Read Mousgoum Hebrekai 4 Bible Online

Hebrekai 4 - Mousgoum bible

Hebrekai 4

¹Buri nɵa, mu zumu hangal na ɓa ɵinini-ha na wiini niyi n’amlai war si n’amla a na hai ɗa, arbaki ɗa ɗif aga a tala sini ɓa a hina asakal mak kai.

²Buri ɓa labar na pɗem ɗa a ɓaka sumu gai ɓiki maini na siɗi nagai nɵa lai. Amma seŋ n’e ɵiniŋ ɗa a za wala na pɗem ktai maa siɗi kai. Buri ɓa nagai e tipi ktai war yimi gaiɗi nagai n’e ɵini seŋ hanɗa kai ɗa.

³Amma tumu na mu yimumu ɗa aga mu niyumu war si n’amla n’a muɗa gaini ɓa: Mu ha wala ma war hiyŋa ɓa aga e niyi war si n’amla na wiya duk kai, paŋ ktai sda na buri hanɗa a za haa war piɗi yai zi tiki par.

⁴War hlai zamai a muɗa midini mefeŋ n’ag'aŋ muguzak ɗa maini nɵa: Alaw a vada sdani paŋ, war mefeŋ n’ag'aŋ muguzak ɗa sini a mla.

⁵War hlai zamai pra a muɗa: aga e niyi war si n’amla na wiya duk kai.

⁶Nɵa na ɓa futi te sa siɗi na zamai buri e niyi amlai war si n’amla ɗa, paŋ ktai nagai n’e nivi labar na pɗem avut, e niyi amlai warni kai, buri yimi kai na wiiɗi ɗa,

⁷Alaw a ɗiya mefeŋ ktai zaw pra, "girna" - mefeŋ yaw asakal par a muɗa mini David maini n’a muɗasi amai par ɗa ɵa ɓa: girna, na ɓa ki ɵini wulani Alaw li ɗa, ki bindi agulki gdaŋ kai.

⁸Na ɓa Yosva a kiɗifu war si n’amla ta ɗa, Alaw aga a muɗa ka katawai gaini mefeŋ zamai kai.

⁹Nɵa ɗa, si n’amla na maini na war mefeŋ n’ag'aŋ muguzak nɵa aŋsi hai buriɗi ɗai na wiini Alaw.

¹⁰Buri ɓa ni n’a niya li war si n’amla na wiini Alaw ɗa, aga a vada gaini sdani, sini a mla, maini n’Alaw sini a mla buri sda na wiini ɗa nɵa.

¹¹Buri nɵa, purmumu aŋ niyi amlai war si n’amla hanɗa, kapai ɗif sɗa aŋ ɓa burini ɵinini-gat-kai na mai hanɗa ɵa kai.

¹²Buri ɓa seŋ na wiini Alaw a na karni, a gdaŋ gara lai, a suma gara a suwa kaskar n’a suma tini sulu paŋ, a niya haa amlai, a ɓurwa suŋfaɗi-agul gaini seze, gaɵ gaini emel na warni keɵke lai, a ɗûkliti sariya midini n’aŋ warni sini ɗif gaini n’aŋ warɗi agul.

¹³Wala zi rgi ktai n’arni sini kai aŋ kai, wazagai paŋ a na edi gaglai wuzani arni, ni na tumu mu muɗumu seŋmu paŋ edi wuzani.

¹⁴tiyana na mu ɗumu gaini pai zi ɓaka n’abai n’a hala haa sini Alaw ta, Yesu Kristun’ahini Alaw, nɵa mu ɗiyumu gdaŋ pini wala na mu yimuŋmu ɗa,

¹⁵Buri ɓa pai n’abai zi ɓaka na wiimu ɗa, a na jaani gaini huruf na wiimu kai ɗa kai, Ni ɗa a nava titimi war wazagai paŋ, kal-kal maimu tumu nɵa, amma a za tuwur kai.

¹⁶Buri nɵa, mu turumusi siɗi Paramai zi yum gaini yimi, kapai mu nuvumu yum, mu bundumu arni haw lai kapai a sɗa aŋ zina pumu won hlai na haajamu a na ɗa.