Read Mousgoum Paakai zi sariya 16 Bible Online

Paakai zi sariya 16 - Mousgoum bible

Paakai zi sariya 16

¹Samson a hala war Gaza, a niviti muni zi zawar ktai, a fana gaiɗi.

²Labar a co siɗi ɗai na Gaza ɗa ɓa, Samson a halasi aŋ woni na. E gûnisi hlai azumai, e fini aŋ riɓtiŋ anene mini porte na mini fuŋ n’abai ɗa par. Duvuk ɗa, e simni gaini hangalɗi, e miɗi: Hlai a sɗasi li edi ɗa aga mu fuɗuɓmu.

³Samson a kala weseŋ haa duvuk n’arba ta. Won hlai na duvuk n’arba a za li ɗa, a fakasi amai, a yima porte na mini fuŋ n’abai ɗa gaini luwoŋai n’e piŋ azumai gaini ɗa, a hurɗaŋ amai, gaini kawai n’e ɵi mini gaini paŋ. A mulaŋ wulani, a kaŋ amai merfeŋɗi huwuŋ na te na wuzaɗi Hebron ɗa.

⁴Asakal hanɗa a diriti muni ktai war huduk na Sorek, yikiɗi ɓa: Dalila

⁵N'abakai na midini afti na wiiɗi Filistrekai e hilisi siɗi e miɗiɗi: Hala, ku duulaŋ gaini hangal kapai mu suɗumu hlai n’a navasi gdaŋ woni par ɗa, dabarai na kapai mu zuŋmu aŋ rɗumu amai midini gaini lai. Nɵa aga mi rgiŋ, mi ɓi midini, tiyi ɗa, ɗif paŋ aga a suku sulai zi arzaŋ dubu gaini miya ɗaw.

⁶Dalila te miɗini wiini Samson: Za barka, muɗaŋa haw, gdaŋku n’abai hanɗa, ku navaŋsi wata par ɗa? Kapai ɗif a rɗa amai muduku ɗa, e rguku gaini a maɗa?

⁷Samson a wiyiɗi seŋ: Na ɓa e rgiŋa li gaini sogom na hirnaŋ muguzak na e nigi ta gaini, n’a huula kai hai ɗa, aga mu bunda huruf kal kal maiɗi ɗai zamai ɗa ɵa lai.

⁸N'abakai na midini afti na wiiɗi Filistrekai e kiɗisi sogom na hahakai muguzak n’a huula kai hai wiiɗi Dalila, te mulaŋ, te rgaŋ gaini.

⁹Te ŋûyiɗi Filistrekai zamai amlai ɵimani cok, te miɗini wiini Samson: Samson, Filistrekai e ɗa amai muduku aŋ yumuku. Nɵa Samson a rawa sogom na tini ɗa, maini sogom na afu a ɗuklaŋ nɵa. Nɵa, wala n’a sini gdaŋ ɗa a nava kai.

¹⁰Dalila te miɗini wiini Samson: Ku duulaŋa ɗa a duli, seŋ na ku muɗaŋa ɗa a jre kai. Tiyana mu siiwuku, muɗaŋa haw, e rguku tiɓ gaini a maɗa?

¹¹Samson a wiyiɗi seŋ: Na ɓa e rgiŋa li gaini sogom na hehe na ɗif a za ka sda gaini duk kai ɗa, aga mu bunda huruf maiɗi ɗai na doogo ɗa nɵa.

¹²Dalila te mula sogom na hahakai te rgaŋ gaini. Asakal par te muɗa: Samson, Filistrekai e ɗa amai muduku aŋ yumuku. Filistrekai zamai e ɗifu amlai warɗi dilimi gaini ŋûyi cok. Samson a rawa sogom na tini ɗa maini wala n’agwi kadai nɵa.

¹³Dalila te miɗini wiini Samson: Haa tiyana ku duulaŋa na ɗa gaini duli ɵa, seŋ na ku muɗaŋa ɗa a na jre kai, muɗaŋa haw, e rguku ɗa gaini a maɗa? A wiyiɗi seŋ: Ku lufa ayir na mada ɗa muguzak gaini sapa na ku na zaŋ ɗa, na ɓa ku tokoŋ li sini hlai gaini tuku tok lai ɗa, aga mu bunda huruf maiɗi ɗai na zamai ɗa ɵa lai.

¹⁴Te zaŋ haa weseŋ a yimaŋ, te lfini ayir na midini muguzak gaini sapa na te zaŋ ɗa, te ɓalaŋ azumai gaini wala ɓal, asakal par t muɗa: Samson, Filistrekai e ɗa amai muduku aŋ yimuku. Nɵa a ɵiyasi amai war weseŋ par, a rɗasi wala na te ɓalaŋ azumai ɗa amai, gaini wala na te ha sapa gaini ɗa, gaini sapa na te zaŋ ɗa lai.

¹⁵Dalila te miɗini: Ku muɗaŋa ɓa ku daraɓa, paŋ ktai ku saŋa warku kai. Ku duulaŋa na ɗa azi hu, hlai na gdaŋku n’abai a halasi woni par ku muɗaŋa kai.

