Read Mousgoum Hebrekai 8 Bible Online

Hebrekai 8 - Mousgoum bible

Hebrekai 8

¹Seŋ n’abai naŋ war seŋ na mu muɗuŋmu war hlai hanɗa, a na maini nɵa: Mu nuvumu pai zi ɓaka n’abai na ɵa ya, aŋ gai simni war hlai zi hormo na wiini Alaw, amai war hlai n’amai;

²a ɗif n’a za sda ɗa amlai war hlai na sɗik, gaiɗi gumu na gai futini n’a zizinaŋ ɗa a ɗif murɗek kai, amma a Epiɗ-ɗai mal.

³Buri pai n’abai zi ɓaka paŋ ɗa, e tikiŋ buri a ka wazaga zi like, a za ɓaka lai, buri nɵa a dewele ɓa pai n’abai zi ɓaka hanɗa, wala n’a kiɗa a za ɓaka gaini a sa sini lai.

⁴A nafu na midiɗi yai ɗa, a kiɗa a za aŋ pai zi ɓaka kai; buri ɓa nagai n’e zi ɓaka pin gadai ɗa e ɗa.

⁵Paakai zi ɓaka hanɗa e zi sda amlai warni tempel, amma sda n’e ɗa ziŋ ɗa, a ziŋga n’a na war fuŋ n’Alaw ɗa, a sezeni wazagai n’amai par ɗa, hlai na Musus a tika pini aŋ rga gumu ɗa, Alaw a miɗini maini nɵa, ku talaŋ pɗem, kpai ku za paŋ maini n’a siŋka arku amai midiɗi huwuŋ ɗa nɵa.

⁶Amma tiyana ɗa, a nava sda n’abai a suwa hanɗa pra, a ɗif n’abai zi tipi arba na war bonu na pɗemni a suwa pra, bonu n’a ɗiya midini ɵinini ha na pɗem a suwa lai.

⁷Bonu n’avut ɗa a nafu ɓa seŋ na meefeŋ sini kai ɗa, ɗif a kiɗa a paya bonu n’ag'aŋ sulu kaalai.

⁸Alaw a muɗa siɗi ɗaini na ɗa buri meefeŋɗi won hlai n’a muɗa ɓa: Epiɗ-ɗai a na muɗa maini nɵa: Tili, mefeŋ a na gizi, war mefeŋ ni ɗa, aga mu za bonu na hehe gaiɗi pinzibaɗi Izrayel, gaiɗi inzibani Yuda lai.

⁹Aga a za maini bonu na mu zaŋ gaiɗi tamaiɗi, war mefeŋ n mu yimiɗisi ta, buri mu miliɗisi edi war Egipte par ɵa kai, buri ɓa nagai mal e ɗiyisini bonu na wiya kai, Ta ɗe mu hiina midiɗi kir kaalai. A muɗaŋ a Epiɗ-ɗai.

¹⁰Epiɗ-ɗai a muɗa: Tiyana bonu n’aga mu zaŋ gaini pinzibaɗi Izrayel asakal mefeŋ hanɗa par a na maini nɵa: aga mu wa gadaiŋa amlai war hiiniɗi, aga mu ɗoŋ war agulɗi, aga mu bunda aŋ Alaw na wiiɗi wiiɗi. Nagai aga e bindi aŋ ɗaiŋa lai.

¹¹Ɗif aga a hitra maini kir kai, ɗif aga a muɗa sini tawalni ɓa sɗa Epiɗ-ɗai kir kaalai. Buri ɓa ɗai paŋ aga e siɗiŋa, sini n’agwi n’arbaɗi par haa sin n’abai n’arbaɗi ta.

¹²Buri ɓa aga mu hiniɗi meefeŋ na wiiɗi ɗa, aga mu hina mada a ksa gaini tuwur na wiiɗi kir kaalai.

¹³Won hlai n’a yikaŋ ɓa bonu na hehe ɗa a siŋka ɓa bonu n’avut a zaŋ aŋ wel ta, wala n’a fana yaw, n’a za wel ta ɗa, a hina a vada ɗa a vidi edi.