Read Mousgoum Yakob 3 Bible Online

Yakob 3 - Mousgoum bible

Yakob 3

¹Tawalakaya, ki bindi aŋ ɗai zi hitri paŋ kai, buri tiki ki siɗi ɓa sariya na wiyi aga te za gdaŋ a suwa.

²Tumu paŋ mu ɵiɓumu tukum war wazagai viya. Na ɓa ɗif a na n’a ɵiɓa tukum war seŋ zi miɗi kai, ni a ɗif na jre, n’a giɗima sini paŋ maini gaini eleŋze nɵa.

³Won hlai na mu wumu li eleŋze war mini plasai ɗa, a gada pumu, mu bundumu sini paŋ maini na mu durumu ɵa lai.

⁴Tili sini hulamai n’abakai pra, ni ɗa abakai, a hogoŋ ɗa a smer na gdaŋ lai, amma a ɗopoŋ ɗa a fele fele n’agwi kadai pin dirini ni n’a naka hulum ɗa lai.

⁵Nɵa lai, alesi te wala n’agwi kadai arbani ali-tini-si, amma te za ɗa a wazagai n’abakai. Tili, afu n’agwi kadai ɗa a kiɗa a ya jur n’abai.

⁶Alesi lai t'afu, te yai na wiini jre-ɗikat-kai, alesi t'aŋ war sumu, te duguɗa meefeŋ war si paŋ, te ya simnimu na warɗi yai ɗa, sini wiimu par haa sin mrimu, naa mal ɗa, afu na wiiɗi naa ɗa a na warɗi avai z'afu par.

⁷Pinzibani wazagai n’ezini puɗu puɗu na buza paŋ, pinzibani wala zi ɗifli paŋ, pinzibani wazagai zi hidili paŋ, pinzibani wazagai n’arni yem par paŋ lai, ɗif a kiɗa buri a gdaŋ, ɗai e bindiŋ a gada piɗi lai.

⁸Amma alesi ɗa, ɗif ktai n’a kiɗa aŋ giditi aŋ kai, te meefeŋ na ɗif a kiɗa buri a cakaŋ kai, t'aŋ gaini vi gaini masnaw zi fiɗi ɗai.

⁹Gaiɗi alesi hanɗa, mu sumu kol sin Ni n’a Epiɗ-ɗai, n’a Api lai, gaiɗi naa lai, mu muɗumu meefeŋ siɗi ɗai, n’Alaw a rgiɗi maini sini nɵa.

¹⁰War mi na ktai hanɗa par, kol gaini miɗi na maafanai a niyasi edi, tawalakaya a zuva ɓa a za maini nɵa kai.

¹¹Yem na pɗem gaini yem na ɗewek a kiɗa a niyasi edi war hlai zi liiwi yem ktai par ɗi?

¹²Tawalakai, luwuŋ Fige ɗa a kiɗa a wa ali luwuŋ olive ɗi? Zaw luwuŋ zi vin a wa ali luwuŋ Fige ɗi? Hlai zi liiwi yem na liŋ liŋ ɗa a kiɗa a liwasi yem n pɗem kai.

¹³Arbaki ɗa ɗif zi yel na zi siɗi lai ɗa asiya ɗa? A pɗem ɓa ɗi ni ɗa a siŋka sdani edi war payai na pɗem gaini hangal gaini yel lai.

¹⁴Amma na ɓa aŋ warki ɗa a sile, gaini miɗi na ɗewek, zaw hiini zi sûwiɗi marki ɗa, ki kûli siki burini hanɗa kai, ki zi eles sini jre kaalai.

¹⁵Yel na maini hanɗa ɵa ɗa a n amai par kai, a na wiiɗi yai, a na wiini neŋ-si na wiini mat.

¹⁶Buri ɓa hlai na sile gaini hiini zi suwi marki aŋ warni ɗa, dûrgûzi gaini wazagai na maafanai viya aŋ warni lai.

¹⁷Yel n’amai par ɗa a na avut ɗai hilu, asakal par a firya ɵeɗ, a toya arba, a hangal, hiinini haw warni gara, a wa ali na pɗamai gara, a za ɓraw kai, rhai war mini kaalai.

¹⁸Nagai n’e piyi ɵeɗ ɗa, e suuɗi ɵeɗ won hlai n’e ɗa woni maini alini seyem nɵa, hiɗini seyem na wiiɗi ɗa, a sda na jre lai.