Read Mousgoum Paakai zi sariya 13 Bible Online

Paakai zi sariya 13 - Mousgoum bible

Paakai zi sariya 13

¹Aliɗi Izrayel e wiyika aŋ zi wazagai na maafanai arni EPIƊ-ƊAI pra, EPIƊ-ƊAI a siɗi war tiɗi Filistrekai haa buza doogo doogo puɗu.

²Ɗif ktai a nafu a Sora war piɗi humuni na wiini Dan, yikini ɓa Manuwa, munini te nafu muɗaŋ, te wa ahi kai.

³Sleŋ na wiini EPIƊ-ƊAI a siŋka sini arɗi muni hanɗa a miɗiɗi: Tuku na muɗaŋ, na ku wa ahi kai, aga ku tika fel, aga ku wa ahi;

⁴tiyana na ɗa mu siiwuku, ku za hangal, aga ku ca vin kaalai, ku ca sul zamai zamai kaalai, ku suma wala na hi-hir kaalai.

⁵Buri ɓa aga ku tika fel, aga ku wa ahi, aga e fiɗi ayir na midini edi kai. Buri ɓa arwagwi hanɗa aŋ gaini viri edi ɗaw wiini Alaw haa war gutɗi emini par. A ni n’aga a kûrɗiɗi aliɗi Izrayel edi war tiɗi Filistrekai par.

⁶Muni te halasi te miɗini wiini mafaɗi ɓa: Ɗif na wiini Alaw ktai a halasi sa, a sɗa maini ɵeŋ na wiini Alaw nɵa, won hlai na ku talaŋ li ɗa, hunai a yumuku. Mu zilba hlai n’a halasi woni ar kaalai, a siɓkaɓa yikini kaalai.

⁷A muɗaŋa maini nɵa: Aga ku tika fel, aga ku wa ahi, tiyana par ɗa, ku ca vin kai, ku ca sul zamai zamai kai, ku suma wala na hi-hir kaalai, buri ɓa ahi hanɗa aŋ gaini viri edi ɗaw wiini Alaw amlai warni gutɗi emini par haa sini mrini ta.

⁸Manuwa a siiwa EPIƊ-ƊAI maini nɵa: Ku za barka EPIƊ-ƊAI, mu na siiwuku, ɗif na wiini Alaw na ku ɵinaŋsika avut ɵa ɗa a wayasi siyi aŋ hitriyi midini wazagai n’aga mi ziŋ sini arwagwi n’aga a wa ɗa.

⁹EPIƊ-ƊAI a ɵna siiwa na wiini Manuwa, ɵeŋ na wiini Alaw a wayasi siɗi muni ɗa, te nafu gaini simni edi war baŋa dam, Manuwa na mafaɗi a nafu gaiɗi kai.

¹⁰Te lawa sini mafaɗi tizaw tar te miɗini: Ɗif n’avut a halasi sa ɗa a wayasi a siŋka sini ara pra,

¹¹Manuwa a hala piɗi munini, a nava ɗif ɗa, a zilbaŋ a muɗa: Ku muɗaka gaiɗi muni hanɗa ku tuku ɗe? A waya seŋ, a kam, mu ta.

¹²Manuwa a miɗini: Tiyana ɗa, na ɓa seŋ na ku muɗaŋ na ɗa a va li amai ɗa, gadai n’aga mi ɗiyi midini, n’aga mi zi pini lai ɗa, a na wata ɗa?

¹³Sleŋ na wiini EPIƊ-ƊAI a wiyini seŋ a muɗa: Muni ɗa aga te ɗala siɗi war wazagai na mu miɗiŋɗi paŋ.

¹⁴Aga te tetema alini luwuŋ zi vin ɗa miɗi kai, aga te ca vin ɗa kai, te ca sul zamai zamai kai, te suma wazagai na hi-hir kai, wazagai na mu miɗiŋɗi paŋ te za pini paŋ.

¹⁵Manuwa a miɗini wiini ɵeŋ na wiini EPIƊ-ƊAI maini nɵa: Za barka, hala kai haw, mi hili mi dikusi ahini hek ktai yit.

¹⁶Sleŋ na wiini EPIƊ-ƊAI a miɗini wiini Manuwa: Koo ɓa ku dalaɓa ɗi, aga mu suma simi na tuku par kai. Amma na ɓa ku firiya ku za ɓaka zi yi wiini EPIƊ-ƊAI ɗa, za hanɗa. Manuwa a sɗa ɓa a ɵeŋ na wiini EPIƊ-ƊAI ɗa, a sɗa ɵa kai.

¹⁷Nɵa Manuwa a zilba ɵeŋ na wiini EPIƊ-ƊAI maini nɵa: E yikuku maɵa ɗa? Siŋkaŋŋa ta, kapai tiyi mi kiɗi buri mi si kol suku won hlai na seŋku a va li amai ɗa.

¹⁸Sleŋ na wiini EPIƊ-ƊAI a wiyini seŋ: Ku zilba yikiŋa buri ma ɗa? A yiki a juf gara.

¹⁹Manuwa a yima ahini hek gaini ɓaka na gaini alini seyem, a za ɓaka zi yi gaini amai huwuŋ wiini EPIƊ-ƊAI, n’a za wazagai n’a bunda ɗif hiyak. Manuwa gaiɗi munini e hini ca aŋ tili.

²⁰Won hlai na elesni afu na war gûwiŋ zi ɓaka par a na hala amai war fuŋni Alaw sek, ɵeŋ na wiini EPIƊ-ƊAI a yima amai arbani elesni afu hanɗa. Won hlai na Manuwa gaiɗi munini e tili wala hanɗa, e yiki azumai, arɗi gaini pi azumai midini afti.

²¹Nɵa ɵeŋ na wiini EPIƊ-ƊAI a wayasi aŋ siŋka sini arni Manuwa na gaiɗi munini kir kai, nɵa a yima midini Manuwa ɓa, ni ɗa a ɵeŋ na wiini EPIƊ-ƊAI.

²²Manuwa a miɗiɗi wiiɗi munini: Aga mu murumu koo, buri mu tulumu Alaw gaini armu ɓa.

²³Munini te wiyini seŋ: Na ɓa EPIƊ-ƊAI a paya piyi aŋ fuɗumu ɗa, aga a yima ɓaka zi yi gaini ɓaka na gaini alini seyem na wiimu kai, aga a siŋka wazagai hanɗa paŋ ɗa armu kaalai, aga a muɗumu wazagai na maini hanɗa ɵa kaalai.

²⁴Muni te wa ahi, te sini yiki ɓa Samson. Ahiyagwi a wula amai, EPIƊ-ƊAI a ɓakaŋ lai.

²⁵Seze na wiini EPIƊ-ƊAI a tika pini aŋ za sda gaini war Mahane-Dan, arbaɗi Sora gaiɗi Estahol.