Read Mousgoum Yosva 7 Bible Online

Yosva 7 - Mousgoum bible

Yosva 7

¹Amma aliɗi Izrayel e zi wala na meefeŋ gara sini wazagai n’EPIƊ-ƊAI a ɗalaŋ buri e miliŋ kai ɗa. Akan n’ahini Karmi, ahini Zabdi, ahini Zerah war pinzibani Yuda a mula wazagai n’EPIƊ-ƊAI a ɗalaŋ buri e miliŋ kai ɗa, nɵa EPIƊ-ƊAI a za hiy siɗi Izrayel.

²War Yeriko par Yosva a ɵiniɗi ɗai war Ai piɗi futi na dawai na Betel gobi gaiɗi Bet-Aven, a miɗiɗi: Hili, tilisi afti na Ai ɗa. Nagai e hili, e tilisi afti na Ai ɗa.

³E wiyisi sini Yosva e miɗini: Kiyiɗi ɗai gaini hlaiɗi aŋ hitimiti Ai ɗa kai, ɗai dubu sulu zaw hu e hitimiti Ai ta; kiyiɗi ɗai paŋ kai buri nagai viya kai.

⁴Ɗai gobi dubu hu e hili aŋ hitimiti Ai, amma e rivisi wuzaɗi ɗai na Ai yaw.

⁵Ɗai na Ai e fiɗisi piɗi ɗai na Izrayel gobi doogo doogo hu pi ɵaara, e birgiɗisi aha mini magala par haa a Sebarim mini hlai na gaini zigi zak, e fiɗiɗi edi woni. Agulɗi ɗai na Izrayel a ɗukla, e bi arai zi pi na wiiɗi edi marwai.

⁶Yosva a ŋirwa sapa na sini edi, a hurga azumai arni gaini pi azumai tiɓ wuzani zunduk zi bonu na wiini EPIƊ-ƊAI haa koskoi, ni gaiɗi n’abakai na Izrayel ɗa lai. E pûkû alogodo amai midiɗi puk puk.

⁷Yosva a muɗa: Hay, Epiɗ-ɗai Alaw, ku hiniyi aŋ vigi Yurdan ɗa amai tiɓ buri maɗa? Kapai ku siyi tiɗi Amoritekai kapai e fiɗiyi edi ɗa? Mi siɗi a siɗi ya ɗa, mi hinisi anene kata par duɓani Yurdan.

⁸Za barka EPIƊ-ƊAI, mu muɗa zamai ɗa a maɗa! Asakal na Izrayel e rivi li wuzaɗi ɗa!

⁹Ɗai na Kanaan gaiɗi nagai zamai na e ɗa midini afti ni ɗa aga e ɵiniŋ, aga e tipi siɗi, e gûniyi azumai, aga e vidiyi edi midini afti par. Kapai ku siŋkiti abaiku edi maɵa maɵa ɗa?

¹⁰EPIƊ-ƊAI a miɗini wiini Yosva: Faka amai, ku bula suku azumai, arku gaini pi azumai tiɓ buri ma ɗa?

¹¹Izrayel e zi tuwur, e hi amai midini gadai na wiini bonu na mu miɗiɗi ɓa e zi pini ɗa. E mili wazagai na mu miɗiɗi ɓa e miliŋ kai ɗa, e hiliŋ, e ŋûyiŋ e miliŋ arbani wazagaiɗi ɗa.

¹²Nɵa aliɗi Izrayel e kiɗi buri e ɗiyi wuzaɗi gawɗi kir kai, aga e rivi wuzaɗi gaini rûvi buri e ɗa pini tusa. Aga mu za gaiki kir kai, na ɓa ki tûûri wazagai na mu miɗiki ɓa ki miliŋ kai ɗa, gaini ɗif n’a mulaŋ ɗa edi kai ɗa.

¹³Faka amai, ziɗi ɗai na Izrayel edi sɗik, aga ku miɗiɗi: Zi ziki edi sɗik buriɗi dawai, buri Epiɗ-ɗai Alaw na wiiɗi Izrayel a na muɗa maini nɵa: Wazagai na mu miɗiki ɓa ki miliŋ kai ɗa aŋ tiki, aga ki ɗiyi wuzaɗi gawki kai, na ɓa ki tûûriŋ edi gaini ɗif na a mulaŋsi kai ɗa.

