁵Epiɗ-ɗai Alaw na wiiki aga a birgiɗi edi wuzaki, aga a ɵiriɗi edi wuzaki lai, nɵa aga ki tiki afti na wiiɗi maini n’Epiɗ-ɗai Alaw na wiiki a ziki ha ya midini nɵa.

⁶Nɵa ki ɗiyi gdaŋai aŋ zi pini wala paŋ n’aŋ gaini ɗû war maktuɓ na wiini Musus ɗa, ki bindi nsek kaalai, nzaw kaalai.

⁷Ki tipi gaiɗi piniziba na e ɗi arbaki na ɗa kai, ki yiki yikini alawaiɗi miki kai, ki hi wala miki gaini kai, ki hûrgi azumai wuzaɗi aŋ siiwi tiɗi kaalai.

⁸Amma ki tiki hiiniki midini Epiɗ-ɗai Alaw na wiiki maini na ki ɗa ziŋ haa girna na ɗa ɵa.

⁹EPIƊ-ƊAI a birgiɗi piniziba n’abakai, na gdaŋai lai wuzaki, pra haa girna ɗif ktai na a bla arki nɵa aŋ kaalai.

¹⁰Ktai arbaki a birga ɗai dubu ɗa, buri Epiɗ-ɗai Alaw na wiiki a hitima buriki ɗa a ni maini n’a miɗiŋki ɗa nɵa.

¹¹Buri nɵa, ki giɗimi siki pɗem, ki diri Epiɗ-ɗai Alaw na wiiki lai.

¹²Na ɓa tiki ki hini EPIƊ-ƊAI edi li, ki tipi li gaini piniziba na a na arbaki hanɗa, na ɓa ki tipi li gaiɗi war tiki, ki ɵihiɗi li gaiɗi ɗa,

¹³ki siɗi edi gaglai ɓa EPIƊ-ƊAI aga a birgiɗi pini ziba hanɗa edi wuzaki par kir kai, amma aga e bindi buriki aŋ ava na gaini azaw, aŋ daɓala n’e ɵiɓiki duɓaki gaini, aŋ hedek na a ɓilki arki, haa ki vidi edi midini afti na pɗem n’Epiɗ-ɗai Alaw a siŋki ɗa par.

¹⁴Girna mu na vuga warɗi futi na te zizina buriɗi ɗai na yai paŋ ɗa. Tiki ki sɗiŋ edi gaglai gaiɗi agulki paŋ, gaini suŋfaɗi agulki paŋ lai, koo ktai tekeɗeɗi, arbani seŋ na pɗamai paŋ n’Epiɗ-ɗai Alaw na wiiki a miɗiŋki ɗa na a va amai kai ɗa aŋ kai.

¹⁵Maini seŋ na pɗamai paŋ n’Epiɗ-ɗai Alaw na wiiki a miɗiŋki ɗa a va amai paŋ ɗa nɵa ɗa, nɵa lai EPIƊ-ƊAI aga a va seŋ na maafanai paŋ lai haa a vidiki edi kafa midini afti na pɗem na a siŋki hanɗa par.

¹⁶Na ɓa ki hi amai midini bonu na Epiɗ-ɗai Alaw na wiiki a zaŋ gaiki li ɗa, na ɓa tiki ki hûrgûli azumai wuzaɗi alawai na zamai lai ɗa, hiy na wiini EPIƊ-ƊAI aga a luɓasi midiki, aga a vidiki edi midini afti na pɗem na siŋki ɗa par tizaw.