Read Mousgoum Yakob 4 Bible Online

Yakob 4 - Mousgoum bible

Yakob 4

¹Gaw a halasi wata par ɗa? Sispai a halasi wata par ɗa? A halasi na ɗa war dirini neŋ-si n’a na hitima amlai war siki par kai ɗi?

²Tiki ki piyi amma ki nivi wala kai, pin sile n’a va warki ɗa, ki ɵiɓi belek, ki kiɗi ki nivi wala kai buri ɓa ki ɗa ki zilbi kai.

³Na ɓa ki ɗa siiwi, amma ki nivi wala kai ɗa, buri ki siiwi ɗa a meefeŋ, buri tiki ki firyi ki biŋ ɗa pin dirini neŋ-siki.

⁴Tiki na maɵarakai, ki siɗi ɓa diriɗi yai ɗa, a gaw na sini Alaw kai ɗi? Ɗif n’a rga li warni buri a za aŋ marmaiɗi yai ɗa, a bunda sini na ɗa aŋ gawni Alaw.

⁵Ki hiini ɓa ɗû ɗa a muɗa na ɗa kadai ɗi? Won hlai n’a muɗa ɓa, Seze n’a hinaŋ aŋ sumna warmu ɗa a daraŋ ɗa a diri zi jam ɗa kai.

⁶Amma yum n’a dara a saŋ sumu ɗa, abai a suwa pra, buri ɗû a muɗa ɓa Alaw a bla edi siɗi nagai n’e kûli siɗi ɗa amma a sa yum siɗi nagai n’e hûsi siɗi.

⁷Nɵa ɵini pini Alaw, ki pi eziki edi arni mat ɗa, aga a pra edi siki par.

⁸Ki tuurisi sin Alaw, ni aga a torasi siki lai, mi tiki edi, tiki na tuwarai, ki zi agulki edi hilu, tiki n’agulki gai ɓûrwi sulu sulu ɗa.

⁹Tili hawki, w sapa zi tuwi siki, tuwi lai, hini riyi na wiiki a bunda aŋ tuwi, firiyi na wiiki aŋ kwimi lai.

¹⁰Hûsi siki azumai wuzani Epiɗ-ɗai, nɵa aga a kuliki amai.

¹¹Ki miɗi meefeŋ siɗi marki arbaɗi marki kai, tawalakaya, buri ni n’a muɗa meefeŋ sini tawal, zaw n’a ɗûkliti sariya midini tawalni ɗa, a muɗa meefeŋ na ɗa sini gadai, a ɗûkliti sariya na ɗa midini gadai lai. Na ɓa ku ɗûkliti sariya midini gadai ɗa, ku ɗif n’a za pin gadai ɗa kir kai, amma ku ɗif n’a ɗûkliti sariya midini.

¹²A kiɗa a sa gadai ɗa lai, a kiɗa a ɗûkliti sariya lai ɗa a Alaw, a kiɗa a kora ɗif lai, a ɓa ɗif lai, amma tuku ɗa, ku siya ɗa na ku ɗûkliti sariya midini maiku ɗa?

¹³tiki na ki ɗa miɗi tiyana ɓa: girna zaw dawai ɗa aga mi hili war fuŋ n’abai hanɗa nɵa, mi zi buza woni ɗaw, aga mi cikili, mi nivi riba viya lai.

¹⁴- tiki ki siɗi wala n’aga a za siki dawai kai, tiki ki ɗa maini agiyiŋ n’a pa amai burini hlai n’agwi, asakal par a giyha edi lai nɵa.

¹⁵Kadai tiɓ ki miɗi ɗa ɓa: Na ɓa Epiɗ-ɗai a dara, aga mi simni karyi, aga mi zi hanɗa lai, mi zi hanɗa lai.

¹⁶Amma tiyana ɗa, tiki ki kûli sikii na ɗa warni kûlûni-si na wiiki, kûlûni-si na maini hanɗa ɵa a meefeŋ.

¹⁷Nɵa na ɓa ɗif a sɗa aŋ za wala na pɗem aŋ zi, amma a zaŋ kai ɗa, hanɗa a tuwur burini.