Read Mousgoum 2 Timotewus 4 Bible Online

2 Timotewus 4 - Mousgoum bible

2 Timotewus 4

¹Mu muɗuku na ɗa wuzani Alaw, wuzani Kristu Yesu, n’aga a ɗûkliti sariya wiiɗi ɗai na karɗi gaiɗi ɗai zi mri lai, war siŋki n’aga a siŋkasi sini edi gaglai gaiɗi pai na wiini lai.

²Ɓaka seŋ edi, hlai paŋ ku muɗa paŋ, koo ɓa a hlai na pɗem, a na meefeŋ ɗi kal, caka hiini na maafanai edi, gada, sa arai zi pi, war hitraiku ɗa, ku tika hangalku, azumai ta.

³Buri mefeŋ aga a cosi, na ɗai aga e diri aŋ ɵini hitri na gaini futini kir kai, amma pin diri na wiiɗi, pin ɵimaɗi n’a limiɗi aŋ ɵini seŋ lai ɗa, aga e tiki piɗi aŋ piyi gaiɗi tamai zi hitri viya viya.

⁴Aga e jigi ɵimaɗi min jre kir kai, aga e bindi sin seŋ na baiya kadai sek.

⁵Amma tuku ɗa, ku sumna gaini hangal war wazagai paŋ, liba gir ɗa, ɓaka labar na pɗem, za sda n’a sa tuku zi evangelist gai futini lai.

⁶Buri ɓa taɗa, mu ma azumai ya maini ɓaka zi vin nɵa, sarti na wiini hiliŋa a cosi ya.

⁷Mu hitima hatam na pɗem, mu vada luwiŋa ya, mu giɗima yimiŋa ya lai.

⁸Tiyana ɗa, bogorai na wiini jre-ɗikat te na baiyaŋa, Epiɗ-ɗai, ɗif zi ɗûkliti sariya na jre ɗa, aga a sitaŋa war mefeŋ ni ɗa, wiya ta ktai kai, amma wiiɗi nagai paŋ n’e diri gizini n’edi war gaglai.

⁹Piyasi futi aŋ halasi sa witaw.

¹⁰Buri Demas a hinaŋa edi mak, pin nem na wiiɗi duniya na tiyana, a hala a Tesalonike ɗaw, Kresens a hala war Galatiya ɗaw, Titus ɗe a hala war Dalmatiya ɗaw lai.

¹¹Aŋ gaya ɗa a Lukas kiini ktai, ku yimasi Markus puku kaai, buri a ɗif n’a kiɗa a zina pa war ɵeŋ n’Alaw pɗem.

¹²Mu ɵinaɗi Tikikus war Efesus su.

¹³Won hlai na ku na halasi, ku militiŋasi kaputŋa na mu hinitisi war Trowas ahani Karpus ɗa tuku yaw, gaini maktuɓ ɗa lai, a suwa paŋ maktuɓ z'amur.

¹⁴Aleksander, ɗif zi fai-fai a zaŋa meefeŋ viya gara, Epiɗ-ɗai aga a za sini pini sdani.

¹⁵Tuku lai ku za hangal gaini, buri a faka amai sin seŋyi gdaŋ gara.

¹⁶Avut n’e kiŋa wuzaɗi sariya aŋ zilbiŋa ma ɗa, ɗif a hala gaya kai, ɗai paŋ e hiniŋa edi, mu tikiŋɗi midiɗi aŋ meefeŋ kai.

¹⁷Aŋ gaya ɗa a Epiɗ-ɗai, a saŋa spak, kapai gaya ta ɗa seŋ a ɓaka edi gai futini, pinziba na zamaiɗa paŋ e ɵiniŋ lai, a kurɗaŋasi edi mini gurnai par lai.

¹⁸Epiɗ-ɗai aga a plaŋa edi mini sda na maafanai paŋ par, aga a kaŋa warɗi paini n’amai. Kol ɗa a wiini haa hlai n’a vada kai, n’a vada kai! Amen.

¹⁹Ku ɵiɓa wuti wiiɗi Priskila gaini Akwilas gaiɗi ɗai n’ahani Onesiforus ɗa lai.

²⁰Erastus a hinasi war Korinte, mu hinasi Trofimus veglek war Miletus.

²¹Paya futi aŋ halasi sa wuzaɗi amsai par, Ebulus, Pudens gaini Linus gaini Klodia gaiɗi tawalakai paŋ e ɗa ɵibukuɗi wuti.

²²Epiɗ-ɗai a za gaiku, war hiiniku. Yim a sumna gaiki.