Read Mousgoum Paakai zi sariya 18 Bible Online

Paakai zi sariya 18 - Mousgoum bible

Paakai zi sariya 18

¹War mefeŋni ɗa, pai a nafu aha warɗi Izrayel kai, war sarti ni lai pinzibani Dan ɗa e ɗifu aŋ piyi afti zi bulum na kapai e simni woni ɗa, buri ɓa haa sini mefeŋ ni ta e nivi afti zi bulum arbaɗi pini zibaɗi Izrayel ɗa kai.

²Pinzibani Dan ɗa, e ɵini ɗai arbaɗi par ɵim, e ɗi ɗai zi hatam na agulɗi a huna kai ɗa. E ɵiniɗisi war Sora gaiɗi Estahol par buri e gûnisi midini afti, e tiliɓsi gaini futini lai. E miɗiɗi: Hili tilisi afti gaini futini. E cû midini hlai zi huwuŋ na wiini Efrayim ahani Mika, e fini woni lai.

³Won hlai n’e cûsi gobi sini dalamni Mika ɗa, e ɵini wulani gawla na Levit n’a na muɗa seŋ ɗa, e hili sini e zilbiŋ, e miɗi: A kukusi woni na ɗa a maɗa? Ku za woni na ɗa a maɗa? Wala n’a na ɗuluku woni na ɗa a maɗa?

⁴A waya seŋ a miɗiɗi: Mika a za sa nɵa nɵa, a saŋa vrak ta lai kapai mu sumna ahani, tiyana mu na aŋ pai zi ɓaka na wiini.

⁵Nɵa e miɗini: Za barka zilba dirini Alaw buriyi haw, kapai mi siɗi, na ɓa morkoi na t'aŋ wuzaɗi ɗa aga te ɵa edi pɗemi zaw pɗemi kai ɗi ɗa.

⁶Pai zi ɓaka a wiyiɗi seŋ: Ki hili jam, morkoi na ki kiti na ɗa arni EPIƊ-ƊAI aŋ miɗiki.

⁷Ɗai na ɵim ɗa e hili e cû a Lais, e niviɗi ɗai na woni ɗa, huwiyi siɗi kai maiɗi ɗai na war Sidon ɗa nɵa, ɗif ktai na ɵimani n’a huwiyiɗi aŋ kai, ɗif n’a kirpiɗi aŋ kaalai, arbaɗi gaiɗi Sidon ɗa gaigai, wala ktai atipiɗi gaiɗi kaalai.

⁸E wiyisi siɗi tawalakai war Sora gaiɗi Estahol. Tawalakaiɗi ɗa e zilibiɗi, e miɗiɗi: Ki miɗi maɵa ɗa?

⁹E wiyi seŋ e miɗiɗi: Hulumu cukuɗumu ɗai na Lais ɗa, mi tilisi aftiɗi ɗa a afti na pɗem gara. Warki a yimaŋ kai ɗi? Ki zi siki faalakai kai, fiki amai hulumu aŋ tiki afti hanɗa!

¹⁰Won hlai na ki cû li woni ɗa, aga ki niviɗi ɗai na huwiyi ktai maa siɗi kai, aftiɗi ɗa a na abai, Alaw a siŋki war tiki ta. Hlai ni ɗa wala na midini yai ktai n’aŋ warni kai ɗa aŋ kai.

¹¹Nɵa, ɗai miya ɵaara na war piɗi humuni na wiini Dan, e fiki war Sora gaiɗi Estahol par gaini wazagaiɗi zi hatam gaini nigi wuzaɗi.

¹²E hili e pi kaŋ na wiiɗi war Kiriyat-Yeyarim midini afti na Yuda, buri nɵa, haa girna e yiki hlai hanɗa ɓa: Mahane-Dan, aŋsi ka duɓaɗi Kiriyat-Yeyarim,

¹³woni par e vigi hlai zi huwuŋ na wiini Efaiim ɗa vug, e cû ahani Mika.

¹⁴Nɵa ɗai na ɵim n’e hili e gûnisi midini afti na Lais ɗa, e miɗiɗi wiiɗi tawalakaiɗi maini nɵa: Dalam n’aŋ tiki na ɗa, Ki siɗi ɓa alaw zi rgi gaini alawai n’agogoi n’e miliŋ amlai wrni dalam, gaini alaw zi rgi gaini kaai zi hiliyi ɗi? Nɵa tiyana ɗa, zi na ki sɗiŋ ɗa.

¹⁵Nɵa ɗai na ɵim, e hili ahani Mika, e niyi amlai sini gawla na Levit ɗa, e zilbi jam na sini.

¹⁶Ɗai na miya ɵaara ɗa na war pinzibani Dan par, e ɗiyi anene mini hlai par gaini eziɗi ca ca, wazagaiɗi zi hatam wuzaɗi gaini rgi ɓak ɓak.

