Read Mousgoum Yosva 3 Bible Online

Yosva 3 - Mousgoum bible

Yosva 3

¹Dawaini, Yosva a faka amai gorof par cup, ni gaiɗi aliɗi Izrayel paŋ e fiki a Sittim par e gi wulani Yurdan e fini woni wuzani hûwini n’amai ɗa.

²Asakal mefeŋ hu, n’abakai n’arbaɗi ɗai e gûni vokɗi aliɗi Izrayel azumai kafa.

³E miɗiɗi wiiɗi ɗai maini nɵa: Won hlai n’aga ki tili zunduk zi bonu na wiini Epiɗ-ɗai Alaw na wiiki tiɗi paakai zi ɓaka na Levitekai ɗaw aŋ libi ɗa, aga ki fiki amai woni hlai hanɗa par ki hili piɗi.

⁴Amma arbaki gaini zunduk ɗa aga a za dai dai kil dubu sulu. Ki tûûrisi sini gobi a suwa kai, aga e siŋkitiki futi n’aga ki tikiti gaini siŋki buri ki hili ka woɗi futi na duk kai.

⁵Yosva a miɗiɗi wiiɗi ɗaini: Zi siki edi aŋ sɗik, buri dawai EPIƊ-ƊAI aga a za wazagai zi siŋki arbaki.

⁶Yosva a miɗiɗi wiiɗi paakai zi ɓaka maini nɵa: Libi zunduk zi bonu ɗa, vigi edi wuzaɗi ɗai. E libi zunduk ɗa, e hili edi wuzaɗi ɗai lai.

⁷EPIƊ-ƊAI a miɗini wiini Yosva: Girna aga mu tika pa aŋ bunduku abai arɗi aliɗi Izrayel paŋ kapai e siɗi ɓa mu na gaiku maini na mu naka gaini Musus nɵa.

⁸Aga ku sa miɗi wiiɗi paakai zi ɓaka n’e libi zunduk zi bonu maini nɵa: Won hlai na ki cû li agoɗom wulani Yurdan ɗa, ki ɗiyi agoɗom arbani Yurdan ɗa ca.

⁹Yosva a miɗiɗi wiiɗi aliɗi Izrayel: Tûûrisi, zibiri seŋ na wiini Epiɗ-ɗai Alaw na wiiki.

¹⁰Yosva a miɗiɗi: Pini hanɗa aga ki siɗi ɓa Alaw na karni a na arbaki, aga a birgiɗi: Kananiyakai, Hititekai, Hivitekai, Perezitekai, Girgazitekai, Amoritekai gaiɗi Yebuzitekai lai paŋ wuzaki.

¹¹Zunduk zi bonu na wiini EPIƊ-ƊAI na a ŋa midini afti ɗa paŋ aga a vuga wuzaki warni Yurdan.

¹²Tiyana ɗa, ki mili ɗai doogo pi sulu arbaɗi pinzibaɗi Izrayel, pini ziba paŋ ɗif ktai ktai.

¹³Won hlai na paakai zi ɓaka n’e libi zunduk zi bonu na wiini EPIƊ-ƊAI, EPIƊ-ƊAI na a ŋa midini afti paŋ ɗa e tiki buburni eziɗi agoɗom arni yem li ɗa, kiini yem na war ra Yurdan aga a ɗiya, yem na a kasi amai par aga a rga amai maini ɵaga nɵa.

¹⁴Ɗai e niyisi edi warni gororoɗi par buri e vigi Yurdan, paakai zi ɓaka n’e libi zunduk zi bonu e hili wuzaɗi ɗai.

¹⁵Won hlai na paakai zi ɓaka e cû agoɗom warni Yurdan, Yurdan a nafu gaini bivi haa amai wulani daŋ ta, buri a mefeŋ zi hiɗini seyem won hlai n’e jiibiyi eziɗi a agoɗom ɗa.

¹⁶Yem na a kasi amai par a ɗiya, a rga maini ɵaga nɵa, amai gai gai gobi gaini Adam, fuŋ n’abai n’a na ɵemaɗi Sartan. War gal n’azumai sek ɗa, yem na a ka war yem ra n’abai zi manta a yima edi kafa, ɗai e vigi Yurdan midiɗi Yeriko tar.

¹⁷Paakai zi ɓaka n’e libi zunduk zi bonu na wiini EPIƊ-ƊAI, e ɗiyi midini hlai na hûleŋ edi arbani Yurdan kal kal, haa ɗai na Izrayel paŋ e vigi midini afti na hûleŋ amai wulani daŋ.