Read Mousgoum Titus 2 Bible Online

Titus 2 - Mousgoum bible

Titus 2

¹Amma tuku ɗa, ku muɗa ɗa a wala n’a kata pin hitri na jre.

²A zuva ɓa, ɗai na walakai ɗa, e simni gaini hangal e si hormo wiini siɗi, e kûli siɗi kai, pɗamai war yimi, war diri war siiki lai.

³A zuva ɓa falakai na walakai lai e piyi payai n’a kata siɗi na sɗik ɗa, aga e gini marɗi kai, e bindi aŋ bagakaini sul kaalai, aga e hitri edi a sda na pɗamai,

⁴kapai e hitriɗi wiiɗi falakai na drakai ɗa, aŋ diriɗi maɵagaiɗi gaiɗi aliɗi.

⁵aŋ kûli siɗi kai, aŋ simni hilu, aŋ z sda n’aha gai futini, aŋ zi pɗem, aŋ gidi piɗi maɵagaiɗi, kapai ɗif a muɗa meefeŋ sin seŋ n’Alaw kai.

⁶Nɵa lai, ku hitriɗi gawlakai ɗa aŋ kûli siɗi kai.

⁷War wazagai paŋ tuku dama aga ku za suku aŋ ɗif na ɗai e tili sini war sda na pɗamai lai. Ku hitra hitri na hilu, na ɗif a sɗa aŋ miisaŋ kai.

⁸Ku muɗa seŋ na jre, na ɗif a kiɗa aŋ nava wala na meefeŋ warni kai, kapai gawmu a tika siyer, a nava waa ktai na meefeŋ aŋ muɗa muudumu kaalai.

⁹Ɗai zi sda aga e ɵini piɗi epin-gesakaiɗi ɗa war wazagai paŋ, e zi siɗi arɗi pɗamai, e sispi gaiɗi kai.

¹⁰Aga e tiki walaɗi ktai kai; amma aga e zi siɗi kureɗ aŋ ɗai na jreɗi a na, kapai e sini hormo wiini hitri na wiini Alaw, Ɗif-si-kûri na wiimu war wazagai paŋ.

¹¹Burini yum na wiini Alaw, n’a sa kûri wiiɗi ɗai paŋ ɗa, a siŋkasi edi ya.

¹²A hitrumu aŋ bula edi sini meefeŋ, gaini wazagai na pɗamai na wiiɗi yai hanɗa, aŋ piyumu tiyanagaini haŋgal war jre, war hunai na pin Alaw lai,

¹³won hlai na mu ɗumu aŋ biyumu mefeŋ n’abai n’aga a halasi, gaiɗi abai na wiini Alaw na wiimu n’abai, Ɗif zi kûri na wiimu Yesu Kristu, n’aga a siŋkasi edi gaglai.

¹⁴A sa sini dama edi burimu, kapai a wurumusi edi war meefeŋ paŋ par, kapai a zumu edi aŋ ɗai na hilu na wiini, gaini midini dama, n’e si siɗi edi min sda na pɗamai.

¹⁵Aga ku muɗa ɗa maini hanɗa nɵa, ku sa arai zi pi ɗa maini hanɗa nɵa, ku gada maini hanɗa nɵa, gaini gdaŋ, ku hina ɗif a miisuku kai.