¹⁷Ɗai na ɵim n’e hili e gûnisi afti, e niyi amai war etas, e niyi amlai war dalam, e mili alawai zi rgi gaini alawai zi rgi n’agogoi n’e miliŋ amlai war dalam gaini alaw n’e ziziniŋ gaini kawai zi hiliyi, won hlai na pai zi ɓaka ɗa, aŋsi anene mini h lai gaiɗi ɗai na miya ɵaara na gaini wazagaiɗi zi hatam gaini rgi wuzaɗi ɗa.

¹⁸Won hlai n’a tiliɗi ɗai e niyi amlai warɗi dilimi na wiini Mika, e milisi alawai zi rgi gaini alawai n’agogoi n’e miliŋ amlai warni dalam, gaini alaw zi rgi n’e ziziniŋ gaini kawai zi hiliyi ɗa, pai zi ɓaka a miɗiɗi: Ki zi ɵa ɗa a maɗa?

¹⁹E wiyini seŋ: Ba muku, ku muɗa seŋ kir kai, ɵasi piyi, za aŋ apiyi, aŋ pai zi ɓaka na wiyi lai. Pɗem ɗa a na ku za aŋ pai zi ɓaka miɗiɗi pakatai na wiini ɗif ktai zaw, aŋ pai zi ɓaka na wiini pinziba ktai warɗi Izrayel ɗa ɗi?

²⁰Firiyi a yima pai zi ɓaka ɗa, a taɓa piɗi askarai na e mili alawai zi rgi gaini alawai n’agogoi n’e miliŋ amlai war dalam gaini alaw zi rgi n’e ziziniŋ ɗa, a taɓa piɗi a hala gaiɗi.

²¹E wiyi sek ɗa, e miliɗi ɗai wuzaɗi gaini wazagai n’e zini puɗu puɗu, gaini der zamai zamai lai.

²²Won hlai n’e hili gaigai sini dalam na wiini Mika par agwi, ɗai n’e simni ɵimani dalamni Mika par gobi ɗa e yiki siɗi ka ka, e tiki futi pini pinzibani Dan ɗa.

²³E ɗûûli pini pinzibani Dan ɗa, nagai e bindisi arɗi e miɗini wiini Mika: Ku ɗuula ɵa ɗa buri maɗa?

²⁴A wiyiɗi seŋ a muɗa: Alawai na wiya na mu zizinaŋ ɗa, ki miliŋ yawn ki yimi pai zi ɓaka kaai ki hilisi gaini ɗaw lai, a hinasi ta katawai ɗa a maŋ Na kapai ki miɗiŋa ɓa: A zɓa ɗa a ma ɗi ɗa?

²⁵Pinzibani Dan e wiyini seŋ: Ketiɓiyi ɵemaii kai, ɵa kai ɗa, zamai n’arbaɗi par na midiɗi gaini siiwi ta ɗa aga e fikiɗi amai siki, aga ku ka suku aŋ fiɗi edi kadai gaiɗi ɗai n’ahaku lai.

²⁶Pini zbani Dan ɗa, e hili wiiɗi wuzaɗi. Won hlai na Mika a tala a tiliɗi haa gdaŋɗi a suwaŋ su ɗa, a wayasi wiini aha.

²⁷E mili wazagai na Mika a zaŋ ɗa, e hili gaini pai zi ɓaka na wiini lai. E hili e cikiti Lais, na ɗai na woni ɗa e ɗifu huwiyi siɗi kai ɗa, e fiɗiɗi edi gaini kaɵkar, e ɵi afu pini fuŋɗi n’abai ɗa lai.

²⁸Ɗif ktai n’a zina piɗi aŋ piliɗi edi aŋ kai ɓa fuŋ n’abai na Lais ɗa a nafu gaigai siɗi Sidon par, bonuɗi gaini ɗif kai. Te nafu azumai warni huduk na Bet-Rehob. Asakal par e wiyi e rgi fuŋ n’abai ɗa amai, e simni woni lai.

²⁹E bindi yikini fuŋ n’abai hanɗa pla, avut par e yikiŋ ɓa Lais, amma e bindiŋ midini yikini Dan na tiyiɗi n’ahini Yakob ɗa.

³⁰E pi alaw zi rgi na wiini Mika ɗa amai tiɓ kapai e hûrgi azumai wuzani. Yonatan n’ahini Gerson, n’ahini Manase ni gaiɗi alini e bindi aŋ paakai zi ɓaka na wiini pinzibani Dan haa sini mefeŋ n’e kiɗi edi aŋ bege midini afti na zamai.

³¹E giɗimi alaw zi rgi na Mika a zaŋ ɗa, - a hina tiɗi ɵa haa hlai na Dalam na wiini Alaw a zogo edi war Silo par.