Read Mousgoum Hebrekai 10 Bible Online

Hebrekai 10 - Mousgoum bible

Hebrekai 10

¹Buri ɓa gadai ɗa a sezeni wazagai n’a na gizi, a wala n’a ziŋga wazagai hanɗa kal kal kai, buri nɵa a kiɗa a kiɗi nagai n’e hilisi sini ɗa aŋ vi amai war pɗem kai, buri ɓa e zi ɗa a ɓaka ni ɵa yaw, buza buza paŋ.

²Na ɓa ɵa kai ɗa, sumu pini ɓka ɵa tiɓ aŋ zi ɵa ɗi? Nagai n’e siiwi Alaw gaini hanɗa ɵa ɗa, a na ta ɗa e zi edi aŋ hilu ya azi ktai, hiinini tuwur midiɗi kir kaalai.

³Amma gaini zini ɓaka hanɗa, e ɵiɗi midiɗi ɗai burini tuwur buza buza paŋ.

⁴Buri ɓa felni garakai gaini haakai ɗa a kiɗa a tika tuwur edi kai zaŋ.

⁵Buri nɵa, won hlai na Kristu a halasi warɗi yai ɗa a muɗa maini nɵa: Tuku ku firya ɓaka kai, like kaalai amma ku zizina si buriya

⁶tuku kuyma ɓaka zi yi kaalai, ɓaka burini tuwur kaalai,

⁷nɵa mu muɗa: mu na halaɗi, -warni maktuɓ zi fiɗɗi aŋ gai ɗû mada ɓa: aŋ za diriku Alaw,

⁸a tika pini a muɗa ɗai ɓa: Ɓaka gaini like gaini ɓaka zi yi, gaini ɓaka na burini tuwur ɗa, tuku ku firyaŋ kai, ku yimaŋ kaalai, paŋ ktai a za ɗa pin gadai ɗa lai.

⁹Asakal par a muɗa pra: mu halasi na ɗa aŋ za diriku, aŋ fuɗa hiini n’avut ɗa edi, aŋ bundaŋ gaini n’ag'aŋ sulu.

¹⁰Tumu mu bundumu edi sɗik gaini ɓaka na wiini sini Yesu, n’a zaŋ azi ktai war diri hanɗa.

¹¹Pai zi ɓaka paŋ a ɗiya war hlaini zi sda, mefeŋ mefeŋ paŋ buri a za sda na wiini, aŋ za ɓaka ni dama ɵa ɵa azi viya lai, a ɓaka n’a kiɗa aŋ vada tuwur edi kaalai.

¹²Amma ni ɗa asakal n’a za ɓaka burini tuwur azi ktai, a sumna azumai gamai, war hlai zi hormo na wiini Alaw.

¹³A baiya na ɗa ɓa gawni e si war tini, kapai a ziɗi aŋ wala n’e niyi amai midini paramaiɗi pai gaini.

¹⁴Gaini ɓaka n’a zaŋ azi ktai ɗa, a ziɗi edi gaini vi amai war pɗem haa kureɗ, nagai n’e zi edi aŋ sɗik.

¹⁵Hanɗa a wala na Sezesɗik a na muɗaŋ edi sumu lai. Buri asakal n’a muɗa ɓa:

¹⁶Bonu n’aa mu zaŋ gaiɗi asaka mefeŋ hanɗa par a na maini nɵa: A muɗaŋ a Epiɗ-ɗai Aga mu wa gadai na wiya war agulɗi, aga mu ɗoŋ war hiiniɗi lai.

¹⁷Aga mu hina mada a kɵa gaini tuwur na wiiɗi duk kai zaŋ, gaini meefeŋ na wiiɗi kaalai.

¹⁸Nɵa ɗa, won hlai na ni burini tuwur a na ɗa, ɓaka na burini tuwur ɗa a za kir kai.

¹⁹Nɵa ɗa tawlakai, tumu mu suɗumu edi gaglai ɓa mu kuɗumu buri mu niyumu amlai war hlai na sɗik gaini ɗili mudumu kai, war fel na wiini Yesu.

²⁰Te futi n’a ɓisiti burimu, aŋ futi na hahai, na karɗi lai, arbani sapa na gaini giŋi amai, a dara muɗa war neŋ-sini.

