Read Mousgoum Paakai zi sariya 11 Bible Online

Paakai zi sariya 11 - Mousgoum bible

Paakai zi sariya 11

¹Yefte na Galaad par a ɗif zi hatam na agulni a huna kai, emini ɗa te muni zi zawar, te waŋ gaini ɗif na e yikiŋ ɓa Galaad.

²Munini Galaad ɗa te wa ali gaini lai, aliɗi muni hanɗa won hlai n’e zi li abakai ɗa e birgi Yefte edi su, e miɗini: Aga ku mula bulum aha war dalam na wiini apumu ɗa kai, buri tuku k’ahiɗi muni zamai.

³Yefte a pra edi wuzaɗi tawalakaini, a hala a sumna midini afti na Tob. Ɗai na nafaɗi kai e tipi sini, e hili edi aŋ hatam piɗi marɗi.

⁴Mefeŋ agwi asakal par, Amonitekai e zi gaw gaiɗi aliɗi Izrayel.

⁵Won hlai na Ammonitekai e ɗa hitimiɗi Izrayel ɗa, n’abakai zi ɵi wuze na war Galaad ɗa e ɵini pini Yefte midini afti na Tob.

⁶E miɗini: Halasi, ku za aŋ abaiɗi askarai na wiyi kapai mu hutumumu gaiɗi Amonitekai.

⁷Yefte a wiyiɗi seŋ wiiɗi n’abakai zi ɵi wuze na Galaad: Ki ɗika ki diriŋa kai, ki birgiŋasi edi war dalamni apa par ki ɗi tiki kai ɗi? Tiyana na ki ɗa war gir ɗa, ki hilisi sa katawai buri maŋ

⁸N'abakai zi ɵi wuze na war Galaad e hilisi e miɗini wiini Yefte: Tiyi, tiyana mi wiyisi puku na ɗa burini hanɗa, mi firiyi ɓa ku hala gaiyi, ku hitimiɗi Amonitekai, ku sumna aŋ abaiyi midiyi tiyi ɗai na war Galaad ɗa kafa.

⁹Yefte a wiyiɗi seŋ wiiɗi n’abakai zi ɵi wuze na wiiɗi Galaad: Na ɓa ki kiɓa li aŋ hitima gaiɗi Amonitekai, na ɓa EPIƊ-ƊAI a siɗi li war ta ɗa, aga mu sumna aŋ pai na wiiki.

¹⁰N'abakai zi ɵi wuze na Galaad e miɗini wiini Yefte: EPIƊ-ƊAI a za aŋ zaida arbamu, na ku muɗaŋ na ɗa aga mi vin amai.

¹¹Nɵa Yefte a hala gaiɗi n’abakai zi ɵi wuze na war Galaad ɗa, ɗai e tikiŋ aŋ pai midiɗi, aŋ abaiɗi askarai na wiiɗi lai. Yefte a waya midini seŋni n’a muɗaŋ ɗa paŋ wuzani EPIƊ-ƊAI war Mispa.

¹²Yefte a ɵina ɗai sini pai na wiiɗi Amonitekai aŋ miɗini maini nɵa: Na mu zuku ɗa a maɗa? Na kapai ku halasi ku hitima aftiŋa ɗa?

¹³Pai na wiiɗi Amonitekai a wiyiɗi seŋ wiiɗi ɗai na Yefte a ɵiniɗisi sini ɗa maini nɵa: A na ɗa ɓa won hlai na aliɗi Izrayel e niyisi edi warɗi Egipte par ɗa, e tiki aftiŋa ɗaw, sini huduk na Arnon par haa sini yem zi ki na Yabbok, haa agoɗam wulani ra na Yurdan ɗa ta lai. Tiyana ɗa, wiyiyisi afti ni ɗa war ɵeɗ.

¹⁴Yefte a ɵina ɗai sini pai na wiiɗi Amonitekai katawai pra,

¹⁵aŋ miɗini ɓa: Yefte a na muɗa maini nɵa: Ɗai na Izrayel ɗa, e tiki afti na wiiɗi ɗai na Mowab ɗa kaalai, na wiiɗi Amonitekai kaalai.

¹⁶Buri ɓa won hlai na aliɗi Izrayel e niyisi edi warɗi Egipte par ɗa, e hilisi ɗa edi war basga na kaɗataŋ ɗaw haa agoɗom wulani yem-ra n’abai zi vayai ɗa ta, asakal par e cû war Kades.

¹⁷Nɵa ɗai na Izrayel e ɵini ɗai sini pai na Edom aŋ siiwiŋ maini nɵa: Za barka, hiniyi mi vigi midini aftiku ɗaw. Amma pai na Edom a firiya a ɵina seŋɗi kai. E ɵiniɗi ɗai sini pai na Mowab, ni a dara kaalai. Nɵa ɗai na Izrayel e hini a Kades ɗuk.

¹⁸Asakal par e wiyi edi war basga na kaɗataŋ, e vigi edi par siɗi Edom gaiɗi Mowab ɗaw, e vigisi tiɗi Mowab piɗi futi na dawai par ɗaw, e pisi edi duɓani huduk na Arnon par tiɓ, e niyisi midini afti na Mowab ɗa kai, buri ɓa Arnon ɗa a haga na wiini afti na Mowab ɗa.

¹⁹Ɗai na Izrayel e ɵini ɗai sini Siyon pai na wiiɗi Amonitekai n’a suma pai wr Hesbon, ɗai na Izrayel e miɗini: Za barka, hiniyi mi vigi midini aftiku ɗaw, kapai mi hili midini afti na wiyi ɗa.

