Read Mousgoum 1 Timotewus 2 Bible Online

1 Timotewus 2 - Mousgoum bible

1 Timotewus 2

¹Buri nɵa, gadai na mu siŋki avut ɗa ɓa: ki zilbi tin Alaw, ki siiwiŋ, ki tuwi sini, ki zi tese sin Alaw lai buriɗi ɗai paŋ,

²buriɗi paakai gaiɗi n’abakai ta ta ɗa paŋ, kapai mu piyumu war ɵeɗ, gaini hangal, war jre gaini hormomu sumu lai.

³Hanɗa arni Alaw, Ɗif-zi-kûri na wiimu pɗem, a daraŋ gara lai.

⁴Ni n’a dara ɓa ɗai paŋ e nivi kûri e gi sin siɗi na jre lai.

⁵Buri ɓa Alaw a na ktai, ɗif n’a tapa arbani Alaw gaiɗi ɗai ɗa a ktai lai, a ɗif, Kristu Yesu.

⁶Ni n’a sa sini dama aŋ vrak buri a bindiɗisi ɗai paŋ edi, hanɗa a zaida n’a za, war mefeŋni n’aŋ gai ɗiyi zaw ɗa.

⁷Buri hanɗa a tikaŋa ta aŋ ɗif n’aga a muɗa edi, aŋ apostel lai. Mu muɗa na ɗa a jre, mu rha ɗa a ma kai, aŋ ɗif zi hitri na wiini pinziba na zamai na war yimi gaini jre lai.

⁸Buri nɵa, a dara ɓa maɵagai e siiwi war hlai paŋ, e yimi tiɗi na sɗik amai, war hiy kai, war sispai kai.

⁹Nɵa lai, falakai n’e wi sapa siɗi gaini futini, n’a kasi miisi gaini tirki siɗi kai, a kiɗi war kûlûni-si kaalai ɗa, aga e zizini siɗi ɗa gaini ayir zi tirɗi ɗa kai, gaini or kai, gaini aidaw kai, gaini wazagai zi gan na faraini abai ɗa kaalai.

¹⁰Amma gaini sda na pɗamai, maini n’a zuva siɗi falakai n’e tili siɗi ɓa e ɗa hûni Alaw nɵa.

¹¹A zuva ɓa muni te hitra wala war hangal, war hûsini-si.

¹²Amma mu sa futi wiiɗi muni buri te hitra kai, aŋ ŋa midini wus kaalai, aga te sumna hiyak.

¹³Buri ɓa Adam a rga avut, Eva asakal par.

¹⁴A rha edi ɗa a Adam kai, amma te muni ɗa, asakal na te rha edi li ɗa, te ha amai midini gadai.

¹⁵Amma gaini hanɗa paŋ ɗa, na aga te nava kûri war wiiɗi ali, na ɓa te ɗiya li war yimi, war diri, war sɗik, war kûlûni-si kai.