Read Mousgoum Yosva 8 Bible Online

Yosva 8 - Mousgoum bible

Yosva 8

¹EPIƊ-ƊAI a miɗini wiini Yosva: Ku huna kai, ku ba bayai na pini ɵeɗ na wiiku edi, ku miliɗi ɗai zi hatam paŋ gaiku, zizina suku aŋ hitimiti Ai. Tala, mu suku pai na Ai gaiɗi ɗaini paŋ war tuku, fuŋni n’abai gaini aftini paŋ lai.

²Aga ku za siɗi Ai gaini paiɗi maini na ku za siɗi Yeriko gaini paiɗi nɵa. Wala zi der gaini farai n’ezini puɗu puɗu na ki niviŋ paŋ ɗa a wiiki. Tuku ɗa, ku miliɗi ɗai zi riɓti edi par duɓani fuŋ n’abai ɗa par ca.

³Yosva a faka amai gaiɗi ɗaini zi gaw ɗa paŋ buri a hala aŋ cikiti Ai, a viriɗi ɗai n’e siɗi yelni hatam dubu doogo doogo hu, a ɵiniɗi duvuk.

⁴A miɗiɗi maini nɵa: Tili, tiki aga ki riɓtiɗi duɓani fuŋ n’abai ɗa par, ki ɗiyi edi gai gai par a suwa kai, ki simni gaini zizini.

⁵Ta gaiɗi ɗai n’e ɗa gaya paŋ aga mi hiliɗi sini fuŋ n’abai ɗa sek, e niyisi li anene aryi ɗa, tiyi aga mi rivi wuzaɗi maini n’avut ɗa nɵa.

⁶Aga e tikisi futi piyi, tiyi aga mi tiniɗisi edi gai gai sini fuŋ n’abai ɗa par buri aga e hiini ɓa mi rivi na ɗa a rivi wuzaɗi maini n’avut ɗa ɵa.

⁷Tiki ki niyisi edi warni hlaiki zi ŋoyai ɗa par, ki tiki fuŋ n’abai ɗa, Epiɗ-ɗai Alaw na wiiki aga a saŋ war tiki.

⁸Won hlai na ki tiki fuŋ n’abai ɗa li ɗa, ki tiki afu pini. Aga ki zi maini n’EPIƊ-ƊAI a muɗaŋ ɗa nɵa, hanɗa a gadai na mu siŋki ɗa.

⁹Yosva a ɵiniɗi, e hili e simni aŋ riɓti arbaɗi Betel gaiɗi Ai, war gal na koskoi na wiiɗi Ai, war duvuk ni ɗa, Yosva a fana arbaɗi askarai n’e hini ɗa.

¹⁰Yosva a faka amai gorof par a tiliɗi ɗai na pini paŋ, ni gaiɗi n’abakai na war Izrayel ɗa e hili edi wuzaɗi ɗai aŋ cikiti Ai.

¹¹Ɗai zi hatam n’e ɗa gaini paŋ e hili, e tûûri gobi gaiɗi Ai. Won hlai n’e cûsi wuzani fuŋ n’abai ɗa, e pi kaŋɗi wuzaɗi Ai war gal n’azumai sek tiɓ, huduk a nafu arbaɗi gaiɗi Ai.

¹²Yosva a mula ɗai gobi dubu ɵim, a ɵiniɗi aŋ riɓti arbaɗi Betel gaiɗi Ai, war gal na koskoi sek na wiiɗi Ai.

¹³Won hlai na ɗai e pi kaŋɗi paŋ azumai li war gal n’azumai sek na wiiɗi Ai ɗa, galɗi zamai a sumna piɗi futi na koskoi sek na wiini fuŋ n’abai. War duvuk ni ɗa Yosva a fana edi warni huduk.

¹⁴Won hlai na pai na Ai a tiliɗi ɗai na Izrayel ɗa, a niyasi edi witaw war fuŋ n’abai ɗa par gaiɗi askaraini paŋ, e hili aŋ hitimiɗi aliɗi Izrayel warni hlai n’avut e hitimiɗi woni ɗa, cir midini huduk na Yurdan. A sɗa ɓa ɗai e ɗa riɓtiŋ edi duɓani fuŋ n’abai ɗa par nɵa kai.

¹⁵Yosva gaiɗi Izrayel e zi siɗi maiɗi ɗai na gdaŋɗi kai nɵa, e pri edi wuzaɗi warɗi futi na te ka edi war basga na kaɗataŋ sek.

¹⁶Ɗai na Ai paŋ e tipisi buri e tiki futi piɗi, e tiki futi pini Yosva haa e hinisi fuŋɗi n’abai ɗa edi gai gai.

¹⁷Ɗif ktai na war Ai gaiɗi Betel par na a niyasi edi kai ɗa aŋ kai; e hinisi mini magalani fuŋ n’abai ɗa edi su, e birgiɗi ɗai na Izrayel ɗa.

¹⁸EPIƊ-ƊAI a miɗini wiini Yosva: Miɗiti kawai na t'aŋ tuku midiɗi Ai, buri mu sutuku li war tuku. Yosva a miɗiti kawai na t'aŋ tini midini fuŋ n’abai na Ai.

