Read Mousgoum Yosva 5 Bible Online

Yosva 5 - Mousgoum bible

Yosva 5

¹Won hlai na paakai na wiiɗi Amoritekai n’e ɗa a Yurdan piɗi futi na koskoi sek gaiɗi paakai na Kanaan paŋ n’e ɗa gobi gaini yem ra n’abai ɗa lai, e ɵini ɓa EPIƊ-ƊAI a huula yem ra na Yurdan amai wuzaɗi aliɗi Izrayel haa e vigi ɗa, gdaŋɗi paŋ a vada edi, hunai te yimiɗi gara wuzaɗi aliɗi Izrayel.

²War mefeŋ ni EPIƊ-ƊAI a miɗini wiini Yosva: Zizina muguɗ z'ali-fuŋ, ɵiɗi gûrgûle wiiɗi aliɗi Izrayel n’e ɵi gûrgûle kai hai ɗa.

³Yosva a za muguɗ z'ali-fuŋ, a ɵiɗi gûrgûle wiiɗi aliɗi Izrayel gobi midini boŋor na Aralot.

⁴Wala na Yosva a ɵiɗi gûrgûle pini ɗa a hanɗa: Ɗai na e niyisi aha war Egipte par na maɵagai, ɗai n’e kiɗi burini hatam paŋ e mri war basga warɗi futi asakal na e niyisi edi warɗi Egipte par ya.

⁵Nagai paŋ n’e niyisi aha war Egipte par e ɵi gûrgûle paŋ. Amma nagai paŋ n’e wi edi war basga na kaɗataŋ war hiliɗi asakalni niyiɗi n’edi war Egipte par ɗa e nivi ɵini gûrgûle kai.

⁶Aliɗi Izrayel e hili war basga na kaɗataŋ buza doogo doogo puɗu haa nagai paŋ na e niyisi edi warɗi Egipte par, n’e kiɗi buri e hitimi ta ɗa e mri edi, buri e ɵini mini EPIƊ-ƊAI kai. EPIƊ-ƊAI a ha wala mini buri aga a hiniɗi aŋ tili afti z'alam na a siŋɗi wiiɗi tamaiɗi kai.

⁷E miliɗi aliɗi war balamɗi, Yosva a ɵiɗi gûrgûle buri e ɵi gûrgûle warɗi futi par kai.

⁸Won hlai na e vidi gaini ɵini gûrgûle ɗa, e simni warni kaŋ haa sini zûûliɗi ta.

⁹EPIƊ-ƊAI a miɗini wiini Yosva: Girna ɗa, mu tika siyer na war Egipte edi midiki par li. Buri hanɗa e sini yiki wiini hlai hanɗa ɓa: Gilgal, haa girna.

¹⁰Aliɗi Izrayel e simni a Gilgal, e ziti fet na wiini vigi n’amai ɗaw war mefeŋ n’ag'aŋ doogo pi puɗu na wiini tile ni ɗa, koskoi war hlai na plas na Yeriko.

¹¹Dawaini e simi wazagai na e niviŋ midini afti ni ɗa, gaini peŋ na is arni kai, gaini alini seyem zi sisili lai.

¹²War mefeŋ ni par, manna a ɗiya zaw, won hlai n’e simi wazagai na midini afti ni ɗa, aliɗi Izrayel e nivi manna kir kai, war buza ni ɗa e simi ɗa a wazagai na midini afti na Kanaan.

¹³Won hlai na Yosva a ŋasi gobi gaiɗi Yeriko, a yima arni amai a tala ɗif ktai gaini ɗiyi wuzani zaw, kaɵkarni gaini sûti edi sot. Yosva a hala sini a miɗini: Tuku ɗa, ku na piyi par zaw, ku na piɗi gawyi par ɗi?

¹⁴A wiyini seŋ a muɗa: Ta ɗa m’abaiɗi askarai na wiini EPIƊ-ƊAI, tiyana mu cosi li. Yosva a kɵa, arni gaini pi azumai tiɓ, a miɗini: EPIƊ-ƊAIŋa, ku muɗaŋa ɗa a seŋ maɗa?

¹⁵Abaiɗi askarai na wiini EPIƊ-ƊAI a miɗini wiini Yosva: Wa harabak na azuku edi, buri hlai na ku ɗiya woni ɗa a hlai na sɗik. Yosva a za nɵa lai.