Read Mousgoum Titus 3 Bible Online

Titus 3 - Mousgoum bible

Titus 3

¹Ku ɵiɗi midiɗi, buri e gidi piɗi paakai gaiɗi n’abakai, buri e ɵini piɗi, e zizini siɗi burini sda na pɗamai paŋ.

²Buri e miɗi meefeŋ sini ɗif kai, simni ɵeɗ, e libi seŋ, e siŋki hangalɗi edi wuzani arɗi ɗai paŋ.

³Tumu lai, mu ɗumusi ka avut par tatalakai, mu ɵunumu Gat kai, gaini wili edi, bagakaini suuna gaini dirini neŋ-si, zamai zamai, mu piyumu war zini meefeŋ, mu ɗumusi ka haharai, mu firyumu marmu kaalai.

⁴Amma, won hlai na yum na wiini Alaw, Ɗif-si kûri na wiimu, gaini diri n’a diriɗi ɗai gaini a siŋka edi,

⁵- hanɗa buri ɓa mu zumu sda na jre ɗa kai, amma burini yum na wiini dama - a kurumu pin mi na wunu wii na hehe gaini bindi na hehe n’a na sini Seze-sɗik par,

⁶Seze hanɗa Alaw a maŋ mudumu abai, gaini Yesu Kristu, Ɗif-si-kûri na wiimu.

⁷Kapai won hlai na mu zumu li edi jre pin yum na wiini ɗa, mu bundumu aŋ zi mili bulum pin biyi na pin ɵeɗ, na wiini suŋfa n’a vada kai.

⁸Seŋ hanɗa a jre, mu firya ɓa ku muɗa edi gaini gdaŋ, kapai nagai paŋ n’e t iki yimiɗi mdini Alaw ɗa, e piyi aŋ riyi wuzaɗi war sda na pɗem. Hanɗa, a wala na pɗem, n’a nafa lai buriɗi ɗai ɗa.

⁹Amma zilbi na nafa kai, gaini girini pinziba, sispai na pin gadai na wiini Musus ɗa lai, ku ɗiya sini kai, buri hanɗa a na meere kadai, a nafa wala kai.

¹⁰Ni n’a hitra hitri na jre kai ɗa, ku zini zaida azi ktai, azi sulu, na ɓa a ɵina kai ɗa, ku tikini pini edi.

¹¹Buri ɓa ɗif na mai hanɗa ɵa ɗa, aŋ warɗi futi kir kai, a za na ɗa a meefeŋ lai, a kûti midini na ɗa te sariya,

¹²Won hlai na mu ɵinaɗi li Artemas zaw Tikikus suku ɗa, ku payasi futi aŋ halasi sa war Nikopolis, buri mu firya ɓa mu ziti amsai ɗa woni.

¹³Zenas, ɗif n’a sɗa gadai gara, gaini Apolos ɗa, aga ku siɗi wazagai na jaaɗi aŋ sini, burini morkoiɗi ɗa, kapai wala ktai maa a kiɗihiɗi war futi kai.

¹⁴A pɗem ɓa nagai na wiimu e hitri aŋ zi sda na pɗamai gaini futini lai, aŋ zini piɗi ɗi na hajaɗi a sɗa aŋ baiya kai ɗa lai, kapai nagai e kiɗi aŋ nifi war wazagai zamai zamai lai.

¹⁵Nagai n’e ɗa gaya ɗa paŋ e ɵiɓuku wuti, ku ɵiɓiɗi wuti wiiɗi marmakaimu na war yimi ɗa lai. Yum a sumna gaiki paŋ.