¹⁴Ki hilisi wuza gorof war pini ziba ziba. Piniziba n’EPIƊ-ƊAI a varaŋ li ɗa, aga a halasi piɗi humuni humuni. Piɗi humuni n’EPIƊ-ƊAI a viriti li ɗa, te halasi te pakatai. Pakatai n’EPIƊ-ƊAI a viriti li ɗa, e hilisi ɗa e ɗi alini ɗif alini ɗif, alini ɗif n’EPIƊ-ƊAI a viriɗi li ɗa, e hilisi ɗa ktai ktai.

¹⁵Nɵa aga mu vara ɗif na a mula wazagai zi ɗili ɗa, tiki ki biliŋ arni afu gaini wazagai na wiini paŋ, buri a ha amai midini gadai na wiini bonu, a za wala zi siyer n’abai warɗi Izrayel.

¹⁶Yosva a faka amai gorof par, a kiɗisi aliɗi Izrayel pini piniziba ziba. Piniziba na wiini Yuda a vara li.

¹⁷A kiɗisi piɗi humuni humuni. Piɗi humuni na wiini Zerah a vara li. A kiɗisi piɗi pakatai pakatai. Pakatai na wiini Zabdi te vara li.

¹⁸A kiɗisi alini ɗif ɗa ktai ktai. Viri a yima ɗa a Akan n’ahini Karmi, ahini Zabdi, ahini Zera na war pinzibani Yuda.

¹⁹Yosva a miɗini wiini Akan: Ahiya, za barka, sa kol sini Epiɗ-ɗai Alaw na wiiɗi Izrayel, sɗa meefeŋku wuzani, wala na ku zaŋ ɗa muɗaŋa, ŋoya wala ktai maa wuza kai.

²⁰Akan a wiini seŋ wiini Yosva maini nɵa: A futini, mu za tuwur sini Epiɗ-ɗai Alaw na wiiɗi Izrayel ɗa muta. Na mu zaŋ ɗa a hanɗa:

²¹Arbani dermu na pini hatam ɗa, mu tiliti sapay ktai na zûvi na Mezopotamiya, arzaŋ miya sulu gaini morsoni or na a tika kilo doogo doogo ɵim lai, mu za suuna sini ta mu mulaŋ yaw. A na amlai warni gumuŋa gaini ŋoyai cok azumai pini afti, arzaŋ azumai pini par ɗik lai.

²²Yosva a ɵiniɗi ɗai e hili amlai warni gumu na wiini Akan, e nivi wazagai hanɗa gaini ŋûyi amlai cok, arzaŋ ɗa azumai pini par ɗik lai.

²³E miliŋsi, e kiŋnisi wiini Yosva gaiɗi Izrayel ɗa paŋ, e miliŋ azumai EPIƊ-ƊAI.

²⁴Yosva gaiɗi ɗai na Izrayel ɗa paŋ e yimi Akan n’ahini Zerah, e mili arzaŋ gaiɗi sapay, gaini morsoni or ɗa lai, e yimiɗi alini na maɵagai gaiɗi na falakai lai, ɵaakaini, ablehökaini, adumaini gaini haakaini lai, gumuni gaini wazagaini na zamai zamai lai paŋ e kiɗi war huduk na Akor.

²⁵Yosva a muɗa: Tuku ku kasi gir midiyi buri maɗa? Girna ɗa, EPIƊ-ƊAI a kasi gir muduku lai. Nɵa aliɗi Izrayel e fiɗiŋ edi gaini kriyit, ɗai na ahani nɵa lai, e fiɗiɗi edi, e yiɗi arni afu.

²⁶E tipi kriyit amai midini Akan haa amai, kriyit hanɗa a na haa girna, pini hanɗa e sini yiki wiini hlai hanɗa ɓa: Huduk na wiini Akor, yiki hanɗa a na ɵa haa girna. Asakal hanɗa, hiy n’abai na wiini EPIƊ-ƊAI a ɵaɗa azumai ɵeɗ.