Read Mousgoum Hebrekai 2 Bible Online

Hebrekai 2 - Mousgoum bible

Hebrekai 2

¹Buri nɵa aga mu zumu hangal abai a suwa gaini seŋ na mu ɵinuŋmu ɗa, ɵa kai ɗa aga mu wulumu edi.

²Na ɓa seŋ n’a muɗa miɗi ɗai zi ɵeŋ na war fuŋ-n’Alaw par ɗa a za aŋ jre ɗa, na ɓa hi n’amai midini gadai gaini ɵinini Gat kai paŋ ɗa a nva vrak na pini ya lai ɗa,

³tumu ɗa seŋ aga a nuvumu kaw ɗa maɵa maɵa ɗa? Na ɓa mu tukumu hangalmu sini kûri n’abai na maini hanɗa ɵa kai, n’a tika pini aŋ muɗaŋsi edi sumu ɗa a Epiɗ-ɗai, na nagai n’e ɵiniŋ ɗa e siŋkuŋmu ei ɓa hanɗa a jre lai ɗa.

⁴Alaw a sa spak wiini zaidaɗi n’e ziŋ war wazagai zi siŋki, zi hiila, gaini pinzibani hilla na kiini kiini, gaini ɓraw n’edi na wiini like na wiini seze sɗik pin dirini lai ɗa.

⁵Amma yai na wuzamu sek na mu ɗuma muɗumu gaiɗi na ɗa, a sitiɗi war tiɗi ɗai zi ɵeŋ na war fuŋ n’Alaw ɓa kapai a ŋa midiɗi kai.

⁶Amma ɗif ktai a muɗa seŋ woni hlai ktai maini nɵa: Ɗif tiɓ ɗa asiya ktai ɗa na kapai mada a kɵa gaini ɗa?, Ɗif murɗek ɗa asiya ɗa, na kapai arku pini ɵa ca ɗa?

⁷Ku zaŋ ɗa agwi agwi siɗi ɗai zi ɵeŋ na war fuŋ-n’Alaw ɗa. Ku sitini abai gaini kol lai

⁸Ku mula wazagai paŋ azumai pin bobur n’ezini Won hlai n’a mula wazagai paŋ azumai pini ɗa, wala ktai n’a hina, n’a waŋ azumai pini kai, aŋ kai. Amma tiyana ɗa wazagai paŋ a na azumai pini, mu suɗumu ɵa kai.

⁹Amma tiyana ɗa mu tulumu Yesu, ni n’a za ɗa agwi agwi siɗi ɗai zi ɵeŋ na war fuŋ-n’Alaw ɗa, warɗi abai gaini kol burini mri n’a mra ɗa, nɵa pin yum na wiini Alaw a tetema mri ɗa buriɗi ɗai paŋ.

¹⁰Buri na ɓa, Ni na wazagai paŋ a wiini, wazagai paŋ a za gaini ni lai, a dara a ka ɗai viya siɗi abai. A pɗem ɓa a va paŋ amai war gir, Ni n’a payasi futi zi kûri na wiiɗi.

¹¹Buri ni n’a za ɗai edi aŋ sɗik gaiɗi nagai n’e zi edi sɗik ya lai epiɗi ktai, buri hanɗa siyer arni kai, buri a yikiɗi aŋ tawalakaini.

¹²Won hlai n’a muɗa ɓa: Mu dara mu muɗa edi muduku siɗi tawalakaya, mu dara mu kuluku arbani vokɗi tipi.

¹³A muɗa pra ɓa: Ta ɗa aga mu pɵa ɗa midini. Katawai pra, M'an na, ta gaiɗi ali n’Alaw a siɗiŋa ɗa.

¹⁴Buri nɵa, ali hanɗa paŋ ɗa, wala n’a tipiɗi a na: e ɗa war neŋ-si gaini fel, Ni lai a tika si na wiiɗi nagai, kapai gaini mrni a tuura ni na spak a nafu war tini ɗa edi, a dara muɗa mat.

¹⁵Kapai a piliɗisi edi nagai paŋ n’e simni war bege haa sin mriɗi ta wuzani hunai na wuzani mri.

¹⁶A na ɵa, a zina ɗa piɗi ɗai zi ɵeŋ na war fuŋ-n’Alaw kai, amma a zina pini pinzibani Abraham.

¹⁷Buri nɵa, a bunda sini maiɗi tawalakaini nɵa war wazagai paŋ, kapai a bunda aŋ pai zi ɓaka n’abai na gaini hiini haw warni, na jre lai, war sda na wiini Alaw, kapai a za ɓaka burin tuwur na wiiɗi ɗai.

¹⁸Buri na ɓa Ni dama a sɗa gir won hlai n’a nava titimi, nɵa lai, a kiɗa buri a zina piɗi nagai n’e ɗa war titimi lai.