Read Mousgoum Paakai zi sariya 15 Bible Online

Paakai zi sariya 15 - Mousgoum bible

Paakai zi sariya 15

¹Mefeŋ yaw asakal par, war sarti na wiini hiɗi na wiini algama, Samson a hala aŋ duguliti marmaini gaini ahi hek pini kaai. A muɗa: Mu firiya mu niya amlai ahaɗi marmaya ɗa, amma epiɗi marmaini a sini futi aŋ niya amlai kai.

²Epiɗi marmaini a muɗa: Mu hiina ɓa ku firiyiti a firiyi kir kai, mu sitini wiini maiku na gaiku ta. Tawalɗi n’agwi ɗa te zuva te sûwiti na pra, mu siiwuku ku tikiti wiiku eziɗi maiɗi ɗa.

³Samson a miɗiɗi: Tiyana ɗa, na ɓa mu za wala na meefeŋ li siɗi Filistrekai ɗa, meefeŋŋa warni kai.

⁴Asakal par, a hala wiini, a yima huɗi miya hu, a rga gɗerni mini marni ɓak ɓak, a rga kalu z'afu arbani ɓak ɓak lai.

⁵A tika afu mini kalu z'afu ta ta, a hina huɗi ɗa arbani algama na wiiɗi Filistrekai, a ya algama na gaini pi amai tiɓ tiɓ gaini n’amai gaini ezini waŋ lai edi haa sini luwuŋ olive ɗa paŋ.

⁶Filistrekai e zilbi e miɗi: N'a za hanɗa asiya ɗa? Ɗai e wiyi seŋ e miɗi: A Samson, na suwulni ɗif na Timna ɗa. Buri ɓa suwulni a yimiti ahini, a sitini wiini maini Samson na gaini ta. Nɵa Filistrekai, e hili e yiti edi gaini epiɗi paŋ.

⁷Samson a miɗiɗi: Na ki ziŋ maini hanɗa ɵa ɗa, na ɓa mu ziki wala na meefeŋ kai ɗa, aga mu hiniki kai.

⁸A cikiɗi aha kas, a rɗa amai midiɗi marwai, asakal par a yima sini edi war huduk na sini huwuŋ na Etam.

⁹Nɵa Filistrekai e hilisi e pi kaŋɗi war Yuda, e giri haa a Lehi ta.

¹⁰Ɗai na Yuda e miɗiɗi: Ki hilisi buri maɗa? E wiyi seŋ e miɗi: Mi hilisi aŋ nigi Samson kapai mi zi sini maini n’a za siyi tiyi ɗa nɵa.

¹¹Nɵa ɗai dubu hu na Yuda par e hili war huduk na sini huwuŋ na Etam, e miɗini wiini Samson maini nɵa: Ku sɗa ɓa, Filistrekai e ɓi mudumu na ɗa e ɗi nagai kai ɗi? Na ku ziyi ɵa ɗa a maɗa? A wiyiɗi seŋ a muɗa: Mu za siɗi maini na nagai e ziŋ sa ɵa.

¹²Nagai e miɗini: Tiyi mi hilisi ɗa aŋ rguku kapai mi suku tiɗi Filistrekai ɗa. Samson a wiyiɗi seŋ: Hiŋa wala miki ɓa aga ki fiɗiŋa kai.

¹³E wiyi seŋ e miɗini: Zaw kai, mi firiyi mi rguku ɓak, mi suku war tiɗi ta, aga mi fuɗuku edi kai. E rgiŋ gaini sogom na hahakai sulu, e yimiŋsi amai war huduk na sini huwuŋ par.

¹⁴Won hlai n’a co a Lehi, Filistrekai e hilisi mini gaini ɗuwal zi firyi. Nɵa Seze na wiini EPIƊ-ƊAI a niya sini. Sogom n’e rgi tini gaini a bunda maini len na gaini yi gaini afu nɵa, sogom na wulani tini ɗa a pla a yaka edi.

¹⁵Samson a nava papalaɓni ablehö, n’e fiɗiŋ e fiɗi hai, a wa tini, a tikaŋ tini ɗaw, gaini hanɗa a fuɗa ɗai dubu ɗaw.

¹⁶Samson a muɗa: Gaini papalaɓni ablehö, ablehö na maini marni ɵa lai, gaini papalaɓni ablehö, Mu fuɗa ɗai dubu ɗaw.

¹⁷Won hlai n’a vada gaini seŋni zi miɗi ya, a bula papalaŋ hanɗa edi, a sini yiki ɓa, Ramat-Lehi.

¹⁸Sai te suwa gdaŋni gara, a siiwa EPIƊ-ƊAI a muɗa: Rɗi n’amai n’abai hanɗa ku vaŋ amai gaya ta na ɵeŋku ɗa ku tuku, kapai tiyana sai te suwaɓa ɵa haa mu kɵa war tiɗi gazɗaɓai hanɗa su ɗi?

¹⁹Alaw a ɓisiti avai na t'aŋ warɗi Lehi ɗa, yem a niyasi edi warni par lai, Samson a caŋ, hangalni a wayasi sini, a nava gdaŋ. Buri nɵa e sini yiki wiini hlai zi liwi yem hanɗa ɓa: Ein-Kore, a dara a muɗa: Hlai zi liwi yem na wiini ni n’a paya zinai. Avai hanɗa t'aŋ war Lehi haa girna ta.

²⁰Samson a bunda aŋ gaŋgalaŋ zi spak warɗi Izrayel war mefeŋ na wiiɗi Filistrekai, a za buza caaɓa war sda hanɗa.