Read Mousgoum Paakai zi sariya 1 Bible Online

Paakai zi sariya 1 - Mousgoum bible

Paakai zi sariya 1

¹Asakalni mrini Yosva, aliɗi Izrayel e zilbi dirini EPIƊ-ƊAI maini nɵa: arbaɗi ɗa, pinziba n’aga a hala aŋ hitima gaiɗi Kananiyakai avut ɗa a na wata ɗa?

²EPIƊ-ƊAI a wiyiɗi seŋ: a pinziba na wiini Yuda, buri mu sini afti hanɗa war tini.

³Nɵa ɗai na war pinzibani Yuda e miɗiɗi wiiɗi nagai na war pinzibani Simeyon na tawalni maini nɵa: Hilisi gaiyi, hutumuɗumu Kananiyakai ɗa piɗi marmu, kapai asakal par tiyi lai mi hili gaiki midini afti n’a sa siki lai, nɵa pinzibani Simeyon e hili gaiɗi.

⁴E hili e hitimi, EPIƊ-ƊAI a siɗi Kananiyakai gaiɗi Perizitekai war tiɗi, e fiɗi ɗai dubu doogo war Bezek

⁵E nivi Adoni-Bezek, war fuŋ n’abai na Bezek e hitimiŋ, e fiɗiɗi Kananiyakai gaiɗi Perezitekai edi.

⁶Adoni-Bezek a lawa wuzaɗi, nagai e birgiŋ haa e yimiŋ e ɗûkli ali tini gaini alini ezini n’abakai edi daf daf.

⁷Adoni-Bezek a muɗa: Paakai doogo doogo muguzak na ali tiɗi gaini alini eziɗi n’abakai gaini ɗûkli edi daf daf, e ɗika e viri ɗa a kolkoɗaini simi n’a yaka azumai pini tabel na wiya wuza. Wala na mu zaŋ siɗi ɗa, Alaw a wayaŋsi li mada. E kiŋ war Yeruzalem, a mra woni.

⁸Pinzibani Yuda e ciki fuŋ n’abai na Yeruzalem, e tikiŋ lai. E fiɗiɗi ɗai na woni edi gaini kaɵkar, e ɵi afu pini fuŋ n’abai ɗa lai.

⁹Pinzibani Yuda e niyisi edi pra, e hitimiɗi aliɗi Kananiyakai n’e zi fuŋ midini hlai zi huwuŋ gaiɗi a war gal n’amai sek, gaiɗi na war Sefela.

¹⁰Pinzibani Yuda a hala a hitima gaiɗi Kananiyakai na war Hebron. Yikiɗi Hebron na avut pa ɓa: Kiryat-Arba, e rɗi amai midini pinziba na wiini Seskai gaini na wiini Ahiman gaini na wiini Talmai lai.

¹¹Woni par pinzibani Yuda e hili e hitimi gaiɗi ɗai na Debir. Debir, yikiɗi n’avut ɗa ɓa: Kiryat-Sefer.

¹²Kaleb a muɗa: Ɗif n’a rɗa li amai midiɗi Kiryat-Sefer ɗa, aga mu sitini Aksa n’ahiya aŋ munini.

¹³Otniyel n’ahini Kenaz na tawalni Kaleb n’agwi ɗa, a rɗa amai midiɗi Kiryat-Sefer, Kaleb a sitini Aksa na ahini aŋ munini.

¹⁴Won hlai na te co ahani Otniyel tar ɗa, te zini pini buri a zilba vuwai tini epiɗi, te niyasi azumai midini ablehöɗi par, Kaleb a zilbiti a muɗa: A zuku ɗa a maɗa?

¹⁵Te waya seŋ te miɗini: Za yum sa ta, tuku ku saŋa hlai na war gal n’amai sek, na kooloŋ ɗa ta, saŋa hlai zi yem ta lai kai ɗi? Nɵa Kalebitekai a siɗi hlai zi yem n’amai par gaini n’azumai par ɗa lai.

¹⁶Kenitekai, na pinzibani suwulni Musus ɗa, e hilisi war fuŋ n’abai zi wura par gaiɗi pinzibani Yuda lai, e hili e simni edi war basga na kaɗataŋ na Yuda, tiɗi Arad war gal n’amai sek. E hili e simni arbaɗi Amalekekai.

¹⁷Pinzibani Yuda e hili gaiɗi pinzibani Simeyon na tawalni, e hitimi gaiɗi Kananiyakai na war Sefat, e rɗi amai midiɗi lai. E tûûri fuŋ n’abai hanɗa edi a bunda aŋ wala zi tusa, e siɗi yiki ɓa: Hormo.

