Read Mousgoum 1Yohana 3 Bible Online

1Yohana 3 - Mousgoum bible

1Yohana 3

¹Tili, diri n’abai n’Api a zaŋ sumu, kapai mu yikumu aŋ alini Alaw, - A jre mu ɗumu alini Alaw, na ɓa ɗai na yai e suɗumu kai ɗa, buri e siɗiŋ ka aŋ Api duk kai.

²Tiki marmakaya zi diri gara, tumu tiyana ɗa mu ɗumu alini Alaw, bindi n’aga mu bundumu ɗa, a siŋka edi gaglai kai hai, amma tumu mu suɗumu ɓa koo gizini a za maɵa maɵa ɗi, aga mu bundumu kal kal maini ni nɵa, buri ɓ'aga mu tuluŋmu maini n’a na ɗa ɵa.

³Asiya ɗi paŋ na biyi na pin ɵeɗ hanɗa aŋ warni ɗa, ga a za sini edi hilu maini ni a na hilu nɵa.

⁴Asiya ɗi paŋ n’a za tuwur ɗa, a za ɗa a meefeŋ lai, bur tuwur ɗa a meefeŋ.

⁵Tiki ki siɗi ɓa Yesu a halasi buri a tika tuwur edi, amma ni ɗa tuwur warni kai.

⁶Asiya ɗi paŋ n’aŋ warrni ɗa a za tuwur kai, asiya ɗi paŋ n’a za tuwur ɗa a sɗaŋ kai, a talaŋ ka duk kaalai.

⁷Aliya, hini ɗif a wiliki edi kai, ni n’a za jre-ɗikat ɗa a na jre, maini na Yesu Kristu a na jre-ɗikat nɵa.

⁸Ni n’a za tuwur ɗa a na sin mat par, buriɓa mat a za tuwur haa war pi zi tiki par. Ahini Alaw a siŋkasi sini edi ɗa buri a ɓilka sdani mat edi.

⁹Asiya ɗi paŋ n’a waŋsi a Alaw ɗa a za tuwur kai, buri seŋni Alaw aŋ warni. A kiɗa aŋ za tuwur kai, buri ɓa a waŋ ɗa a Alaw.

¹⁰Alini Alaw gaiɗi alini mat ɗa, e siŋki edi war sda hanɗa. Asiya ɗi paŋ n’a za jre-ɗikat kai a na sini Alaw par kai, ɗ n’a dara tawalni kai ɗa nɵa lai.

¹¹Seŋ na ki ɵiniŋ haa war pi zi tiki par ɗa, a hanɗa: mu durumu marmu arbaɗi marmu;

¹²Aga mu zumu maini Kayin n’a na sini na meefeŋ ar n’a fuɗa tawalni edi nɵa kai. A fuɗaŋ edi buri ma ɗa? Buri ɓa sda na wiini ni Kayin ɗa a meefeŋ, na wiini tawalni ɗa a jre.

¹³Tawalakai, aga ki bindi hiyak kai na ɓa ɗai na yai e bili gaw siki ɗa.

¹⁴Tumu mu suɗumo ɓa mu vugumusi war mri par sini suŋfa; buri ɓa mu duruɗumu tawalakai, ni n’a dara tawalni kai ɗa a sumna war mri.

¹⁵Asiya ɗi paŋ n’a bula gaw sini tawalni ɗa, ni a ɗif zi ɵiɓi belek; tiki ki siɗi ɓa ɗif zi ɵiɓi belek ɗa zuŋfa n’a vada kai aŋ warni kai.

¹⁶Aga mu suɗumu diri ɗa warni hanɗa: Kristu a sa suŋfani edi burimu, tumu lai aga mu sumu suŋfamu edi buriɗi tawalakai.

¹⁷Amma na ɓa ɗif aŋ gaini der warɗi yai, a tala maini aŋ war gir, amma a dûgûti agulni sini ɗa, dir na wiini Alaw a sumna warni maɵa maɵa ɗa?

¹⁸Aliya, mu durumu gaini seŋ zi miɗi kadai kai, amma war sda gaini jre.

¹⁹War hanɗa aga mu suɗumu ɓa mu ɗumu ɗai na war jre. Aga mu tukutumu agulmu azumai war ɵeɗ wuzani Alaw lai.

²⁰Buri ɓa, na ɓa agulmu te ko seŋ mudumu ɗa, Alaw a abai a sûwiti agulmu ɗa, a sɗa wazagai paŋ lai.

²¹Tiki marmakaya zi diri gara, na ɓa agulmu te kûti sariya mudumu kai ɗa, mu suɗumu fakat ɓa Alaw aga a za wala na pɗem burimu.

²²Wala na mu zulbuŋmu paŋ ɗa, aga mu nivuŋmu tini par, buri ɓa mu yimumu seŋ zi gadai na wiini, mu zumu wazagai n’a tala arni pɗamai lai.

²³Seŋ zi gadai na wiini ɗa a hanɗa: Mu yumumu war yikini Yesu Kristu n’Ahini, mu durumu marmu arbaɗi marmu lai, maini gadai n’a suŋmu ɗa nɵa.

²⁴Ni n’a yima li pin seŋ zi gadai na wiini ɗa, a sumna war Alaw, Alaw war ni lai. Mu suɗumu ɓ a na warmu ɗa pin hanɗa, pin seze n’a suŋmu ɗa