Read Mousgoum 1Yohana 5 Bible Online

1Yohana 5 - Mousgoum bible

1Yohana 5

¹Asiya ɗi paŋ n’a yima ɓa Yesu a Kristu ɗa, a waŋsi a Alaw, a siyaɗi paŋ n’a dara Api, a dara Ahi n’a waŋ ɗa lai.

²Aga mu suɗumu ɓa mu ɗumu alini Alaw war hanɗa: won hlai na mu durumu Alaw, mu zumu pin seŋ zi gadaini lai.

³Buri dirini Alaw ɗa a na ɓa: mu yimumo pin seŋ zi gadai na wiini ɗa, seŋ zi gadai na wiini a guma kai.

⁴Buri ɗif paŋ, n’a waŋsi a Alaw ɗa a rɗa amai midiɗi yai, a sumu rɗ n’amai midiɗi yai ɗa a yimi na wiimu.

⁵N'a rɗa amai midiɗi yai ɗa asiya ɗa? A ni n’a yima ɓa Yesu a Ahini Alaw kai ɗi.

⁶Yesu Kristu ɗa a ni n’a halasi gaini yem gaini fel lai, gaini yem kiini kai, amma gaini yem gaini fel lai. A za zaida midini ɗa a seze, buri ɓa seze ɗa a jre.

⁷Buri wazagai a na hu n’a za zaida ɗa:

⁸Seze gaini yem gaini fel lai, nagai hu miɗi ktai.

⁹Na ɓa tumu mu yumumu zaida na wiiɗi ɗi ɗa, zaida na wiini Alaw abai a suwa ki ɗi. Buri zaida na wiini Alaw hanɗa a na ɓa a za zaida midini Ahini.

¹⁰Ni n’a yima li warni Ahini Alaw ɗa, zaida hanɗa aŋ warni, ni n’a yima warni Alaw kai ɗa, a bundaŋ aŋ ɗif z'eles, buri ɓa a yima zaida n’Alaw a zaŋ midini Ahini ɗa kai.

¹¹Zaida hanɗa a na ɓa Alaw a sumu suŋfa n’a vada kai, suŋfa hanɗa aŋ warni Ahini.

¹²Ni n’a yima Ahi li ɗa, a nava suŋfa li, ni n’a yima Ahini Alaw kai ɗa, a nava suŋfa kaalai.

¹³Wazagai hanɗa mu ɗoŋ siki kapai tiki ki siɗi ɓa suŋfa n’a vada kai ɗa a wiiki, tiki na ki yimi war yikini Ahini Alaw.

¹⁴Wala na mu suɗuŋmu sini gaglai ɗa ɓa: wala paŋ na mu zulbuŋmu li pin dirini ɗa, a ɵina mumu.

¹⁵Na ɓa mu suɗumu ɓ'a na ɵina mumu midini a maɗi a maɗi paŋ na mu zulbuŋmu midini, mu suɗumu lai ɓa wala na mu zulbuŋmu midini ɗa mu nuvuŋmu ya.

¹⁶Na ɓa ɗif a tala tawalni li a na za tuwur, na ɓa a tuwur n’a ka sini mri kai ɗa, a siiwa burini. Nɵa Alaw aga a sini suŋfa, na ɓa tuwur n’a zaŋ ɗa a naka sini mri kai ɗa. Tuwur zamai a na n’a ka sini mri, mu muɗa ɓa ki siiwi ɗa buri hanɗa kai.

¹⁷Sda na jre-ɗikat-kai paŋ ɗa a tuwur, -amma tuwur n’a ka sin mri kai a na lai.

¹⁸Tumu mu suɗumu ɓa, asiya ɗi paŋ n’a waŋsi Alaw a za tuwur kai, buri ɓa Ahi n’Alaw a waŋ ɗa, a na giɗimaŋ, na meefeŋ a kiɗa aŋ tetemaŋ kai.

¹⁹Tumu mu suɗumu ɓa mu ɗumu na wiini Alaw, mu suɗumu lai ɓa duniya na gaini abaiɗi te na azumai pin spak na wiini ni na meefeŋ.

²⁰Amma tumu mu suɗumu lai ɓa ahini Alaw a halasi ya, a sumu yel, kapai tumu mu suɗumu ni na Jre ɗa, tumu mu ɗumu war ni na Jre lai, war Yesu Kristu n’Ahini. Ni a Alaw na Jre, a Suŋfa n’a vada kai lai.

²¹Aliya, ki giɗimi siki pɗem, burini alawai zi rgi na jrekai kai.