Read Mousgoum 2 Tesalonikekai 3 Bible Online

2 Tesalonikekai 3 - Mousgoum bible

2 Tesalonikekai 3

¹N'a hina ɓa tawalakai, ki siiwi buriyi, kapai seŋ na wiini Epiɗ-ɗai a hala wuzani, a nava kol lai maini n’ahaki nɵa.

²Kapai tiyi mi nivi pli n’edi tiɗi ɗai na maafanai, gaiɗi na jrekai kai ɗa par lai, buri ɓa yimi ɗa aŋ warɗi ɗai paŋ kai.

³Amma Epiɗ-ɗai ɗa a jre, aga a siki gdaŋ, a kutiki tini na meefeŋ par,

⁴tiyi mi yimi fakat war Epiɗ-ɗai ɓa: ki ɗa zi wazagai na mu miɗiki gaini ɗa, aga ki ziŋ wuzaki sek a suwa pra.

⁵A zuva ɓa Epiɗ-ɗai a bundasi agulki sin diri na wiini Alaw sek gaini siiki na wiini Kristu.

⁶Tawalakai, mi gidiki na ɗa war yikini Epiɗ-ɗai Yesu Kristu, buri ki yimi siki edi sini tawal paŋ n’a na paya war tuurli, n’a paya pin hitrai na tiyi mi hitriŋki kaalai.

⁷Tiki dama ki siɗi maɵa ɗa aga ki tiki eziyi; buri tiyi mi simniarbaki war tuurli kai.

⁸Tiyi mi simi simini ɗif kadai meere kai, amma mi zi sda, mi kiyi duvuk gaini girvudi paŋ, kapai mi hiini aŋ guma midini ɗif ktai kai.

⁹Hanɗa buri ɓa mi kiɗi mi simi siki par kai ɗa kai, amma mi firyi ɓa mi hini aŋ wala na ki tiki sini par.

¹⁰Buri nɵa, won hlai na mi ɗisi ka ahaki ɗa, mi gidiki maini nɵa: na ɓa ɗif a dara a za sda kai ɗa a pɗem ɓa a suma kaalai.

¹¹Amma tiyi mi ɗa ɵini ɓa zamai arbaki e piyi na ɗa war tuurli, e niyi war seŋ n wiiɗi warni kai.

¹²Tiyi mi diri mi gidiɗi ɗai na mainihanɗa nɵa ɗa, mi siɗi arai zi pi war Yesu Kristu, buri ag e zi sda gaini hangalɗi, kapai e simi war gdaŋɗi dama lai.

¹³Amma tiki ɗa tawalakai, ki kiyi war sda na pɗamai kai.

¹⁴Na ɓa ɗif a dara a za pin seŋ na mi miɗiŋ war letre hanɗa kai ɗa, ki ɓiŋ edi su, ki tipi gaini kai, kapai a tika siyer.

¹⁵Amma aga ki yimiŋ maini gawki nɵa kai, amma aga ki gidiŋ maini tawal nɵa.

¹⁶Epiɗ-ɗai zi ɵeɗ gaini midini dama a siki ɵeɗ, war hlai paŋ maini n’a hiinaŋ nɵa. Epiɗ-ɗai a sumna gaiki paŋ.

¹⁷Hanɗa a ɵiɓini wuti na wiya Paulus gaini ta mal, hanɗa a siye na wiya wa letrekaia paŋ, hanɗa a ɗû na wiya.

¹⁸Yum na wiini Epiɗ-ɗaimu Yesu Kristu a sumna gaiki paŋ.