Read Mousgoum 1 Timotewus 1 Bible Online

1 Timotewus 1 - Mousgoum bible

1 Timotewus 1

¹Paulus, apostel na wiini Kristu Yesu, pin miɗi na wiini Alaw, Ɗif-si-kûri na wiimu, gaini Yesu Kristu, n’a biyi-na-pin-ɵeɗ na wiimu.

²Sin Timotewus, ahiya na jre war yimi. Alaw Api gaini Epiɗ-ɗaimu Kristu Yesu, e suku yim, hiinini haw gaini ɵeɗ lai.

³Maini na mu guduku, won hlai na ku hala war Makedoniya sek ɗa nɵa, buri ku sumna war Efesus, kapai ku gidiɗi ɗai zamai aŋ hitri hitrai na zamai kai.

⁴Aŋ yimi labar na jreni aŋ kai gaini na wiini girini pinziba n’a pini a vada kai, n’a zina pin sispai kadai, a zinai pin sdani Alaw n’a za war yimi ɗa kai.

⁵Wala na gadai hanɗa a sa burini, a diri n’a halasi warɗi agul na hilu par, war hiini na pɗem par, war yimi na jre par lai.

⁶Zamai n’e sili edi ɵimani hanɗa ɗaw ɗa, e bindi e miɗi ɗa a seŋ n’a nafa kai

⁷E firyi e zi siɗi aŋ ɗai zi hitri gadai, e siɗi wala n’e miɗiŋ ɗa kaalai, n’e ɗiyi midini gdaŋ na ɗa maa e siɗiŋ kaalai.

⁸Mu suɗumu edi gaglai ɓa gadai ɗa a wala na pɗem, na ɓa ɗif a za gaini woɗi futini ɗa.

⁹Mu suɗumu ɓa gadai ɗa a za burini ɗif na jre ɗa kai, amma buriɗi nagai n’e zi pini gadai ɗa kai, gaiɗi na hiraŋai, n’e sini hormo wiini Alaw gaini wazagai na sɗik kaalai, n’e fiɗi tamaiɗi na maɵagai gaiɗi na falakai lai edi, n’e ɵiɓi belek,

¹⁰ɗai n’e zi maɵara, n’e fini gaiɗi marɗi na maɵagai, n’e cikili bagakai, z'alasakai, n’e hi wala miɗi war eles, gaini wazagai zamai zamai paŋ n’a tapa gaini hitrai na jre ɗa kai,

¹¹pin labar na pɗem na pɗem na wiiɗi abai na wiini Alaw zi ɵeɗ, labar napɗem n’a sasi war ta aŋ sogom.

¹²Mu sa tese n’abai gara sin ni n’a saŋa gdaŋ ya, Kristu Yesu Epiɗ-ɗai na wiimu, buri a ŋaŋa aŋ ɗif na jre war ɵeŋ,

¹³paŋ ktai avut mu naka mu ɗif na mu tirka Alaw, zi zi gir wiiɗi ɗai, zi kiri ɗai lai, amma Alaw a za yim sa buri mu za hanɗa war siɗi kai, buri yimi kai na wiya lai.

¹⁴Nɵa, yim na wiini Epiɗ-ɗaimu a za sa abai gara gaini yimi, gaini diri na war Kristu Yesu.

¹⁵Seŋ hanɗa a jre, ɗif a kiɗa aŋ yimaŋ gaini giriŋi kai ɓa: Kristu Yesu a halasi warɗi yai buri a kûriɗi na tuwarai, ta ɗa mu n’avut arbaɗi nagai hanɗa.

¹⁶Amma sa ta ɗa Alaw a za yim, kapai gaya ta ɗa, Yesu Kristu a siŋka ziyini-seŋ na gaini hangal na wiini ɗa edi, aŋ wala zi siŋki buriɗi nagai n’aga e yimi warni, buri sin suŋfa n’a vada kai.

¹⁷Kol gaiɗi abai sin Pai n’a vada kai, n’a mra kai, na ɗif a talaŋ kaalai, Alaw na ktai, haa hlai n’a vada kai, n’a vada kai. Amen.

¹⁸Gadai na mu suŋku tuku ɗa, Timotewus, ahiya, pin miɗi na wiiɗi ɗai na min Alaw e miɗiŋsi aɗipar muduku, ku ɗiya midini seŋ na wiiɗi ɗa, kapai ku hitima hatam na pɗem,

¹⁹ku giɗima yimiku gaini hiini na pɗem lai, hiini hanɗa, zamai e hiniŋ edi, nɵa yimiɗi a buɗuha maini hulum n’a pa nɵa.

²⁰Himenewus gaini Aleksander e ɗi arbaɗi ɗai hanɗa, mu siɗi edi tin Satan, kapai e gidi, a yima midiɗi lai ɓa ɗif a sɗa aŋ tirka Alaw kai.