Read Mousgoum 2 Peter 2 Bible Online

2 Peter 2 - Mousgoum bible

2 Peter 2

¹Gaini hanɗa paŋ ɗa, ɗaiŋa min Alaw na jrekai kai e ɗika arbaɗi ɗai na Izrayel, nɵa lai, ɗai zi hitri na jrekai kai aga e fiki amai, aga e kisi hitri zi bi ɗai arbaki gaini yel viya. Aga e zi haa e pi miɗi ɓa nagai e siɗi Epin-gezaɗi n’a wuriɗisi edi kai, aga e kisi bi n’edi tizaw midiɗi.

²Ɗai viya aga e tipi piɗi war payaiɗi na meefeŋ, pra, buriɗi nagai, ɗai ag e miisiti futi na wiini jre-ɗikat ɗa,

³Pin suuna n’a rga warɗi ɗa, nagai aga e ziki miɗiki gaini seŋ na jre kai, n’e ziziriŋsi. Buriɗi nagai ɗa sariya te tika piɗi haa gamai par, bi n’edi na wiiɗi ɗa a na za lai.

⁴Na ɓa Alaw a hiniɗiɗai zi ɵeŋ na war fuŋ n’Alaw n’e zi tuwur ɗa kai, amma siɗi edi war hlai zi gir, na ɓa a rgiɗi gaini jaɓ na wiini gegeŋ, e ɗa war gɗam buri e biyiti sariya,

⁵na ɓa a hiniti yai na wuli ɗa kai, amma a giɗima Nowa, ɗif n’a muɗa edi midini jre-ɗikat, ni n’ag'aŋ mitwis arbaɗi n’e kûrɗi, won hlai n’a kasi yem n’abai midiɗi yai na wiiɗi ɗai n’e yimi pini Alaw kai ɗa,

⁶Na ɓa a tuura fuŋ n’abakai na Sodoma gaini na Gomora edi, aŋ bundaŋ edi aŋ eveŋ lai, aŋ siŋkiɗi wiiɗi nagai n’e yimi pini Alaw kai ɗa midini wala n’a na biyiɗi,

⁷amma na ɓa kurɗasi Lot edi, ni n’a ɗif na jre-ɗikat, n’a sɗa gir gara pin payai na meefeŋ na wiiɗi ɗai na maafanai hanɗa,

⁸buri ɓa ɗif na jre-ɗikat hanɗa, n’a sumna arbaɗi mefeŋ mefeŋ paŋ, suŋfaɗi-agulni a nava simni na ɵeɗ kai, burini meefeŋ n’a talaŋ, n’a ɵinaŋ ɗa lai.

⁹Hanɗa a siŋka ɓa: Epiɗ-ɗai a sɗa aŋ piliɗi nagai n’e yimi ɗa edi min titimi par ya, amma na jre-ɗikat kai ɗa, a giɗmiɗi buri aga a ziɗi gir war mefeŋ zi sariya.

¹⁰A suwa paŋ, nagai na hi-hir a kɵa pin wulaɗi, e rivi pin dirini neŋ-si, e miisiti abai na wiini Epiɗ-ɗai. E kûli midiɗi amai, hormo warɗi kai, e tirki spak n’abakai lai.

¹¹Paŋ ktai, ɗai zi ɵeŋ na war fuŋ n’Alaw n’e suwi gaini gdaŋ gaini spak lai maa, e tiki ka sdani spak hanɗa wuzani arni Epiɗ-ɗai kai zaŋ.

¹²Amma nagai ɗa, maini wazagai n’ezini puɗu puɗu na yel midini kai ɗa nɵa. E tirki wala n’e siɗiŋ kai, aga e hufi edi maini wazagai n’ezini puɗu puɗu nɵa lai.

¹³E nivi meefeŋ aŋ vrak pin meefeŋ n’e ziŋ ɗa, e firyi e vi dirɗi na meefeŋ ɗa amai girvudi kaŋ, won hlai n’e ɗa zi fet gaiki ɗa, e firyi burini rhai n’e rhiki ɗa, simniɗi n’arbaki ɗa a wala zi siyer, zi bizi mini ɗif lai.

¹⁴Zini maɵara edi pini arɗi do do, e vi gaini tuwur ɗa kai, e tiniɗi ɗai n’e ɗiyi gdaŋ war yimi kai ɗa, agulɗi gaini tiki midini suunani farai, e ɗi ali zi tuusa.

¹⁵Asakal n’e hiniti futi na ɗikat edi ta ɗa, nagai e sili edi, e tikiti futi na wiini Balam n’ahini n’ahini Bosor na firya vrak na wiini sda na meefeŋ ɗa.

¹⁶Amma a nava Gat, buri ɓa a ha amai midini gadai. Ablehoi na ɓurtum te miɗini seŋ war wule na wiini ɗif, te ɗiya duuli na wiini ɗif na min-Alaw lai.

¹⁷Nagai e ɗi kalaŋai na yem warni kai, e ɗi ɗugul zi faŋ na barawai a hogoŋ, gegeŋ na tikiɗim a zizina buriɗi.

¹⁸Gaini seŋ zi miɗi na gomoŋai kadai, n’e zili siɗi amai gaini ɗa, e tiniɗi nagai n’e prisi edi piɗi nagai n’e wili edi par, gaini diri na hi-hir na wiini neŋ-si lai.

¹⁹E midiɗi ɓa aga e pliɗi edi, paŋ ktai nagai gain midiɗi dama e ɗi bagakai na wiini luɗi-n’edi, -buri ɓa ɗif paŋ ɗa a begeni wala n’a na ŋa midin ɗa.

²⁰Buri nɵa, na ɓa gaini siɗi na wiini Epiɗ-ɗai, Ɗif-si-kûri na wiimu Yesu Kristu, e prisi edi war hi-hir na wiiɗi yai ɗa par, na ɓa e wiyi ka pra war hi-hir hanɗa, e hiniŋ a ŋa midiɗi lai ɗa, aga a bindiɗi maafanai a suwa n’avut ɗa pra.

²¹Buri ɓa na ɓa e siɗiti fu futi na wiini jre-ɗikat kai ɗa, marya, midini n’e siɗiti ɓa, e hinisi seŋ zi gadai na sɗik n’a sa siɗi ɗa edi ta.

²²Wala n’za siɗi na ɗa, a na seŋ joro a muɗa gaini ɓa: "Hirge ɗa a waya midini huŋvini", Hohoi na gaini mi edi te waya aŋ bubula siɗi arni ŋoroɓok, na hi-hir.