Read Mousgoum Yosva 6 Bible Online

Yosva 6 - Mousgoum bible

Yosva 6

¹Mini magalaɗi Yeriko a nafu gaini dûgû gdaŋ gara wuzaɗi aliɗi Izrayel, ɗif a niya anene kaalai, ɗif a niya aha kaalai.

²EPIƊ-ƊAI a miɗini wiini Yosva: Tala, mu siti Yeriko gaini paiɗi gaiɗi gaŋgalaŋaiɗi paŋ war tuku.

³Tiki paŋ na ki kiɗi buri hatam ɗa, ki gûniti Yeriko ɗa azumai, ki gûniti azi ktai war yuvai haa mefeŋ ɵaara.

⁴Paakai zi ɓaka muguzak gaini faana tiɗi muguzak lai e hili wuzani zunduk zi bonu. War mefeŋ n’ag'aŋ muguzak ɗa aga ki gûniti Yeriko gun gun azi muguzak, paakai zi ɓaka e yibi faana lai.

⁵Won hlai na e yibi faana li, won hlai na ki ɵini tuwini faana li lai, ɗai paŋ aga e sûûri suura zi hatam, ɵaga aga a hurba azumai, ɗai aga e niyi aha, ɗif paŋ wuzani cir cir.

⁶Yosva n’ahini Nun a yikiɗisi paakai zi ɓaka a miɗiɗi: Libi zunduk zi bonu ɗa, paakai zi ɓaka muguzak e mili faana tiɗi muguzak e hili wuzani zunduk zi bonu na wiini EPIƊ-ƊAI.

⁷Asakal par a miɗiɗi wiiɗi ɗai: Hili, gûniti Yeriko azumai, tiki na gaini wazagai zi gaw tiki ɗa, vi edi wuzani zunduk zi bonu na wiini EPIƊ-ƊAI ɗa.

⁸Won hlai na Yosva a miɗiɗi wiiɗi ɗai ya, paakai zi ɓaka na muguzak na gaini faana na muguzak tiɗi e hili wuzani zunduk, e yibi faana, zunduk zi bonu na wiini EPIƊ-ƊAI piɗi par lai.

⁹Nagai n’e zizini siɗi mini hatam e hili edi wuzaɗi paakai zi ɓaka n’e yibi faana ɗa, vok hanɗa a halasi asakalni zunduk ɗa par, war hiliɗi, yibini faana ɗa a ɗiya duk kai.

¹⁰Yosva a gidiɗi ɗai maini nɵa: Aga ki ɗûûli kai, hini ɗif a ɵina wulaki kai, ki miɗi seŋ kaalai, haa sini mefeŋ n’aga mu miɗiki li ɓa: ki ɗûûli ɗuwal zi hatam ɗa, kapai ki ɗûûli.

¹¹Zunduk zi bonu na wiini EPIƊ-ƊAI a gûniti Yeriko azumai azi ktai, asakal par e wiyi aha war kaŋ aŋ feŋ.

¹²Yosva a faka amai gorof par, paakai zi ɓaka e wiyi aŋ libi zunduk zi bonu na wiini EPIƊ-ƊAI pra.

¹³Paakai zi ɓaka na muguzak na gaini faana na muguzak tiɗi ɗa, e fiki aŋ hili edi wuzani zunduk zi bonu na wiini EPIƊ-ƊAI, a yibi faana lai. Ɗai na e zizini siɗi mini hatam ɗa e hili edi wuzaɗi, vok na a hina a ɵaɗi asakalni zunduk zi bonu na wiini EPIƊ-ƊAI par, e hili gaini yibini faana miɗi kaai.

¹⁴War mefeŋ n’ag'aŋ sulu hanɗa, e gûniti Yeriko azi ktai, asakal par e wiyisi walaɗi aha war kaŋ, e zi maini nɵa haa mefeŋ ɵaara.

