Read Mousgoum Yosva 4 Bible Online

Yosva 4 - Mousgoum bible

Yosva 4

¹Won hlai na ɗai na Izrayel e vigi Yurdan paŋ li ɗa, EPIƊ-ƊAI a miɗini wiini Yosva:

²Ki viri ɗai arbaki doogo pi sulu, piniziba paŋ ɗif ktai ktai.

³Ku siɗi miɗi maini nɵa: Hili edi arbani Yurdan, woni hlai na paakai zi ɓaka e ɗiyi woni ɗa, ki milisi ali-fuŋ doogo pi sulu ki libiŋ haa woni hlai n’aga ki fini woni ɗa.

⁴Yosva a yikiɗi ɗai na doogo pi sulu na a viriɗi arbaɗi aliɗi Izrayel, piniziba paŋ ɗif ktai ktai.

⁵A miɗiɗi: Vigi wuzani zunduk na wiini Epiɗ-ɗai Alaw na wiiki, hili edi arbani Yurdan. Woni par ɗif paŋ a tikasi ahi fuŋ ktai amai wulani midini pɵiɗi pinzibaɗi na wiiɗi aliɗi Izrayel,

⁶kapai a za aŋ wala zi siŋki arbaki. Won hlai n’aliki e zilbiki li ɓa: Ali fuŋ hanɗa a siŋka buriki ɗa a maɗi ɗa?

⁷Aga ki wiyiɗi seŋ ɓa: Yem na Yurdan a ɗukla wuzani zunduk zi bonu na wiini EPIƊ-ƊAI, won hlai na a vugasi yurdan ɗa. Yem na Yurdan a ɗukla, ali-fuŋ hanɗa a wala na haa kureɗ n’aga a ɵiɗi midiɗi aliɗi Izrayel burini wala na a za ɗa.

⁸Aliɗi Izrayel e zi wala na Yosva a miɗiŋɗi. E milisi ali-fuŋ doogo pi sulu edi arbani Yurdan par maini n’EPIƊ-ƊAI a miɗiŋni wiini Yosva ɗa nɵa. Pini piɵiɗi pinzibaɗi aliɗi Izrayel e libiŋ e kiŋ woni hlai n’e fini woni.

⁹Yosva a gara ali-fuŋ amai midini marni doogo pi sulu edi arbani Yurdan woni hlai na eziɗi paakai zi ɓaka n’e libi zunduk zi bonu a ɗiya woni ɗa, a hina woni ɵa haa girna.

¹⁰Paakai zi ɓaka n’e libi zunduk e ɗiyi edi arbani Yurdan ca haa seŋ na EPIƊ-ƊAI a miɗiŋni wiini Yosva buri a miɗiŋɗi wiiɗi ɗai ɗa a va amai. Pini seŋ na Musus a miɗiŋni wiini Yosva ɗa, ɗai e pirmi witaw aŋ vigi.

¹¹Won hlai na ɗai paŋ e vigi amai gdaŋ li, zunduk zi bonu na wiini EPIƊ-ƊAI gaiɗi paakai zi ɓaka e wiyi warni balamɗi e ɵi edi wuzaɗi ɗai.

¹²Pinzibani Ruben, pinzibani Gad, gaini galni pinzibani Manase e zizini siɗi gaini wazagai zi gaw e vigi wuzaɗi tawalakaiɗi maini Musus a gidiɗi midini nɵa.

¹³Ɗai gobi dubu doogo doogo puɗu n’e ɗa gaini zizini buri hatam e vigisi wuzani EPIƊ-ƊAI edi mini hlai na plas na Yeriko.

¹⁴War mefeŋ ni ɗa, EPIƊ-ƊAI a bunda Yosva abai arɗi Izrayel paŋ, e hûniŋ maini n’e hûni pini Musus ɗa nɵa haa sini mrini.

¹⁵Nɵa EPIƊ-ƊAI a miɗini wiini Yosva:

¹⁶Miɗiɗi wiiɗi paakai zi ɓaka n’e libi zunduk zi bonu buri e niyisi amai war Yurdan par.

¹⁷Yosva a miɗiɗi wiiɗi paakai zi ɓaka: Niyisi amai warni Yurdan par.

¹⁸Won hlai na paakai zi ɓaka n’e libi zunduk zi bonu na wiini EPIƊ-ƊAI e niyisi amai warni Yurdan par, won hlai na buburni eziɗi a tika midini hlai na hûleŋ tar ɗa, yem na Yurdan a wayasi warni balamni, a ka maini n’avut ɗa ɵa haa a huŋva edi midini daŋ.

¹⁹Ɗai na Izrayel e niyisi amai war Yurdan par war mefeŋ n’ag'aŋ doogo na wiini tile n’avut, e simni a Gilgal piɗi futi na dawai par na wiiɗi Yeriko.

²⁰War Gilgal, Yosva a rga ali-fuŋ na doogo pi sulu n’e miliŋsi war Yurdan par amai midini marni.

²¹A miɗiɗi wiiɗi aliɗi Izrayel: Won hlai na aliki aga e zilbiki ɓa: Ali fuŋ hanɗa a siŋka ɗa midini a ma ɗi ɗa?

²²Aga ki wiyiɗi seŋ ɓa: a siŋka ɓa aliɗi Izrayel e vigisi Yurdan ɗa amai hûleŋ.

²³Buri Epiɗ-ɗai Alaw na wiiki a hina yem na war Yurdan a huula amai wuzani haa ki vigi paŋ, maini n’Epiɗ-ɗai Alaw na wiiki a zaŋ sini yem ra n’abai na mekele nɵa, a hinaŋ a huula amai wuzayi haa mi vigi.

²⁴Kapai ɗai na midiɗi yai paŋ e siɗi ɓa tini EPIƊ-ƊAI ɗa te ti zi spak gara, kapai tiki lai ki hûni Epiɗ-ɗai Alaw na wiiki kûreɗ-kûreɗ.