Read Mousgoum Yosva 9 Bible Online

Yosva 9 - Mousgoum bible

Yosva 9

¹Won hlai n’e ɵini labar hanɗa, paakai n’e ɗisi war galni Yurdan piɗi futi na koskoi par paŋ, n’amai midini huwuŋ, na midini boŋorai gaiɗi n a wulani yem ra n’abai haa gobi gaiɗi Liban. Hititekai, Amoritekai, Kananiyakai, Perezitekai, Hivitekai gaiɗi Yebuzitekai lai,

²e tipi siɗi, e kiti miɗi buri e hitimi Yosva gaiɗi aliɗi Izrayel.

³Ɗai na Gabawon e ɵini labarni wala na Yosva a zaŋ sini fuŋ n’abakai na Yeriko gaiɗi Ai ɗa ba.

⁴Nɵa e piyi yel, e mili sak na walakai midini ablehökaiɗi ca ca, gaini kene kene zi viŋ na walakai n’arni gaini cû co co gaini diɓiki lai, e piyi wala zi simi tiɗi lai e hili.

⁵E wi harabak na walakai eziɗi, e wi sapa zi kese kese siɗi, e mili peŋ na hûleŋ na gaini kûkûɗi tiɗi yaw lai.

⁶E hili sini Yosva war kaŋ na Gilgal e miɗini, wiini gaiɗi ɗai na Izrayel paŋ: Tiyi ɗa, mi hilisi midini afti na gai gai par, mi diri mi zi bonu gaiki.

⁷Ɗai na Izrayel e wiyiɗi seŋ wiiɗi Hivitekai hanɗa maini nɵa: Ablaŋtaŋkai ki ɗi na gobi gaiyi na ɗi ɗa, mi zi bonu gaiki maɵa ɗa!

⁸E miɗini wiini Yosva: Tiyi mi ɗi ɗaiku zi sda. Yosva a zilbiɗi: Tiki ki ɗi ɗai ma ɗa? Ki hilisi wata par ɗa?

⁹E wiyi seŋ e miɗini: Tiyi ɗaiku zi sda mi hilisi gai gai par burini yikini Epiɗ-ɗai Alaw na wiiku, buri mi ɵini labarni gaini wala na a zaŋ war Egipte ɗa.

¹⁰Gaini wala na a zaŋ siɗi paakai na sulu na wiiɗi Amoritekai anene par duɓani Yurdan ɗa: Sihon pai na Hesbon gaini Og pai na Basan na a sumna war Astarot ɗa.

¹¹N'abakai na midini aftiyi gaiɗi ɗai na midini afti paŋ e miɗiyi ɓa: Mili wazagai zi simi tiki buri morkoiki, hili siɗi, ki miɗiɗi ɓa: Tiyi mi ɗi ɗaiki zi sda, tiyana mi siiwiki, zi bonu gaiyi ta.

¹²Tili peŋyi haw, won hlai na mi miliŋsi tiyi aha par war mefeŋ na mi fikisi aŋ hilisi siki sek ɗa, a nafu afu, tiyana a huula haa a kukuɗa edi.

¹³Kene kene hanɗa, e viŋ sek ɗa a nafu hahakai, tiyana arni a co kafa, sapakai n’aŋ siyi gaini harabak n’eziyi lai a suma edi kap tini hili na mogo hanɗa.

¹⁴Ɗai na Izrayel e yimi wazagaiɗi zi simi tiɗi par, amma e zilbi dirini EPIƊ-ƊAI kai.

¹⁵Yosva a za bonu zi ɵeɗ gaiɗi, pini bonu hanɗa e simni karɗi. Ɗai n’abakai na Izrayel e hi wala miɗi buri e zi pini bonu hanɗa lai.

¹⁶Mefeŋ hu asakal par, aliɗi Izrayel e ɵini ɓa, e ɗi ɗai na ɵemaɗi, e ɗa arbaɗi lai.

¹⁷Buri nɵa aliɗi Izrayel e hili, e gi ahaɗi war fuŋɗi n’abakai ɗa mefeŋ hu. Fuŋɗi n’abakai ɗa a hanɗa: Gabawon, Kefira, Berot, Kiriyat-Yeyarim lai.

¹⁸Aliɗi Izrayel e fiɗiɗi edi kai burini wala na ɗai n’abakai na Izrayel e hiŋɗi miɗi war yikini Epiɗ-ɗai Alaw na wiiɗi Izrayel ɗa. Amma vokɗi aliɗi Izrayel a ŋuriya gara buriɗi abakaiɗi Izrayel.

¹⁹N'abakai e miɗi siɗi aliɗi Izrayel na paŋ ɗa ɓa: Tiyi mi hiɗi wala miyi war yikini Epiɗ-ɗai Alaw na wiiɗi Izrayel, tiyana mu kuɗumu aŋ zuɗumu meefeŋ kai.

²⁰Nɵa aga mu zumu siɗi maini nɵa: Mu hunuɗumu karɗi kapai mu kumusi hiy mudumu kai, burini wala na mu huŋɗumu mumu ɗa.

²¹N'abakai e miɗiɗi: E simni karɗi sme, amma e biliɗi luwuŋ gaini yem lai wiiɗi aliɗi Izrayel paŋ. Hanɗa a miɗi na n’abakai e miɗiŋ ɗa.

²²Yosva a ɵina piɗi aŋ yikiɗisi, a miɗiɗi: Tiki ki dûûliyi nɵa buri maɗa? Ki miɗi ɓa: Ki hilisi na ɗa gai gai par, amma paŋ ktai ki ɗi na ɗa arbayi na dama.

²³Tiyana par ɗa, ki tûûsi li, aga ki hini aŋ bagakai ɵa haa kureɗ, ki bili ɗa luwuŋ gaini yem war tempel na wiini Alaw.

²⁴E wiyini seŋ wiini Yosva: Tiyi mi zi nɵa buri mi ɵini ɓa, Epiɗ-ɗai Alaw na wiiku a miɗini wiini Musus ɗifni zi ɵeŋ buri a siki afti hanɗa paŋ, ki vidiɗi ɗai na midini edi lai, hunai a yimiyi gara, mi zi nɵa burini.

²⁵Tiyana mi ɗa war tuku, za siyi maini na ku dara nɵa.

²⁶Yosva a za siɗi maini na e kitiŋsi ɗa nɵa, a piliɗi edi tiɗi aliɗi Izrayel par, e kiɗi e fiɗiɗi edi kai.

²⁷War mefeŋ ni ɗa, Yosva a miliɗi aŋ ɗai zi bili luwuŋ gaiɗi ɗai zi bili yem wiiɗi aliɗi Izrayel gaini gûwiŋ na wiini EPIƊ-ƊAI, woni hlai n’EPIƊ-ƊAI a varaŋ ɗa, haa girna tiyakaiɗi e ɗa zi sda hanɗa.