Read Mousgoum 1 Timotewus 4 Bible Online

1 Timotewus 4 - Mousgoum bible

1 Timotewus 4

¹Paŋ ktai Seze a muɗaŋ edi gaglai ɓa: War mefeŋ n’asakal ɗa, zamai aga e hini yimi edi, aŋ yimi pin seze zi wili ɗai edi, gaini hitrai na wiini Mat,

²pin rhai na wiiɗi ɗai n’e miɗi eles, na hiiniɗi aŋ gaini diŋri maini gaini kawai na gaini ɵi mekele nɵa.

³E ɗiliɗi ɗai buri e tiki kai, e si gadai buri e simi wazagai zamai n’Alaw a rgaŋ ɓa kapai ɗai n’e yimi gaiɗi n’e siɗi jre lai ɗa e simiŋ gaini zini tese ɗa lai.

⁴Paŋ ktai wazagai n’Alaw a rgaŋ paŋ ɗa a pɗamai, wala zi bili edi aŋ kai, na ɓa mu sumuŋmu gaini zini tese ɗa.

⁵Buri wazagai paŋ a za edi aŋ sɗik gaini seŋ n’Alaw gaini siiwa lai.

⁶Won hlai na ku na hitiriɗi wazagai hanɗa wiiɗi tawalakai ɗa, aga ku za aŋ ɗif zi sda na pɗem na wiini Yesu Kristu, n’a sumu seŋ na wiini yimi gaini hitrai na pɗamai, na ku yimaŋ gaini futini lai.

⁷Seŋ na baiya, haharai kadai gaini mirɵi na wiiɗi falakai na walakai ɗa, aga ku yimaŋ kai. Amma ku hitra suku dama aŋ sumna ɗikat wuzani arni Alaw.

⁸Buri ɓa hitrini si na mini wala ɗa a nafa wala kai, amma simni na ɗikat wuzanai arni Alaw ɗa a nafa war wala paŋ, ɵinini ha na wiini suŋfa aŋ warni suŋfa na girna gaini na wuzamu sek ɗa lai.

⁹Seŋ hanɗa a jre, ɗif a kiɗa a yimaŋ gaini giriŋi kai.

¹⁰Na ɓa mu ɗa kiyumu sumu, mu na fuɗumu was lai, hanɗa buri ɓa mu biyumu na ɗa tin Alaw na karni, n’a Ɗif-zi-kûri na wiiɗi ɗai paŋ, amma a suwa paŋ wiiɗi ɗai zi yimi.

¹¹Hanɗa a wala n’aga ku gidiɗi ɗai gaini ku hitriŋɗi lai.

¹²Hina ɗif a miisiti gawlaku kai, aga ku za aŋ ɗif na ɗai zi yimi e tili suku par, war seŋ zi miɗi, war payai, war diri, war yimi, war hilu lai.

¹³Ha sini mefeŋ na mu halaɗi ta ɗa, aga ku ŋa Ɗû na sɗik edi wiiɗi ɗai, ku sa arai zi pi, ku hitra lai.

¹⁴Ku ɵa dawaŋ gaini like zi yim n’aŋ suku kai, ni na ku navaŋ pin miɗi na wiiɗi ɗai na min Alaw gaini tikini-ti na wiiɗi n’abakai n’e tikiŋ muduku.

¹⁵Ku hiina midini wazagai hanɗa, sa suku edi min sda ɗa marwai, kapai ɗai paŋ e siɗi riyiku na wuzaku war sda ɗa.

¹⁶Ku tika hangalku suku, sin hitriku lai, ku siika war hanɗa, won hlai na ku na za maini hanɗa nɵa ɗa, aga ku kora suku tuku dama, ku kûriɗi nagai n’e ɵini muku lai.