¹⁹Tizaw won hlai na a miɗiti tini edi li, ɗai zi ripti e niyisi edi witaw tar war hlaiɗi zi ŋoyai ɗa par, e niyi aha war fuŋ n’abai ɗa, e tiki hlai paŋ, e tiki afu pini witaw taw tar lai.

²⁰Ɗai na Ai e ɵi arɗi duɓaɗi ɗa, e tili agiyiŋ a na aha amai war fuŋɗi n’abai ɗa par amai warni hlai n’amai sek, hlai ktai na e ki siɗi woni sek aŋ kir kai, ɗai na Izrayel n’e rivi wuzaɗi edi warni basga sek ɗa e bindisi arɗi.

²¹Won hlai na Yosva gaiɗi ɗai na Izrayel paŋ, e siɗi ɓa, ɗai zi riɓti e tiki fuŋ n’abai ɗa ɗaw, agiyiŋ na wiini fuŋ n’abai a na ha amai lai ɗa, e bindisi arɗi, e fiɗiɗi ɗai na Ai ɗa edi.

²²Izrayel na zamai n’e bindisi aha duɓaɗi par e hilisi arɗi zaw, ɗai na Izrayel e gûniɗi ɗai na Izrayel azumai, e vidiɗi edi paŋ, ktai na a hina karni aŋ kai, na a pra edi aŋ kaalai.

²³Pai ɗa e yimiŋsi karni, e kiŋsi wuzani Yosva.

²⁴Won hlai na ɗai na Izrayel e vidi li gaini fiɗiɗi ɗai na Ai paŋ edi war basga ɗa, e wiyisi aha warni fuŋ n’abai e fiɗi piɗi na a hini aha ca lai.

²⁵Pɵaɗi ɗai n’e mri warni mefeŋ ni ɗa, maɵagai gaiɗi falakai paŋ e zi ɗai dubu doogo pi sulu. Paŋ e ɗi ɗai na Ai.

²⁶Kawai na Yosva a miɗiti edi midiɗi Ai te hina woni gaini miɗi meɗ ɵa haa ɗai na warɗi paŋ e vidi edi.

²⁷Pini miɗi n’EPIƊ-ƊAI a miɗiŋni wiini Yosva ɗa, Izrayel e mili der na maini farai n’ezini puɗu puɗu gaini der zamai zamai lai na wiini fuŋ n’abai hanɗa aŋ wiiɗi.

²⁸Yosva a yiti Ai edi, a ziti aŋ zö na a rga amai kir kai haa girna.

²⁹Pai na Ai ɗa, a tokoŋ amai sini luwuŋ haa koskoi. Siɗi futi koskoi sek ɗa, Yosva a sa miɗi buri e tikisi kopoŋni azumai amai sini luwuŋ par. E biliŋ gobi gaini mini magala na wiini fuŋ n’abai ɗa, e tipi kriyit amai midini viya, haa girna a na.

³⁰Nɵa Yosva a rga gûwiŋ zi ɓaka burini Epiɗ-ɗai Alaw na wiiɗi Izrayel sini huwuŋ Ebal.

³¹A rgaŋ maini na Musus, ɵeŋ na wiini EPIƊ-ƊAI a miɗiŋɗi wiiɗi aliɗi Izrayel ɗa nɵa, maini n’aŋ gaini ɗû war maktuɓ na wiini gadai na wiini Musus ɗa nɵa lai. A gûwiŋ zi ɓaka na a rga gaini alini fuŋ n’e hiŋɗi sini gaini kawai kai, e zini ɓaka zi yi gaini ɓaka zi ɵeɗ lai wiini EPIƊ-ƊAI midini.

³²Woni hlai ni, Yosva a ɗo gadai midini alini fuŋ na Musus siɗi aliɗi Izrayel.

³³Izrayel paŋ, abakaiɗi paŋ, ɗai ɗi zi ɗû wazagai ɗa paŋ, paakaiɗi zi sariya paŋ e ɗiyi sini zunduk war galni na sulu paŋ wuzaɗi paakai zi ɓaka. Levitekai n’e libi zunduk na wiini EPIƊ-ƊAI na morkokoi paŋ e tipi paŋ, galɗi midini huwuŋ Garizim, galɗi na zamai midini huwuŋ Ebal lai pini miɗi na wiini Musus, ɵeŋ na wiini EPIƊ-ƊAI buri a ɓikiɗi ɗai na Izrayel avut haw.

³⁴Asakal par, Yosva a ŋa seŋ n’aŋ warni gadai zi ɗûpaŋ, ɓiki gaini tuusa lai kal kal maini n’aŋ gaini ɗû warni maktuɓ zi gadai ɗa nɵa.

³⁵Wala ktai na Musus a ɗoŋ na Yosva a ŋaŋ wuzaɗi vokɗi aliɗi Izrayel kai ɗa aŋ kai, falakai gaiɗi aliyagoi, morkokoi n’e ɗa arbaɗi lai paŋ.