Read Mousgoum Hebrekai 5 Bible Online

Hebrekai 5 - Mousgoum bible

Hebrekai 5

¹Buri pai n’abai zi ɓaka paŋ e viriŋ ɗa arbaɗi ɗai par, e tikiŋ buri a za ɵeŋ na wiiɗi ɗai wuzani Alaw, buri a ka like gaini ɓaka wuzani Alaw burini tuwur.

²Ni lai hurufni viya, buri nɵa a kiɗa a tika hangalni siɗi nagai n’e siɗi wala kai gaiɗi n’e wili edi ɗa lai.

³Buri huruf na wiini a na lai ɗa, a za ɓaka ɗa burini tuwur na wiiɗi ɗi kiɗi kai, amma burini sini dama lai.

⁴Kol hanɗa ɗif a kiɗa a yimaŋ sini gaini miini dama kai, a tika ɗif warni ɗa a Alaw, maini n’a siŋni wiini Aaron ɗa nɵa.

⁵Kristu nɵa lai, a yimiti abai hanɗa sini buri a za aŋ pai n’abai zi ɓaka gaini midini dama kai. A nava hanɗa sini Ni n’a miɗini ɓa: Tuku k’Ahiya mu wuuku li girna.

⁶A muɗa war hlai zamai pra lai maini nɵa: Tuku ku pai zi ɓaka ɵa ha kureɗ, pin giri na wiini Melkiseɗek nɵa.

⁷Kristu, won hlai n’a naka karni warɗi yai, war tuwi gaini ɗuwal n’abai, a siiwa, a tuwa lai, sin Ni n’a kiɗa a kurɗaŋ edi min mri par. Nɵa Alaw a ɵina siiwoni, buri ɓa Ni a ɗif n’a ɵina mini.

⁸Ni a Ahi ɵa jre jre, amma a hitra Gat pin gir n’a za sini ɗa.

⁹Won hlai n’a va hanɗa paŋ amai li, a bunda buriɗi nagai n’e gid pini paŋ aŋ epin-gezani kûri n’a vada kai.

¹⁰Alaw a tikaŋ aŋ pai n’abai zi ɓaka pin giri na wiini Melkiseɗek.

¹¹Pin hanɗa seŋ na mu muɗumu sini a na viya, a gir gara aŋ siŋkaŋ edi gaglai, kapai a yima midini ɗif lai, buri tiki ki bindi guma aŋ ɵini wazagai.

¹²Kadai tiɓ, a na ta ɗa ki ɗi tamai zi hitri gadai, amma ki firyi ɓa e hitiki wazagai n’agogoi n’e tiki piɗi gaini war hitri na war seŋ n’Alaw par ɗaai. Tiyana ki piyi na ɗa a simi na gdaŋ kai, amma a fiyaw.

¹³Buri asiya asiya paŋ n’a na min fiyaw hai ɗa, ni a akoɗokai. A kiɗa a sɗa ezini seŋ na jre ɗa kai.

¹⁴Buri simi na gdaŋ ɗa, a wiiɗi ɗai n’abakai, buriɗi nagai n’e ɗa gaini yel aŋ za ɓraw arbani pɗem gaini meefeŋ, buri ɓa e ɗa zin kûreɗ-kûreɗ.