²⁰Amma Siyon a yima seŋɗi ɗai na Izrayel ɗa aŋ jre kai, a siɗi futi aŋ niya midini aftini ɗa kai. A tipiɗisi askarai na wiini ɗa, e pisi a Yatsa par tiɓ buri a hitima gaiɗi ɗai na Izrayel.

²¹Epiɗ-ɗai Alaw na wiiɗi ɗai na Izrayel a sa Sihon gaiɗi ɗaini paŋ tiɗi ɗai na Izrayel, e rɗi amai midiɗi. Ɗai na Izrayel e tiki afti na Amoritekai e ɗika midini paŋ.

²²E tiki afti na wiiɗi Amoritekai sini huduk na Arnon par ta, haa agoɗom mini yem zi ki, edi warni basga na kaɗataŋ par haa agoɗom wulani ra na Yurdan ɗa ta.

²³Na ɓa Epiɗ-ɗai Alaw na wiiɗi Izrayel, a birgiɗi Amonitekai edi wuzaɗi Izrayel na ɗaini ca ɗa, tuku k kiɗa ku birgiɗi edi midini afti hanɗa par ɗi?

²⁴Afti na Kemos Alaw na wiiku a suŋku li aŋ wiiku ɗa, tuku ku yimaŋ aŋ wiiku kai ɗi? Tiyi ɗa, wala n’Epiɗ-ɗai Alaw na wiyi a siɓyi li aŋ wiyi ɗa, aga mi yimiŋ aŋ wiyi kai ɗi?

²⁵Tuku ku suwa Balak na ahini Sippor pai na Mowab ɗa ɗi? Ni ɗa a piyiɗi miɗi ɗai na Izrayel ɗa ɗi? A hitima gaiɗi ɗi?

²⁶Aliɗi Izrayel e simni war Hesbon, gaini fuŋ n’aŋ ɵimani, war Arower gaini fuŋ n’aŋ ɵimani, war fuŋ n’abakai n’aŋ ɵimani huduk na Arnon ta ta ɗa lai. E zi woni na ɗa buza miya hu, fuŋ hanɗa, haa tiyana ki miliŋ edi tiɗi par kai ɗa buri maɗa?

²⁷Mu za meefeŋ suku mu ta kai, ku za meefeŋ sa ku tuku, ku paya aŋ hitimaɓa, EPIƊ-ƊAI n’aga a ziti sariya wiiɗi ɗai ɗa, aga a ziti sariya arbaɗi ɗai na Izrayel gaiɗi Amonitekai tiyana.

²⁸Amma pai na wiiɗi Amonitekai a dara a ɵina seŋ na Yefte a miɗiŋni kai.

²⁹Nɵa Seze na wiini EPIƊ-ƊAI a sumna niya sini Yefte. Yefte a vuga midini afti na Galaad gaini Manase, a vuga a Mispe na war Galaad ɗa ɗaw, woni par a sirɓa midini afti na wiiɗi Amonitekai.

³⁰A miɗini wiini EPIƊ-ƊAI maini nɵa: Na ɓa ku siɗiŋa li Amonitekai war ta ɗa,

³¹Won hlai na mu rɗasi li amai midiɗi Amonitekai war hatam, ɗif paŋ na aha warɗi pakataiɓa par n’a niyasi li edi ma avut won hlai na mu na wayasi aha sek ɗa aga mu za ɓaka zi yi gaini wiini EPIƊ-ƊAI.

³²Yefte a niya aha piɗi Ammonitekai aŋ hitimiɗi, EPIƊ-ƊAI a siɗi war tini.

³³A fiɗiɗi viya gara, a Arower par haa Minit ta, fuŋ n’abakai a za caaɓa ɗi, haa a Abel- Keramim. Amonitekai e tiki siyer wuzaɗi aliɗi Izrayel.

³⁴Won hlai na Yefte a na wayasi aha sek war Mispa ɗa, te niyasi edi mini gaini gaŋga, gaini didimi lai ɗa t'ahini na muni ɗa, te na ktai pal, ahini zamai aŋ kir kai.

³⁵Won hlai n’a tiliti a ɓasa sapa na sini edi a muɗa: Ay, ahiya, buriku tuku ɗa mu sda wala na mu zaŋ ɗa kir kai, ku kaɓa li war gir, buri mu za ɵinini-ha wiini EPIƊ-ƊAI ta, mu kiɗa mu pla ma kir kai.

³⁶Ahini te miɗini: Apa, na ɓa ku zasi ɵinini-ha wiini EPIƊ-ƊAI ta ɗa, za sa maini na ku hiinaɓsi ɗa nɵa, buri EPIƊ-ƊAI a suku rɗi n’amai midiɗi gawku na Amonitekai.

³⁷Te miɗini wiini epiɗi pra: Mu dara mu zilba wala ktai tuku, ku saŋa tile sulu kapai mu hala amai midini huwuŋ gaiɗi marmakaya aŋ tuwi buri mu mrafu na ɗa ɓulmi.

³⁸A waya seŋ a miɗiɗi: Hala wiiku, a siɗi tile sulu. Te hala amai midini huwuŋ gaiɗi marmakaiɗi na falakai aŋ tuwi buri te mrafu na ɗa ɓulmi.

³⁹Won hlai na tile na sulu a vada li ɗa, te wayasi sini epiɗi, a za siɗi maini n’a za ɵinini-ha wiini EPIƊ-ƊAI ɗa nɵa. Te tapa gaini wusduk kai, sini mefeŋni par wala hanɗa a bunda aŋ gadai aha warɗi Izrayel.

⁴⁰Buza buza paŋ, falakai na warɗi Izrayel ɗa, e hili e tuwiti ahini Yefte na Galaad par haa mefeŋ puɗu.