¹⁵War mefeŋ n’ag'aŋ muguzak ɗa, e fiki amai gorof cup, e gûni fuŋ n’abai ɗa azumai maini n’avut ɗa nɵa, e gûniŋ azi muguzak. A mefeŋ ni pal na e gûni fuŋ n’abai azumai haa azi muguzak ɗa.

¹⁶Azi n’ag'aŋ muguzak ɗa, paakai zi ɓaka e yibi faana, nɵa Yosva a miɗiɗi wiiɗi ɗai ɓa: Ɗûûli, buri EPIƊ-ƊAI a siki fuŋ n’abai ɗa war tiki ya.

¹⁷Fuŋ n’abai gaini wazagai na warni paŋ aga a tuura edi, wala ktai a hina kai, sai Rahab muni zi zawar gaiɗi nagai paŋ n’e ɗa aha gaiɗi war dalamɗi buri te ŋûyiɗi ɗai zi ɵeŋ na mu ɵunuɗumu aŋ tili hlai ɗa.

¹⁸Tiki ɗa, ki zi hangal, wala zi tusa na e tûûriŋ edi gaini tûûri ɗa ki tikiŋ kai, ɵa kai ɗa aga ki kisi gir midini kaŋ na wiiɗi Izrayel, aga a ɓulka edi lai.

¹⁹Arzaŋ paŋ, or gaini wazagai zi kiya, gaini kawai lai a wiini EPIƊ-ƊAI, ki miliŋ war godaini.

²⁰Ɗai e ɗûûli, paakai zi ɓaka e yibi faana lai, won hlai na ɗai e ɵini wulani faana ɗa, e ɗûûli gaini gdaŋɗi, ɵagai te hurba azumai, ɗai e niyi aha war fuŋ n’abai ɗa, ɗif paŋ wuzani cir cir, e tiki fuŋ n’abai ɗa.

²¹E vidiɗi ɗai na warni fuŋ n’abai ɗa, maɵagai, falakai, n’agogoi gaiɗi n’abakai lai paŋ. Slaakai, adumai gaini ablehökai paŋ e fiɗiŋ edi gaini kaɵkar.

²²Yosva a miɗiɗi wiiɗi ɗai na sulu n’e tilisi afti maini nɵa: Niyi ahaɗi muni zi zawar ɗa, yimitisi anene gaiɗi ɗai n’ahaɗi paŋ maini na ki hiɗi wala miki nɵa.

²³Ɗai na sulu n’e tilisi afti e hili e yimitisi Rahab ɗa anene, gaini epiɗi, emiɗi, tawalakaiɗi gaini wazagai na wiiɗi paŋ, gaini pini humuniɗi paŋ maini na ki hiɗi wala miki ɗa nɵa.

²⁴E ɵi afu pini fuŋ n’abai ɗa gaini wazagai na warni paŋ. E yi kai tar ɗa a arzaŋ ɗa, or gaini wazagai zi kiya gaini kawai lai, wazagai ni ɗa e miliŋ warni godai na wiini EPIƊ-ƊAI.

²⁵Yosva a hiniti Rahab na muni zi zawar ɗa karɗi, gaini pini humuniɗi paŋ, wazagaiɗi paŋ lai. Te sumna arbaɗi pinzibaɗi Izrayel haa girna, buri te ŋûyiɗi ɗai zi ɵeŋ na Yosva a ɵiniɗi aŋ tiliti Yeriko ɗa.

²⁶War sarti ni ɗa Yosva a ha wala mini a muɗa: Ɗif paŋ na a rga li fuŋ n’abai na Yeriko hanɗa amai ɗa, a zuva ɓa tusa na wiini EPIƊ-ƊAI a sumna midini. Ni n’a toro eziɗi Yeriko azumai li ɗa, ahini n’abai ɗa a mra, ni n’a pa porte na mini magala ɗa, ahini n’asakal ɗa a mra lai.

²⁷EPIƊ-ƊAI a nafu gaini Yosva, nɵa yikini a wa edi midini afti paŋ.