Read Mousgoum Paakai zi sariya 14 Bible Online

Paakai zi sariya 14 - Mousgoum bible

Paakai zi sariya 14

¹Samson a hala Timna, woni a niviti ɓulmi ktai arbaɗi aliɗi Filistrekai.

²Won hlai n’a wayasi woni par, a miɗini wiini epini gaiɗi emini maini nɵa: Mu tilitisi ahiyagwi ktai arbaɗi ɓulamai na Filistrekai, mu firiya ɓa ki tikitiɓa aŋ muni.

³Epini gaiɗi emini e miɗini: Arbaɗi aliɗi ɗaiku gaini pini zibaku ɗa, ɓulamai e ɗi kai ɗi? Na kapai ku hala haa ku tikasi muni arbaɗi Filistrekai na gazɗaɓai hanɗa par ɗa. Samson a wiyini seŋ wiini epini: Tikitiɓa wiiku, buri ɓa te na ara a yimiti ɗa.

⁴Epini gaiɗi emini e siɗi ɓa wala hanɗa a na sini EPIƊ-ƊAI par kai, buri ɓa a paya na ɗa a futi buri seŋ a za arbani gaiɗi Filistrekai kapai e hitimi marɗi, buri war sarti ni ɗa, Filistrekai e ɗifu aŋ ɓi midiɗi Izrayel.

⁵Samson, gaini epini gaiɗi emini lai e hili war Timna, won hlai n’e cû gobi gaini luwuŋ zi vin n’aŋ war Timna ɗa, gurnai na gawla a niyasi edi mini, a nuuma, a praɓsi.

⁶Seze na wiini EPIƊ-ƊAI a niya sini Samson, Samson ɗa wala ktai tini kai, amma a ɓasa gurnai ɗa edi arba ca maini n’e ɓisi ahini hek nɵa. Amma wala n’a zaŋsi a miɗini wiini epini gaiɗi emini gaini kai.

⁷Asakal par a kiti morkoini haɗa kalaŋ gaiɗi ahiyagwi ɗa, te zuva arni gara.

⁸Mefeŋ agwi asakal par, a waya war Timna aŋ tikitisi ahiyagwi ɗa aŋ munini, a vuga ɗawwa aŋ tala kopoŋni gurnai n’a fuɗaŋ ɗa, amlai warni kopoŋni gurnai ɗa, a niviti ami gaini tiki ta, te za emel ta lai.

⁹A lika emelni ami tini agwi a suma pini won hlai n’a na hala ɗa. A cosi sini epini gaiɗi emini ɗa, a siɗi e simi lai. Amma a miɗiɗi ɓa a likasi emelni ami war kopoŋni gurnai par, a miɗiɗi nɵa kai.

¹⁰Epini a hala siɗi ahiyagwi ɗa, woni hlai ni ɗa, Samson a za fet n’abai burini tiki maini na gawlakai e ɗa ziŋ ɗa nɵa.

¹¹Won hlai na Filistrekai e tiliŋ, e virisi gawlakai doogo doogo hu buri e hili gaini.

¹²Samson a miɗiɗi: Mu dara mu miɗiki seŋ joro ktai, na ɓa war mefeŋ na muguzak na wiini fet hanɗa, ki niviŋ li, ki siɓkiɓa ezini edi li lai ɗa, aga mu siki sapa zi fet doogo doogo hu, sapakai zamai doogo doogo hu lai.

¹³Amma na ɓa ki kiɗi aŋ siɓkiɓa ezini edi kai ɗa, tiki aga ki siŋa sapa zi fet doogo doogo hu, sapakai na zamai doogo doogo hu lai. Nagai e miɗini: Muɗa seŋ joroku haw ka, mi ɗa biyiŋ

¹⁴A miɗiɗi: Wala zi simi a niyasi edi war wala zi limi wazagai ɗa par, wala na nem a niyasi edi warni wala na gdaŋ par, a dara a muɗa maɵa ɗa? E zi haa mefeŋ hu, e kiɗi e siŋki ezini seŋ joro hanɗa edi kai.

¹⁵War mefeŋ n’ag'aŋ muguzak ɗa, gawlakai e miɗiɗi wiiɗi marmakaini samson ɗa: Hala duula mofaku ɗa, kapai a siŋkiyi ezini seŋ joro na wiini ɗa edi, ɵa kai ɗa, aga mu buluku arni afu, tuku gaiɗi ɗai n’ahaku paŋ. Ku yikiyisi miɗi fet ɗa ɓa kapai ku mula wazagaiyi ɗi?

¹⁶Marmaini Samson te tika piɗi te tuwa pini, te hinaŋ a suŋfa kai, te miɗini maini nɵa: Kapai tuku ku firiyaɓa kai, ku miɗiɗi seŋ joro wiiɗi ɗai haia ta, amma ku siɓkaɓa ezini edi kai. Amma a waya seŋ a miɗiɗi: Mu siŋka ezini seŋ hanɗa edi wiini apa kaalai, wiiɗi ama kaalai, kapai mu suŋkuŋku wiiku tuku kiɗi ö

¹⁷Te tuwa pini ɵa haa mefeŋ muguzak na wiini fet ɗa a vada. Amma war mefeŋ n’ag'aŋ muguzak ɗa, a siŋkiɗi ezini seŋ hanɗa edi, buri ɓa te na kayaŋ gara. Nɵa asakal par te siŋkiɗi ezini seŋ joro hanɗa wiiɗi ɗai haɗi ta.

¹⁸War mefeŋ n’ag'aŋ muguzak, won hlai na futi te ɓa ta aŋ nawa ɗa, ɗai na war fuŋ n’abai ɗa par e hilisi e miɗini wiini Samson: Wala na nem n’a suwa emelni ami a na ɗi? Wala na gdaŋ n’a suwa gurnai a na ɗi? A miɗiɗi: Na ɓa ki hirmifu gaiɗi ɵaiɓa kai ɗa, ki kiɗi ki nivi seŋ joro na mu miɗiŋki kai.

¹⁹Nɵa Seze a wiini EPIƊ-ƊAI a niya sini Samson, a hala war Askelon a fuɗa ɗai doogo doogo hu, a mula sapa zi fet na siɗi edi, a hinasi kopoŋɗi gaɓala, a sa sapa hanɗawiiɗi nagai na e siŋkini ezini seŋ joro ɗa edi ɗa. A wayasi ahani epini war hiy n’abai.

²⁰Marmaini ɗa, a sitini wiini marmaini na gaini ɗa ta.