Read Mousgoum Yakob 2 Bible Online

Yakob 2 - Mousgoum bible

Yakob 2

¹Tawalakaya, ki hini yimi na war Epiɗ-ɗaimu n’abai Yesu Kristu ɗa a tapa gaini zini ɓraw n’arɗi ɗai kai.

²Na ɓa ɗif na gaini adoŋo zi or tini na gaini sapa n’a ŋala gara sini, a niyasi amlai arbaki war tipi, ɗif na murga a niyasi amlai lai gaini sapa zi selte sini,

³na ɓa ki tiki hangalki sini ni na gaini sapa na ŋala gara ɗa, ki miɗini ɓa: Tuku ɗa sumnasi war hlai na pɗem hanɗa, amma ku miɗini wiini na murga ɓa: Tuku ɗa, ɗiya ka tuku na zaw, zaw sumnasi azumai ezini wala na mu mula aza midini na ɗa,

⁴ki zi na ɗa a ɓraw arɗi ɗai arbaki tiki dama kai ɗi? Hiini na ki hiiniŋ ɵa na ɗa, a na meefeŋ kadai kai ɗi?

⁵Slini haw ɗa, tawalakaya zi diri gara: Alaw a viriɗi na murgakai arɗi ɗai na yai ɗa, kapai e zi aŋ ɗai zi farai war yimi, aŋ ɗai zi mili bulum na wiiɗi pai-n’Alaw, n’a muɗa ɓa aga a sitiɗi wiiɗi nagai n’e diriŋ ɗa kai ɗi?

⁶Amma tiki ɗa, ki tikini siyer wiini ɗif na murga ɗa, paŋ ktai e ziki gir arki na ɗa e ɗi zi farai ɗa, e kiki wuzaɗi sariya lai, a na ɵa kai ɗi?

⁷E ɗi nagai n’e ɗa miisi yiki na pɗem n’e ɗa yikiki gaini, e ɗi nagai kai ɗi?

⁸A jre, na ɓa tiki ki vi gadai na wiiɗi pai amai, maini ɗû n’a muɗa ɓa: Aga ku dara maiku maini suku tuku dama nɵa ɗa, ki zi pɗem.

⁹Amma na ɓa ki zi ɓraw arɗi ɗai ɗa, ki zi tuwur, gadai a pa seŋ miɗiki ɓa ki ɗi ɗai n’e hi amai midini gadai.

¹⁰Asiya ɗi paŋ n’a za pin gadai na gaini abaini, amma a ha amai midini gadai ktai kadai, a bunda aŋ ɗif n’a za pin gadai kai.

¹¹Buri ni n’a muɗa ɓa: Ku za maɵara kai ɗa, a muɗa lai ɓa, ku ɵiɓa belek kai. Nɵa na ɓa ku za maɵara kai, amma ku ɵiɓa belek ɗa, ku bunda aŋ ɗif n’a ha amai midini gadai.

¹²Ki miɗi, ki zi lai maiɗi ɗai n’aga e niviti sariya pin gadai na wiini pli n’edi nɵa.

¹³Buri ɓa sariya ɗa aga te za gaini hiinini haw kai, burini ni na hiinini haw warni kai ɗa, hiinini haw a sa rɗi n’amai midiɗi sariya.

¹⁴Tawalakaya, na ɓa ɗif a muɗa ɓa yimini a na, na ɓa sdani aŋ kai ɗa a nafa tiɓ ɗa a ma ɗa? Yimi hanɗa a sɗa aŋ koraŋ ɗi?

¹⁵Na ɓa tawal na wus zaw na muni, sapa n’a waŋ sini aŋ kai, a na ganala, simini na war yivai aŋ kaalai,

¹⁶na ɓa ktai n’arbaki a miɗiɗi ɓa: " Ki hili jam, ki kupi siki, ki vi warki lai", ki siɗi wazagai zi giɗimi siɗi na jaɗi aŋ sini kaalai, miɗi hanɗa a nafa tiɓ ɗa a maɗa?

¹⁷Yimi ɗa a na nɵa lai. Na ɓa sdani aŋ kai ɗa, yimi hanɗa a na gaini mri su.

¹⁸Ɗif zamai a kiɗa a muɗa ɓa: Tuku ɗa yimiku a na, ta ɗa sdaŋa a na lai. Siŋkaŋa yimiku na gaini sda kai ɗa haw, ta gaini sdaŋa aga mu suŋkuku yimiŋ lai.

¹⁹Tuku ku yima ɓa Alaw a na ktai, a futini, matai e yimi ɵa lai, e ɗa jiriyi.

²⁰Tuku ɗif na tatala, ku firya ɓa mu suŋkuku ɓa yimi gaini sda kai ɗa, a wala na muɗaŋ kadai ɗi?

²¹Abraham, na tiymu, a za edi aŋ jre-ɗikat ɗa pin sda kai ɗi? Buri a za ɓaka gaini Isaak n’ahini midini gûwiŋ zi ɓaka kai ɗi?

²²Ku sɗa ɓa, yimi ɗa a za wala gaini sdani. Pin sda hanɗa, yimi ɗa a nava vi n’amai lai.

²³Nɵa ɗû n’a muɗa ɓa: "Abraham a yima pin Alaw, hanɗa a pɵa burini aŋ jre-ɗikat" ɗa a va amai. Ni a nava yiki lai ɓa "marmaini Alaw".

²⁴Ki tili ka, ɗif murɗek ɗa a za edi aŋ jre-ɗikat ɗa gaini sda, a na burini yimi kiini kai.

²⁵Rahab, muni zi zawar ɗa, na lai te za edi aŋ jre-ɗikat gaini sda, buri ɓa te yimiɗi ɗai n’e ɵiniɗi aŋ tili hlai ɗa siɗi, te tikiɗi piɗi warɗi futi zamai ɗaw lai kai ɗi?

²⁶Maini na si gaini suŋfa warni kai ɗa aŋ gaini mri, nɵa lai, yimi gaini sda kai ɗa aŋ gaini mri.