Read Mousgoum 2 Peter 3 Bible Online

2 Peter 3 - Mousgoum bible

2 Peter 3

¹Tiki zi diri gara, hanɗa te letre na te g'aŋ sulu na mu ɗuti siki. War letre na sulu hanɗa paŋ, mu dara mu ɵiki miɗiki kapai ki siɗi aŋ hiini hiini na pɗem;

²kapai miɗiki a kɵa gaini seŋ na ɗai na min Alaw na sɗik e miɗiŋsi aɗipar, gaini seŋ zi gadai n’apostelai na wiiki e hitriŋki, gadai na wiini Epiɗ-ɗai Yesu Kristu.

³Avut paŋ aga ki siɗi ɓa war mefeŋ n’asakal ɗa, ɗai zi anya aga e hilisi, gaini seŋ zi miisi war miɗi, aga e piyi pin diriɗi na meefeŋ,

⁴Aga e miɗi: Gizini Epiɗ-ɗai n’a muɗa gaini ɗa aŋ wata ki ɗi? Haa sin mefeŋ na tamaimu e mri par, haa girna, wala ktai maa a bunda kai, wazagai paŋ a na maini n’a war piɗi yai zi tiki par.

⁵Buri ɓa, e wili midiɗi gaini ɗa aŋ bulaŋ, a sɗa ɓa aɗipar, hlai n’amai a nafu, afti a niyasi edi arni yem par lai, a za gaini yem gaini seŋ na wiini Alaw.

⁶Gaini seŋ ni dama, yai na te naka warni mefeŋ hanɗa, te ɓa arni yem.

⁷Pin seŋ hanɗa dama, hlai n’amai gaiɗi yai na tiyana aŋ war gɗam, buri a ya edi gaini afu, a na biyiti sariya, gaini bi n’edi na wiiɗi ɗai n’e yimi war Alaw kai.

⁸Amma tiki zi diri gara, wala ktai a na, na tiki aga ki wili miɗiki gaini kai, hanɗa ɓa: Burini Epiɗ-ɗai ɗa, mefeŋ ktai a na maini buza dubu ɗaw nɵa, buza dubu ɗaw a na maini mefeŋ ktai nɵa lai.

⁹Zlinini ha n’EPIƊ-ƊAI a zaŋ ɗa, aga a va amai, aga a za kai maini na zamai e hiiniŋ na ɗa ɵa kai, a za witaw kai na ɗa buriki tiki, a firya ɓa ɗif ktai maa a ɓa kai, paŋ e bindi bindi na gamai.

¹⁰Amma mefeŋ na wiini Epiɗ-ɗai aga a gizi, mainiɗif zi mihill nɵa, war mefeŋ ni ɗa, hlai n’amai ɗa aga a vuga, gaini suura n’abai gara, wazagai n’arbani hlai n’amai ɗa, afu aga a yaŋ, a hiliya edi lai, yai gaini wazagai na warɗi paŋ, sariya aga te ɗukla midini.

¹¹Na ɓa wazagai paŋ aga a hiliya edi maini hanɗa ɵa ɗa, tiki lai ki tiki hangalki sini payaiki ɗa, aga ki piyi payai na sɗik, ki yimi pini Alaw lai.

¹²Aga ki biyi gizini mefeŋ na wiini Alaw. Kapai mefeŋ hanɗa a halasi witaw lai ɗa, aga ki piyi mai hanɗa nɵa. Buri ɓa war mefeŋ ni ɗa, hlai n’amai n’a na ya ɗa aga a hiliya, wazagai zi rgi n’a na ɗa, aga a hiliya lai.

¹³Amma pin miɗi na wiini Alaw ɗa, tumumu biyumu na ɗa a hlai n’amai na hehe, gaiɗi yai na hahai, na jre ɗikat aga a za warɗi.

¹⁴Nɵa lai tiki zi diri gara, war bayai hanɗa, aga ki fiɗi was aŋ simni gaini didiɓi kai, gaini bli ɓlok kai war ɵeɗ,

¹⁵Ki yimi ɓa zi n’EPIƊ-ƊAI a za gaini hangal na ɗa, a na burini kûri na wiiki, maini na Paulus tawalmu zi diri gara a ɗoŋ ka siki pin yel n’a sa sini nɵa.

¹⁶Hanɗa a wala n’a zaŋ war letrekain paŋ, won hli n’a na muɗa midini seŋ hanɗa, seŋ zamai n’a ɵina gir woni a na, ɗai n’e siɗi wala kai, na gaiɗi ɗiyi pɗem war yimi kai ɗa, e viiɗiŋ edi maini n’e ziŋ gaini ɗû zamai zamai ɗa ɵa lai, e zi hanɗa sini bi n’edi na wiiɗi dama.

¹⁷Tiki zi dir fgara, hlai na ki cû woni ta na ɗa, aga kizi hangal, ɵa kai ɗa, wili n’edi na wiiɗi ɗai n’e yimi pini Alaw kai ɗa, aga tiniki edi, haa ki kɵi azumai war ɗiyiki na gdaŋ par.

¹⁸Ki wili ɗa amai seek war yum, gaini siɗini Epiɗ-ɗai Yesu Kristu, Ɗif-zi-kûri na wiimu. Kol ɗa a wiini tiyana par haa hlai n’a vada kai, n’a vada kai. Amen.