Read Mousgoum Hebrekai 9 Bible Online

Hebrekai 9 - Mousgoum bible

Hebrekai 9

¹Bonu n’avut ɗa, ni kaw a nfu gaini gadai na wiini na burini siiwi na e siiwi Alaw, gaini hlaini na sɗik na warɗi yai ɗa lai.

²Nɵa, e zizini gumu ɗa azumai, e yikiŋ ɓa hlai na sɗik, amlai warni ɗa, wala n’e higi lampa sini, tabel gaini peŋ n’e siŋ wiini Alaw lai a nafu.

³Asakal par duɓani sapa na gaini giŋi amai n’ag'aŋ sulu par, a gumu n’e yikiŋ ɓa na sɗik gara ɗa lai.

⁴Amlai warni ɗa, gûwiŋ zi yi wazagai zi ɗûgûdi zi lûgûzi zi or, gaini zunduk zi bonu na sini paŋ gai mi gaini or, a nafu. Amlai warni zunduk hanɗa, grak zi or na gaini manna warni gaiɗi amaraŋai na wiini Aaron na te guɗa, gaini ali-fuŋ na bapɗamai na wiini bonu a nafu lai.

⁵Amai par midini zunduk zi bonu ɗa, kerubimkai n’e juvi gara e ɗifu, sezeɗi ɗa a tika midini mini zunduk zi bonu ɗa, - mu kuɗumu mu muɗumu midini wazagai hanɗa edi ktai ktai paŋ kai.

⁶Won hlai na wazagai hanɗa paŋ a zizina li, paakai zi ɓaka ɗa e niyi amlai kûreɗ-kûreɗ war gumu n’avuti won hlai n’e diri e zi sdaɗi.

⁷Amma a niya amlai war gumu n’ag'aŋ sulu ɗa a pai n’abai zi ɓaka kiini ktai, azi ktai war buza dam, amma sai a za ɓaka gaini fel burini sini dama, burini meefeŋ na wiiɗi ɗai lai.

⁸War hanɗa Seze-sɗik a dara a siŋkumu edi gaglai ɓa, futi na te ka amlai war Hlai na sɗik ɗa, t'aŋ gaini mili edi kai hai, n ɓa gumu n’avut ɗa a na hai ɗa.

⁹Hanɗa a wala zi siŋki war mefeŋ na tiyana: A siŋka ɓa like gaini ɓaka na ɗai e ziŋ ɗa a kiɗa a bunda ɗif gaini vi amai war pɗem, pin n’a sɗaŋ war hiinini, buri ɓa a na siiwa tini Alaw ɗa kai.

¹⁰Hanɗa gadai na wiiɗi ɗai, na midini wazagai zi simi, zi ci gaini mi na kiini kiini na ɗai e zi gaini haa sin mefeŋ na wazagai paŋ a zizina woɗi futini.

¹¹Amma Kristu ɗa a halasi maini pai zi ɓaka n’abai nɵa, kapai a sumu wazagai na pɗamai n’a na ca ya ɗa, a vugasi war gumu n’abai a suwa, na gaini futini a suwa lai, n’a za gaini tini ɗif kai, a dara a muɗa: a na arbani wazagai zi rgi na hanɗa kai.

¹²A niya amlai war Hlai na sɗik azi ktai, gaini fel na wiini haakai, gaini na wiini ali garakai kai, amma gaini fel na wiini dama, nɵa a sumu pli n’edi n’a vada kai.

¹³Na ɓa fel na wiini haakai gaini na wiini garakai gaini bono na wiiɗi ahiɗi ɵai n’agunai, n’e pukiŋ siɗi nagai na haharai a bunda ɗif sɗik, hilu lai ɗa,

¹⁴fel na wiini Kristu, - na war Seze n’a vada kai, a sa sini dama edi aŋ ɓaka wiini Alaw, na gaini tirki sini kai, a kiɗa a bunda hiinimu edi hilu sini wazagai na maafanai, n’a ka sini mri par, kapai mu suɗumu aŋ siiwumu Alaw na karni ɗa azi gama ɗa?

¹⁵Buri nɵa a bunda aŋ ɗif n’abai n’a tapa arba, na wiini bonu na hehe. Mri a za ta, burini pli n’edi, na war hi n’amai na midini gadai, n’a za war bonu n’avut ɗa; nagai n’e yikisi ɗa, e kiɗi e nivi bulum n’a vada kai, n’Alaw a za ha midini ɗa.

¹⁶Buri mu suɗumu aŋ muɗumu ɓa mini ɗif zi mri a na ɗa, sai na ɓa ɗif n’a muɗa seŋ ɗa a mra su haw.

¹⁷Buri ɓa miɗi na mini ɗif zi mri a bunda gaini spak pini ɗa, sai na ɓa mri a za li; amma na ɓa ɗif n’a muɗa seŋ hanɗa a na karni ɗa, seŋni ɗa a nafa wala kai.

¹⁸Nɵa bonu n’avut ɗa lai, pini a tika gaini mini fel ɗa buri hanɗa.

¹⁹Buri Musus, asakal n’a muɗa seŋ zi gadai edi siɗi ɗai paŋ ya, a tika fel na wiini ali garakai gaini na wiini haakaigaini yem, gaini ayirni adumai na mekele, gaini luwuŋ Izop lai, a yamaŋ midini maktuɓ ɗa, siɗi ɗai paŋ lai.

²⁰A muɗa: Hanɗa a fel na wiini bonu n’Alaw a zaŋ buriki.

²¹A yema fel sini gumu gaini wazagai n’e zi sda gaini paŋ lai.

²²Nɵa pin gadai ɗa, wala paŋ a za edi hilu gaini mini fel. Gaini mini fel kai ɗa, ni na burini tuwur a hina kai.

²³Na ɓa a tala pɗem ɓa wazagai n’a ziŋga wazagai na war fuŋ n’Alaw a za edi hilu maini hanɗa ɵa ɗa, wazagai na war fuŋ n’Alaw aga a za rdi hilu gaini ɓaka n’abai a suwa pra.

²⁴Buri ɓa Kristu a niya amlai war hlai na sɗik n’a za gaini tini, n’a kata gaini na gai futini ɵa kai, amma a niya amai war hlai n’amai, kapai a ɗiya wuzani Alaw burimu.

²⁵A na buri a za ɓaka gaini sini azi viya, maini pai n’abai zi ɓka n’a niya amlai war Hlai na sɗik buza buza paŋ, gaini fel na wiini ni dama kai ɗa ɵa kai,

²⁶-Na ɓa a za fu ɵa ɗa, a sɗa fu gir azi viya, haa war piɗi yai zi tiki par, amma a tiyana a siŋka sini edi gaglai azi ktai, war dibini hlai, kapai a vada tuwur edi gaini ɓaka na wiini.

²⁷Maini n’a sa siɗi ɗai aŋ mri azi ktai, -asakal hanɗa par te sariya lai, -

²⁸nɵa lai Kristu n’a sa sini azi ktai buri a liba tuwur na wiiɗi ɗai viya, aga a siŋkasi sini edi azi ktai pra, burini tuwur kir kai, amma buriɗi nagai n’e ɗa biyiŋ burini kûri.