Read Mousgoum Titus 1 Bible Online

Titus 1 - Mousgoum bible

Titus 1

¹Paulus, ɗif zi sda na wiini Alaw, apostel na wiini Yesu Kristu, burini yimi na wiiɗi nagai n’Alaw viriɗi edi ɗa, pin siɗi na jre n’a kata gaini hunai na pin Alaw lai,

²pin biyi-na-pin-ɵeɗ na wiini suŋfa n’a vada kai, - suŋfa hanɗa, Alaw n’a za eles kai ɗa a za ha midini ɗa haa gamai par,

³war sartini n’aŋ gai ɗiyi ta ɗa, a siŋka seŋni edi war ɓikini seŋ n’a sa war ta, pin miɗi na wiini Alaw, Ɗif zi kûri na wiimu,

⁴Sin Titus, ahiya na jre, pin yimimu na ktai: Alaw Api, gaini Yesu Kristu, Ɗif zi kûri na wiimu e suku yum gaini ɵeɗ.

⁵Na ɓa mu hunukusi war Kreta, a na buri ku zizina wazagai n’a hinasi n’a zizina kai ɗa gaini futini, ku mula ɗai zi giɗimi war fuŋ n’abakai paŋ, maini na ta dama mu guduku midini nɵa.

⁶Ɗif n’aga ku tikaŋ ɗa, a ɗif na seŋ meefeŋ sini kai, na munini ktai, n’alini e ɗi ɗai zi yimi, na ɗif a pa seŋ na wiini maɵara siɗi kai, ɵinini gat-kai siɗi kaalai.

⁷Ɗif si giɗimi ɗa, aga a za ɗa a ɗif na seŋ na meefeŋ sini kai, buri ɓa ni a ɗif zi giɗimi wazagai na wiini Alaw, a ɗif n’a kola sini kai, n’a za hiy witaw ɗa kai, a ma mrini gai tiki edi pin sul ɗa kai, a zi dibi was kai, a na paya der na gai futini kai ɗa kaalai.

⁸Amma a ɗif n’a yima ɗai sini, a firya sda na pɗamai, na kûlûni-si warni kai, na jre, na sɗik, ɗif n’a kiɗa a ɗala sini,

⁹a ɗif n’a yima seŋ na jre ɗa maini n’a hitraŋ ɗa nɵa, kapai a sɗa aŋ sa arai zi pi gaini hitri na gai futini, a rɗa amai midiɗi nagai n’e piyi sispai ɗa lai.

¹⁰Buri nɵa, ɗai zi ɵini Gat kai ɗa e ɗa viya, n’e ɓiki seŋ n’a baiya kadai, zi duuliɗi ɗai a suwa paŋ arbaɗi Yudeyakai, zi yimi ɗa,

¹¹sai ku dugiɗi miɗi, buri e turli pakatai zamai viya amai, e hitriɗi wazagai na gai futini kai, aŋ piyi der na gai futini kai.

¹²Ɗif ktai arbaɗi, zi yel a muɗa maini nɵa: Kretekai e ɗi ɗai n’alesɗi a vada kai, e ɗi wazagai na buza na sabapai, ɗai na goromai na faalakai.

¹³Zaida hanɗa a jre, buri nɵa ku gidiɗi gaini gdaŋ, kapai e simni pɗem war yimi,

¹⁴kapai e tiɓi pin seŋ na baiya kadai na wiiɗi Yudeyakai kai, gaini gdai na wiiɗi ɗi n’e hini jre ɗa edi kaalai.

¹⁵Wazagai paŋ a hilu buriɗi nagai n’e ɗa hilu, amma buriɗi nagai na haharai gaiɗi zi yimi-kai ɗa, wala ktai na hilu buriɗi aŋ kai, hiiniɗi gaini yelɗi paŋ a na hi-hir.

¹⁶E miɗi ɓa e siɗi Alaw ya, amma sdaɗi ɗa a siŋka ɓa e siɗiŋ kai, nagai e ɗa haharai, e ɵini Gat kai, e kiɗi e zi sda na pɗem ktai kaalai.