¹⁸Pinzibani Yuda e tikiti Gaza gaini afti na ɵimaɗi paŋ, Askalon gaini afti na ɵimaɗi paŋ, Ekron gaiɗi afti na ɵimaɗi paŋ lai.

¹⁹EPIƊ-ƊAI a zina piɗi pinzibani Yuda gara, haa e tiki hlai zi huwuŋ, e bindiŋ aŋ wiiɗi. Amma ɗai n’e simni azumai war hlai na plas ɗa, gdaŋɗi a kiɗa a birgiɗi kai, buri e ɗa gaini saret zi gaw zi kaw lai.

²⁰Pini miɗi na wiini Musus ɗa, Hebron te sa sini Kaleb, a birgiɗi pinzibani Anak na hu edi ca.

²¹Pinzibani Benyamin e kiɗi e birgiɗi Yebuzitekai na war Yeruzalem ɗa edi kai. Haa girna e ɗa war fuŋ n’abai hanɗa gaiɗi ɵa.

²²Pinzibani Yosef a faka amai a hitimiti Betel lai, war hatamɗi, EPIƊ-ƊAI a zina piɗi.

²³Pinzibani Yosef e hili, e tilitisi Betel na yikiɗi n’avut par ɓa Luz.

²⁴Ɗai n’e ɵiniɗi ɗa, e nivi ɗif ktai n’a niyasi edi warni fuŋ n’abai ɗa par, e miɗini: Za barka, siŋkiyi mini magala na niyi aha sek warni ɗa. Tiyi aga mi zi pɗem suku lai.

²⁵A siŋkiɗi mini magala n’e niyi aha sek warni ɗa, e niyi aha, e fiɗiɗi ɗai na war fuŋ n’abai ɗa edi gaini kaɵkar, amma ɗif n’a siŋkiɗi mini hlai ɗa, e hiniŋ karni, ni gaini pinzibani paŋ.

²⁶Ɗif a hala midini afti na wiiɗi Hititekai, woni ɗa a tika fuŋ n’abai ktai azumai woni, a sini yiki ɓa: Luz. Yiki hanɗa a hina sini fuŋ hanɗa ɵa haa girna

²⁷Ɗai na war pinzibani Manase e kiɗi aŋ tiki fuŋ n’abai na na Bet-Seyan, gaini fuŋ na ɵimani kai, na Taanak gaini fuŋ na ɵimani kai, na Dor gaini fuŋ na ɵimani kai, na Ibleyam gaini fuŋ na ɵimani kai, na Megido gaini fuŋ na ɵimani kai. Kananiyakai haa girna e ɗa midini afti hanɗa.

²⁸Koo hlai na aliɗi Izrayel e bindi gdaŋai tekeɗeɗi, e kiɗi e birgiɗi edi kai, amma e tikiɗi sda zi bege midiɗi.

²⁹Pinzibani Efrayim e kiɗi aŋ birgiɗi Kananiyakai n’e simni war Gezer ɗa edi kai, nɵa e hini arbaɗi pinzibani Efrayim war Gezer.

³⁰Pinzibani Zabulon e kiɗi aŋ birgiɗi Kananiyakai na war Kitron gaiɗi na warɗi Nahalal edi kai. Kananiyakai e hini arbaɗi pinzibani Zabulon, amma e tiki sda zi bege midiɗi.

³¹Pinzibani Aser e kiɗi aŋ birgiɗi ɗai na war Ako gaiɗi na war Sidon, gaiɗi na war Ahlab, gaiɗi na war Akzib, gaiɗi na war Helba, gaiɗi na war Afik gaiɗi na war Rehob ɗa lai edi kaalai.

³²Pinzibani Aser, e zi fuŋ arbaɗi aliɗi Kanaan n’e ɗa midini afti hanɗa. E kiɗi aŋ birgiɗi edi kai.

³³Pinzibani Nefetali e kiɗi aŋ birgiɗi ɗai na warɗi Bet-Semes gaiɗi na war Bet-Anat ɗa edi kai. Amma e tiki sɗa zi bege midiɗi ɗai na Bet-Semes gaiɗi na Bet-Anat. E simni arbaɗi ɵa.

³⁴Amoritekai e cikiɗi pinzibani Dan ɗa amai sini huwuŋ, e hiniɗi aŋ niyisi azumai midini hlai na plas ɗa kai.

³⁵Amoritekai e hini war Har-Heres, war Ayalon, war Salbim lai ɵa ca. Amma, won hlai na pinzibani Yosef e nivi spak li ɗa, e tikiɗi sda zi bege midiɗi.

³⁶Haga na wiiɗi Amoritekai a tikasi pini sini boŋor na Akrabim piɗi futi na dawai par par, a Sela ɗaw, haa edi duɓaɗi par.