Read Mousgoum 1 Timotewus 6 Bible Online

1 Timotewus 6 - Mousgoum bible

1 Timotewus 6

¹A zuva ɓa nagai paŋ n’e ɗa aŋ bagakai e tiliɗi epin-gezakaiɗi maiɗi ɗai n’e kiɗi aŋ nivi kol nɵa, kapai ɗai e miisi yikini Alaw kai, e miisi hitrai ɗa kaalai.

²Nagai na epin-gezakaiɗi e ɗi ɗai zi yimi ɗa, aga e siɗi hormo kai buri ɓa e ɗi tawalakaiɗi ɗi ɗa, aga a za nɵa kai; amma aga e zini piɗi gaini futini, a suwa, buri ɗai na nagai e zini piɗi na ɗa e ɗi ɗai zi yimi, gaiɗi na zi diri gara lai. Hanɗa a wazagai n’aga ku hitraŋ edi, ku gada midini lai.

³Na ɓa ɗif a hitra hitri zamai, a za pin seŋ na sɗik na wiini Epiɗ-ɗaimu Yesu Kristu gaini hitri n’a kata gaini hunai na pin Alaw kaalai ɗa,

⁴kûlûni-si a ŋulvaŋ tik, a sɗa wala ktai kai, a paya ɗa a sispai na rak-rak gaini hiy na pin wala zi yiki, hanɗa a kasi sile gaini sispai gaini tirki, hiini na meefeŋ na midiɗi marɗi,

⁵sispai n’a vada kai, arbaɗi ɗai na hiiniɗi a na ɗikat kai, e siɗi jre kai, n’e tili hunai na pin Alaw maini wala n’a kasi der nɵa

⁶A jre, hunai na pin Alaw ɗa a der n’abai gara. Na ɓa ɗif a tika hangalni ta sini wala n’aŋ tini ɗa.

⁷Buri ɓa mu kumusi wala ktai tumu warɗi yai kai, aga mu tukumu wala ktai tumu kai ɵa lai.

⁸Nɵa na ɓa mu ɗumu sumumu lai, mu wumu sumu lai ɗa, hanɗa a kiɗumu ta.

⁹Amma nagai n’e rgi warɗi buri e bindi aŋ ɗai zi farai, e kɵi war tanai, war azaw, war hiini na maafanai viya zi wili ɗai edi, n’a naka ɗai war ɓilki n’edi gaini bi n’edi lai.

¹⁰Buri dirini farai hanɗa a sirdaini meefeŋ paŋ, zamai n’e tiki mriɗi edi min ɗa, e wili edi gaigai sin yimi ɗa par, e wi siɗi kiiɗi dama war gir n’abai lai.

¹¹Amma tuku, ɗif na wiini Alaw, ku pra edi sin wazagai hanɗa par, za jre-ɗikat, ku huna pin Alaw, ku ɗiya war yimi, ku sumna war diri, war siiki, gaini hangal.

¹²Ku hitima hatam na pɗem, na wiini yimi, yima suŋfa n’a vada kai, na ku yikasi sini, na ku za zaida na pɗem edi gaini muku wuzaɗi zaidakai viya lai.

¹³Mu guduku wuzani Alaw n’a sa suŋfa wiini wazagai zi rgi paŋ, wuzani Yesu Kristu, n’a za zaida na pɗem edi gaini mini wuzani Pontius Pilatus,

¹⁴gadai na ku navaŋ ɗa, ku yimaŋ pɗem, ku sumn hilu, ɗif a muɗa meefeŋ suku kai haa sin mefeŋ n’EPIƊ-ƊAI Yesu Kristu a siŋkasi sini edi gaglai,

¹⁵Aga a siŋkaŋsi edi ɗa a Alaw war sarti n’aŋ gaini ɗiyi zaw ɗa, Ni ɗa a epini ɵeɗ, epini spak paŋ lai a Paiɗi paakai, a abaiɗi Epin-gezakaiɗi ɗai n’e ŋi paŋ lai

¹⁶Ni na ktai n’a mra kai, n’a sumna war gaglai na ɗif a kiɗa sini kai na ɗf a talaŋ duk kai, a kiɗa a talaŋ kaalai sini Ni, kol gaini spak n’a vada kai. Amen

¹⁷Ku gidiɗi zi farai na warɗi yai hanɗa buri aga e kûli siɗi kai, e tiki hiiniɗi midini farai n’a nafa kai ɗa kai, amma e tiki hiiniɗi midini Alaw n’a sumu wazagai paŋ abai, kapai mu firyumu gaini,

¹⁸kapai e zi pɗem, e zi aŋ ɗai zi farai gaini sda na pɗamai, e ɓûrwi wazagaiɗi gaiɗi na zamai, e tipi siɗi amai gaiɗi ɗai paŋ.

¹⁹Maini hanɗa nɵa aga e tipi farai pɗem ta aŋ godai buri mefeŋ na wuzamu sek, kapai e nivi suŋfa n’a vada kai na jre lai.

²⁰Tuku Timotewus, ku giɗima wazagai n’a sa war tuku, ku taɓa pin seŋ zi miɗi na baiya kadai n’a kata pin yimi kai ɗa kai, gaini sispai na wiini siɗi na jre kai

²¹Zamai n’e yimi pini ɗa, e hini yimi ɗa edi Yim na wiini Alaw a sumna gaiki.