Read Mousgoum 2 Timotewus 2 Bible Online

2 Timotewus 2 - Mousgoum bible

2 Timotewus 2

¹Nɵa ɗa, tuku ahiya, ku ɗiya pɗem war yim n’a na war Yesu Kristu.

²Wazagai na ku ɵinaŋ ma par wuzaɗi zaidakai viya, ku siŋɗi wiiɗi ɗai na jrekai, na nagai lai e kiɗi e hitriŋɗi wiiɗi ɗai zamai.

³Ku tapa gaya war gir maini askar na pɗem na wiini Kristu Yesu nɵa.

⁴Askar n’aŋ war sdani askar ɗa a sɗa aŋ wa sini war seŋ zamai zamai kai, kapai a sini firyi wiini ni n’a tikaŋ war sda ɗa.

⁵Ɗif n’a daba was ɗa, a sɗa aŋ niviti bogorai ɗa sai na ɓa a daba was li maini n’a na ɗa nɵa.

⁶Ɗif zi hirim n’a na sɗa gir ɗa, a ni aga a nava alini luwuŋ avut ɗa.

⁷Na mu muɗuŋku na ɗa, hiinaŋ pɗem, Epiɗ-ɗai aga a suku yel war wazagai paŋ.

⁸Hina muduku a kɵa gaini Yesu Kristu, n’a ɵiyasi amai arbaɗi zi mri par, pin labar na pɗem na mu na ɓakaŋ ɗa, a wa war pinzibani David.

⁹Labar na pɗem na mu na sɗa gir burini, ha e wiŋa jaɓ ma ta, maini ɗif na meefeŋ nɵa, amma seŋn’Alaw ɗa aŋ warni jaɓ kai.

¹⁰Nɵa ɗa, mu liba paŋ na ɗa buriɗi zi viri-n’edi, kapai nagai lai e gi sin kûri na war Kristu Yesu gaiɗi abai na te vada kai ɗa lai.

¹¹Seŋ hanɗa a jre: na ɓa mu ɗuma gaini Ni ɗa, aga mu sumnumu karmu gaini ni lai,

¹²na ɓa mu siikumu li war yimi ɗa, aga mu ŋumu gaini ni lai, na ɓa mu muɗumu li ɓa mu suɗuŋmu kai ɗa, ni aga a muɗa ɓa a suɗumu kaalai.

¹³Na ɓa mu ɗiyumo war jre kai ɗa ni ɗa a na ɗa jre ɵa, buri ɓa n’a muɗaŋ ɗa a zaŋ ɗa maini n’a na ɗa ɵa.

¹⁴Aga ku ɵiɗi midiɗi ɗai maini nɵa, ku gidiɗi miɗi wuzani Alaw buri aga e sispi pini arbaɗi marɗi pin wala zi yiki ɗa kai, buri a za wala na pɗem siɗi kai, a tuuriɗi edi ɗa e ɗi nagai n’e ɵiniŋ ɗa.

¹⁵Ku fuɗa was aŋ ɗiya wuzani Alaw maini ɗif na gai titimi tam nɵa, ɗif zi sda n’a kiɗa a tika siyer kai, n’a hitra seŋ na jre edi woɗi futini ɗikat.

¹⁶Seŋ zi miɗi na baiya kadai na haharai ɗa, ku hinaŋ a niyasi muku par kai, nagai n’e zi hanɗa kureɗ, e hili wuzaɗi sek sek sini meefeŋ.

¹⁷Seŋɗi a suma hlai maini guɗoŋ n’a luma neŋni ɗif nɵa, Himenewus gaini Filetus e ɗa arbaɗi ɗai hanɗa.

¹⁸Nagai ɗa e vigi edi ɵimani jre ɗaw, e miɗiɗi wiiɗi ɗai ɓa ɵiyi n’amai ɗa a za ya, e ki ɗai zamai e hini yimiɗi edi.

¹⁹Paŋ ktai ezini dalam n’Alaw a toroŋ azumai gai futini ɗa, wala a muguzaŋ kai, seŋ n’aŋ gaini ɗû a amai sini a na maini nɵa Epiɗ-ɗai siɗiɗi nagai na wiini ya, pra ɓa asiya asiya paŋ n’a yika yikini Epiɗ-ɗai ɗa aga a yima sini edi sin meefeŋ par.

²⁰Aha warɗi pakatai n’amai ɗa, a na ɗa a tasa zi or gaini zi arzaŋ kiini kai, amma zi luwuŋ gaini z'afti a na lai, na zamai ɗa e zi gaini ɗa a sda na pɗamai, na zamai e zi gaini ɗa a sda na pɗamai kaalai.

²¹Na ɓa ɗif a za sini edi hilu a tapa gaiɗ ɗai hanɗa kaalai ɗa aga a za aŋ tasa burini sda na pɗem, na sɗik, n’epin-gezani a kiɗa a za sda gaini, a kiɗa burini sda na pɗamai paŋ.

²²Pra edi wuzani diri na meefeŋ na wiiɗi gaula, amma ku paya war jre-ɗikat, war yimi, war diri, war ɵeɗ gaiɗi nagai n’e yiki yikini Epiɗ-ɗai gaini agul na hilu.

²³Amma sispai na baiya kadai zi duli ɗa, ku ɗiya sini kai, buri ɓa a kasi hiy.

²⁴Kadai tiɓ ɗa, ɗif zi sda na wiini Epiɗ-ɗai ɗa aza hiy kai, a sumna gaini hangal gaiɗi ɗai paŋ, a kiɗa aŋ hitriɗi ɗai, a yima seŋ na meefeŋ sini lai,

²⁵Nagai n’e pi seŋ arni ɗa, a gidiɗi gaini hangal, Alaw a kiɗaa wiyiɗisi hiiniɗi sini himi aŋ gi sin siɗi na jre lai.

²⁶Aŋ wiyisi war hiiniɗi na pɗem, aŋ prisi edi min azaw na wiini mat, n’a yimiɗi aŋ miliɗi azumai pin diri na wiini lai.