Read Mousgoum 2 Timotewus 1 Bible Online

2 Timotewus 1 - Mousgoum bible

2 Timotewus 1

¹Paulus Apostel na wiini Kristu Yesu, pin diri na wiini Alaw pin ɵinini ha na wiini suŋfa, n’a na war Kristu Yesu,

²sin Timotewus ahiya zi diri gara, Alaw Api, gaini Epiɗ-ɗaimu Kristu Yesu, e siki yim gaini hiinini haw, gaini ɵeɗ lai.

³Mu sa tese sin Alaw na tamaiya e siiwi tini, na ta kaw mu na siiwa tini lai, maiɗi nagai nɵa; gaini hiini na hilu, duvuk gaini girvudi paŋ, won hlai na mu siiwa, mu yika yikiku war ma kûreɗ-kûreɗ.

⁴Mu firya ɓa sai mu halaɗi aŋ ɗuguluku, mada a na kɵa gaini tuwi na wiiku kapai mu va gaini firiyi;

⁵mada a na kɵa pra gaini yimi na jre n’aŋ warku, n’a tikasi pini siɗi aduku Lois par, siɗi amuku Eunike ɗaw, mu sɗa edi jre ɓa a na warku tuku lai.

⁶Buri nɵa, mu dara mu ɵuku muduku ɓa ku yiba afu na wiini like zi yim amai, na wiini like na wiini Alaw na ku navaŋ pin tikini-ta na muduku.

⁷Buri ɓa Seze n’Alaw a suŋmu ɗa, a seze zi hunai kai, amma a seze zi gdaŋ, zi diri, zi ziyi seŋ gaini hangal.

⁸Ku za siyer buri muɗa edi midini Epiɗ-ɗaimu kai, buriya ta na m’aŋ warni jaɓ ɗa kaalai, amma tapa gaya war gir burini labar na pɗem pin spak na wiini Alaw.

⁹N'a kurumusi edi, n’a yikumusi gaini yiki na sɗik, pin sda na wiimu kai, amma pin hiini n’a rgaŋ warni, pin yim n’a saŋ sumu war Kristu Yesu haa hlai n’a vada kai par.

¹⁰Yim hanɗa a siŋka li edi sumu tiyana, won hlai na ɗif zi kûri na wiimu, Kristu Yesu, a siŋkasi sini edi n’a vada mri edi na gaini labar na pɗem ɗa a siŋkasi suŋfa gaini ɓilki n’edi kai ɗa edi gaglai.

¹¹Buri labar na pɗem hanɗa, ta mu vara li edi aŋ ɗif zi ɓiki seŋ, aŋ apostel, aŋ ɗif zi hitriɗi ɗai lai.

¹²Mu na sɗa gir na ɗa burini hanɗa lai, amma siyer ara kai, buri mu sɗa ni na mu yima warni ya, mu yima jre ɓa, ni ɗa spakni a na buri a giɗima wala n’a sa war ta, ha sin mefeŋ ni ta.

¹³Seŋ na pɗamai na ku ɵinaŋ ma par ɗa, yimaŋ aŋ wala na ku tala sini par, ku giɗimaŋ war yimi, war diri n’a na war Yesu Kristu.

¹⁴Giɗima wazagai na pɗamai n’a sa war tuku ɗa, Seze-sɗik n’aŋ warmu aga a zina puku war hanɗa.

¹⁵Ku sɗa ɓa nagai na war Asiya paŋ e hiniŋa edi, Fugelus gaini Hermogenes e ɗa arbaɗi ɗai hanɗa lai.

¹⁶A zuva ɓa Epiɗ-ɗai a za yim siɗi pakataini Onesiforus, buri a saŋa arai zi pi azi viya, a za siyer burini jaɓ na m’aŋ warni kaalai.

¹⁷Won hlai n’a halasi war Rome ɗa, a payaŋa witaw tar, a navaŋa lai.

¹⁸A zuva ɓa war mefeŋ ni ɗa, Epiɗ-ɗai a hinaŋ aŋ nava yim wuzani arni Epiɗ-ɗai, tuku mal ku sɗa hanɗa, ku sûwiɗi ɗai paŋ, ɓa a zina pa viya war Efesus.