¹⁶Won hlai na te na huwuyaŋ mefeŋ paŋ gaini seŋ hanɗa, te hinaŋ a suŋfa kai ɗa, a kaya tiɗi su.

¹⁷A siɗi warni a muɗa: Ayir na mada na ɗa, e fiɗiŋka edi duk kai, buri ɓa e siŋa edi wiini Alaw ta, haa won hlai na m’aŋsi warɗi ama par hai; Na ɓa mu fuɗa mada li edi ɗa, gdaɓɓa aga a vada edi, mu bundafu huruf maiɗi ɗai na zamai ɵa lai.

¹⁸Won hlai na Dalila te tala ɓa, na warni te navaŋ li ɗa, te ɵina piɗi n’abakai na midini afti na wiiɗi Filistrekai te miɗiɗi: Tiyana ɗa hilisi, buri ɓa n’aŋ warni ɗa, mu navaŋ ya. Nɵa n’abakai na midini afti na wiiɗi Filistrekai e hilisi ahaɗi, e kiɗisi farai ɗa.

¹⁹Te fanaŋ azumai midini eziɗi waŋ, te zaŋ haa a kala weseŋ. Asakal par te yikasi ɗif ka, a faɗa midini n’aŋ gaini lifi muguzak ɗa edi, te tika piɗi aŋ ɓa midini, gdaŋni ɗa a yima edi sini par.

²⁰Nɵa te miɗini: Samson, Filistrekai e ɗa amai muduku, e ɗa yimuku. A ɵiyasi azumai par war weseŋ war hiini na ɓa: Aga mu fuɗa was maini na ɗipar ɵa, aga mu pla sa edi. A sɗa ɓa EPIƊ-ƊAI aiima sini edi sini par kaai kai.

²¹Filistrekai e yimiŋ, e cuni arni, e kiŋ war Gaza, e wiini pokolom zi kiya ezini, amlai warɗi daŋgai ɗa, e zini dewele midini buri a sara algama gaini ahi-fuŋ n’abai na wulla.

²²Amma asakal na e fiɗini ayir na midini edi par, ayir a tika pini a diyasi katawai.

²³Mefeŋ ktai, n’abakai na midini afti na wiiɗi Filistrekai e diɓgisi buri e zini ɓaka n’abai wiini Dagon alaw na wiiɗi, buri e zi fet na wiini rɗi n’amai. E miɗi maini nɵa: Alaw na wiyi a siyi Samson na gawyi war tiyi ta!

²⁴Won hlai na ɗai e tili Samson ɗa, e zini yama zi kol sini alaw dagon na wiiɗi maini nɵa: Alaw na wiimu a sumu gawmu war tumu, ni n’a naka a tuura a bunda aftimu edi greŋ, n’a naka a fuɗa ɗai arbamu par viya gara.

²⁵Won hlai agulɗi a va gaini firiyi, e miɗi: Yikumusi Samson ɗa ka, a halasi a ɵumu dawaŋ mumu agwi. E yikisi Samson, e yimiŋsi edi war daŋgai par, a tika pini aŋ ɵiɗi dawaŋ miɗi, e ɗiyiŋ arbani gaarakai na warni tempel na wiini alaw dagon ɗa zaw.

²⁶Samson a miɗini wiini gawla n’a kinisi pini ɗa maini nɵa: Kaɓa sini gaarakai na spakni tempel ɗa a ɗiya midini ɗa, kapai mu tetemaŋ, mu ɗiya sini lai.

²⁷Tempel ɗa a va gaiɗi ɗai, maɵagai gaiɗi falakai, n’abakai na midini afti na wiiɗi Filstrekai paŋ e ɗifu woni. Ɗai n’e ɗifu woni ɗa, na maɵagai gaiɗi na falakai paŋ e zi gobi dubu hu, n’e ɗiyisi amai par midini daba zi mili aŋ tili dawaŋ na Samson a ɵaŋ ɗa.

²⁸Samson a siiwa EPIƊ-ƊAI a muɗa: Epiɗ-ɗai Alaw, za barka, hina muduku a wula gaya kai, sa gdaŋ war yuvai na girɓa ɗa Alaw, kapai mu ziɗi meefeŋ wiiɗi Filistrekai burini ara na e cuɓɓa ɗa.

²⁹Samson a tetema gaarakai na sulu n’arba na spakni tempel ɗa a ɗiya midini ɗa, a hûgûti na ktai gaiɗi tini na wus, na ktai gaiɗi tini na muni lai.

³⁰A muɗa: Mu mra wiya gaiɗi Filistrekai kiɗi, A hogoŋ gaini gdaŋni, tempel ɗa a haɗasi azumai midiɗi n’abakai na midini afti na wiiɗi Filistrekai gaiɗi ɗai n’e ɗi woni paŋ. Ɗai na e mri gaini ktai ɗa, viyaɗi ɗa e sûwiɗi nagai n’a fiɗiɗi woni hlai n’a naka karni ɗa.

³¹Tawalakaini gaiɗi tamaini e hili e tikisi kopoŋni ɗa, e hilisi gaini, e piŋ warni waŋ na wiini Manuwa n’epini, arbaɗi Sora gaiɗi Estahol. A nafu a gaŋgalaŋ zi spak warɗi Izrayel haa buza caaɓa.