²¹Nɵa, mu ɗumu gaini pai zi ɓaka n’abai n’e tikiŋ midini dalamni Alaw.

²²Nɵa turumusi sini gaiɗi agul na jre, gaini yimi na ktai, agulmu gaini mi edi hilu, hiini na meefeŋ warɗi kai, sumu gaini mi edi gaini yem na hilu.

²³Biyi-na-pin-ɵeɗ na wiimu ɗa, aga mu suŋkuŋmu edi wuzani arɗi ɗai papɗak, wuzamu sek sek, mu plumu mumu kai, buri ni n’a za ɵinini-ha ɗa a ɗif n’a za eles kai.

²⁴Aga mu tukumu hangalmu siɗi marmu, kapai mu hugumu marmu aŋ zi diri siɗi marmu, aŋ za sda na pɗamai lai.

²⁵Mu hinumu tipi na wiimu edi maiɗi na marmu na zamai e ɗa ziŋ ɗa ɵa kai, amma mu zunumu piɗi marmu arbaɗi marmu, ki zi hanɗa won hlai na ki tili mefeŋ a na halasi gobi ɗa.

²⁶Na ɓa mu zumu tuwur pin dirimu, asakal na mu suɗumu jre ya ɗa, ɓaka na burini tuwur a hina kir kai.

²⁷A hiɗa ɗa a bayai zi mili hunai n’abai na wiiɗisariya, gaini afu n’aga a yiɗi nagai n’e ɵini Gat kai.

²⁸Na ɓa ɗif a ha li amai midini gadai na wiini Musus ɗa, pin zaidaɗi ɗai sulu zaw hu a nava fiɗi n’edi gaini hiinini haw kai.

²⁹Ki hiini ɓa vrak na meefeŋ, n’aga a sa sini ni n’aga a kirpa Ahini Alaw azumai pin ezini, n’aga a yima fel na wiini bonu n’a za ɗai edi sɗik gaini aŋ wala kadai, n’aga a tirka seze zi yum lai ɗa, aga a za ɗa abai a suwa kai ɗi?

³⁰Buri mu suɗumu ni n’a muɗa ɓa: Mu ziti sariya mu ta, mu sa vrak na meefeŋ ɗa mu ta lai. A muɗa pra: Epiɗ-ɗai aga a ziti sariya wiiɗi ɗaini.

³¹A gir gara na ɓa ɗif a kɵa war bobur tini Alaw na karni.

³²Ki hini miɗiki a kɵa gaini mefeŋ n’avut, n’arki a mala edi woni ɗa, na tiki ki hitimi hatam n’abai na gir gara lai.

³³War gal zamai ɗa, e yimiki maini wala n’e ɵi dawaŋ gaini nɵa, e tirkiki, e ziki gir, war gal zamai ɗa, tiki ki tipi ktai gaiɗi nagai n’e ɗa ziɗi gir mai hanɗa ɵa ɗa.

³⁴Tikiɗa, gir na ɗai e ɗa siɗiŋ war daŋgai ɗa, a fiɗiki siki, ki hiniɗi ɗai e mili wazagaiki gaini firyi, buri ki siɗi ya ɓa, derki na pɗem n’a suwa a na, n’a sɗa aŋ vada kai.

³⁵Buri nɵa ki hini yimi na wiiki edi kai, buri aŋ gaini vrak n’abai pini.

³⁶Buri nza tiki aga ki siiki war hangal, buri won hlai na ki zi diriɗi Alaw ya, aga ki nivi wala n’a za ha midini.

³⁷Buri ɗû na sɗk a muɗa maini nɵa: mefeŋ a hina agwi, -agwi kadai- ni n’aga a halasi ɗa, aga a halasi: aga a safasi kai.

³⁸Ɗif na jre ɗa aga a sumna karni pin yimi, amma na ɓa a waya li asakal ɗa, suŋfaɗi agula aga a firya burini kai.

³⁹Tumu mu ɗumu arbaɗi nagai n’e wiyi asakal aŋ bi edi ɗa kai, amma arbaɗi nagai zi yimi aŋ kora suŋfamu.