Read Mousgoum Paakai zi sariya 10 Bible Online

Paakai zi sariya 10 - Mousgoum bible

Paakai zi sariya 10

¹Asakal mrini Abimelek, Tola n’ahini Puwa na tiyni Dodo, war pinzibani Isakar a fakasi amai buri a kûrɗiɗi aliɗi Izrayel edi, a sumna a Samir amai midini hlai zi huwuŋ na wiini Efrayim.

²A naka a gaŋgalaŋ war Izrayel haa buza caaɓa pi hu, asakal par a mra, e piŋ a Samir.

³Asakalni ni par ɗa, Yayir na Galaad par a fakasi, a za aŋ gaŋgalaŋ warɗi Izrayel haa buza caaɓa pi sulu.

⁴Alini ɗa doogo doogo hu, ablehökaiɗi doogo doogo hu, fuŋɗi n’abakai doogo doogo hu lai, haa girna e yikiŋ ɗa ɓa, fuŋ na wiini Yayir, midini afti na wiini Galaad.

⁵Asakal par Yayir a mra, e piŋ a Kamon.

⁶Aliɗi Izrayel e wiyika aŋ zi wazagai na maafanai arni EPIƊ-ƊAI pra, e tiki piɗi aŋ hûrgi azumai wuzani alawai Baal gaini alawai na falakai Astarte, alawai na wiiɗi ɗai na Siriya gaiɗi alawai na wiiɗi ɗai na Sidon, gaiɗi alawai na wiiɗi ɗai na Mowab, gaiɗi alawai na wiiɗi ɗai n’a Ammon, gaiɗi alawai na wiiɗi Filistrekai lai. E hini EPIƊ-ƊAI edi, e zi ɵeŋni kir kai.

⁷EPIƊ-ƊAI a za hiy siɗi aliɗi Izrayel, a siɗi edi war tiɗi Filistrekai gaiɗi Amonitekai.

⁸Ɗai hanɗa e ziɗi gir arɗi ɗai na Izrayel, e kirpiɗi lai, haa buza doogo pi mitwis. Aliɗi Izrayel n’e ɗika anene duɓani ra Yurdan par, gaini na midini afti na wiiɗi Amoritekai, midini afti na wiiɗi Galaad ɗa lai.

⁹Amoritekai e vigi ra Yurdan buri e hitimi gaiɗi pinzibani Yuda, pinzibani Benyamin gaini pinzibani zibani Efrayim lai. Ɗai na Izrayel e ɗifu war gir n’abai.

¹⁰Ɗai na Izrayel e tuwi sini EPIƊ-ƊAI: Tiyi mi zi meefeŋ suku, mi hini Alaw na wiyi edi mak, mi zi ɵeŋni Baal lai.

¹¹EPIƊ-ƊAI a miɗiɗi wiiɗi aliɗi Izrayel: Ɗai n’Egipte gaiɗi Amoritekai, gaiɗi Amonitekai, gaiɗi Filistrekai,

¹²ɗai na Sidon gaiɗi Amalekekai gaiɗi ɗai na Mahon lai e siɗiki gir arki gara. Won hlai na ki ɗuulisi sa, mu plikisi edi war tiɗi par kai ɗi?

¹³Amma tiki ɗa ki hiniŋa edi, ki zi ɗa a ɵeŋni alawai zamai, aga mu piliki edi kir kai na ɗa burini hanɗa.

¹⁴Hili ki tuwi sini alawai na tiki ki viriŋ ɗa, kapai war girki par ɗa a kurki wiini edi.

¹⁵Ɗai na Izrayel e miɗini wiini EPIƊ-ƊAI: Tiyi mi zi tuwur, za siyi maini na ku dara nɵa, amma za barka, piliyi edi girna su pra.

¹⁶Asakal par e tiki piɗi aŋ tûûri alawai n’edi par n’a na arbaɗi ɗa edi, e wiyi aŋ zi ɵeŋni EPIƊ-ƊAI, gir na e ziŋɗi wiiɗi ɗai na Izrayel ɗa a fiɗini sini EPIƊ-ƊAI gara.

¹⁷Amonitekai e tipi siɗi, e pi kaŋ na wiiɗi midini afti na Galaad, aliɗi Izrayel e diŋgi e pi kaŋ na wiiɗi a Mispa lai.

¹⁸Ɗai gaiɗi n’abakai na war Galaad ɗa, e miɗi arbaɗi marɗi: Ɗif n’aga a faka hatam gaiɗi Amonitekai avut ɗa asiya ɗa? Ɗif hanɗa aga a sumna aŋ pai midiɗi ɗai na war Galaad ɗa paŋ.