Read Mousgoum Paakai zi sariya 19 Bible Online

Paakai zi sariya 19 - Mousgoum bible

Paakai zi sariya 19

¹War sarti ni ɗa, pai a nafu war Izrayel kai. Ɗif na Levit ktai a nafu aŋ zak edi ezini hlai zi huwuŋ na wiini Efrayim, a tikiti muni na war Betlehem na war Yuda aŋ munini amma a kitisi aha kai.

²Muni na ɗa te za hiy sini, asakal par te hinaŋ te waya ahani epiɗi war Betlehem na war Yuda, te sumna woni tile puɗu.

³Mefeŋ ktai, mafaɗi a hala siɗi aŋ haɗa kalaŋ gaiɗi kapai a wiyitisi aha. A hala gaini ɗifni zi sda, ablehökai piɗi sulu lai. Munini te kaŋ amlai ahani epiɗi, won hlai na epiɗi muni a talaŋ a yimaŋ gaini firiyi.

⁴Suwulni na epiɗi munini a sini futi aŋ hala kai, a sumna ahani haa mefeŋ hu, e simi, e ci, e fini woni.

⁵War mefeŋ n’ag'aŋ puɗu ɗa, ɗif na Levit gaini ɗifni zi sda ɗa e fiki amai gorof. Won hlai n’a na zizina sini buri a hala, epiɗi muni ɗa a miɗini wiini suwulni: Ku suma wala agwi kapai ku nava gdaŋ, asakal par ki hili wiiki.

⁶E simni azumai gaini sulogoiɗi, e simi, e ci lai. Asakal par epiɗi muni a miɗini wiini mafaɗi muni: Fanaka woni na waŋ pra, za barka yimaŋ suku, a zuva ɓa agulku a tuura kai!

⁷Mafaɗi muni a faka amai aŋ hili, amma suwulni a siika mini haa a fanaka woni waŋ pra.

⁸War mefeŋ n’ag'aŋ ɵim a faka amai gorof buri a hala, amma epiɗi muni a miɗini: Za barka, suku a tika agwi haw, biyi haa siɗi futi ta, gaini suliɗi simi.

⁹Mafaɗi muni a faka amai buri a hala gaiɗi munini, gaini ɗifni zi sda lai; Amma suwulni n’epiɗi munini a miɗini: Futi te za koskoi ta, hlai a vuga vug, mu siiwiki, fini ca. Futi te hala ɗaw, fini woni na ca. A zuva ɓa agulku a tuura kai! Dawai ɗa aga ki ɵi siki gorof aŋ hili, aŋ waya aha sini dalamku.

¹⁰Amma mafaɗi muni ɗa a firiya a fana kir kai, a faka a hala, a co haa gobi aha miɗi Yebus, a dara a muɗa: Yeruzalem, gaini ablehökai na sulu na kursi gaini zizini duɓani ɗa.

¹¹Won hlai n’e cûsi gobi aha miɗi Yebus ɗa hlai a za koskoi gara ta, ɗif zi sda a miɗini wiini epiɓgezani: Niyumu aha war fuŋ n’abai na wiiɗi Yebuzitekai hanɗa, hulumu, mu funumu woni.

¹²Epiɓgezani a wiyini seŋ a muɗa: Zaw kai, aga mu niyumu aha war fuŋ n’abai na wiiɗi pinziba na zamai na ɗif na zraiel ktai maa woni kai ɗa kai, mu funumu ɗa a Gibeya sek.

¹³A miɗini wiini ɗif zi sda na wiini: Hulumu, fuɗumu was aŋ cumu war Gideya zaw Rama, mu funumu war ktai arbani fuŋ n’abakai hanɗa.

¹⁴E hili wuzaɗi, won hlai n’e cû gobi aha miɗi Gibeya na wiiɗi alini Benyamin ɗa, futi te nawa lai.

¹⁵E niyi aha war Gibeya aŋ fini woni? Ɗif na Levit gaini ɗai n’epini ɗa, e niyi aha e simni azumai warni hlai zi faada, amma ɗif ktai n’a yimiɗi sini aŋ fini ahani aŋ kai.

¹⁶Kuskoi ni ɗa, ɗif ktai na wel a wayasi edi warni vuwaini par, aŋsi fu aŋ za sda, ni a ɗif na midini hlai zi huwuŋ na wiini Efrayim par, a nafu war Gibeya ɗa aŋ ɗif zi zak, amma ɗai na warni hlai i mal ɗa e ɗi pinzibani Benyamin.

¹⁷Won hlai n’a ɵa arni ɗa, a tala ɗif na morkoi ɗa edi warni faada dam, ɗif na wel ɗa a zilbaŋ a muɗa: Ku halasi wata par ɗa? Ku hala na wa zaw ɗa?

¹⁸A wiyini seŋ a muɗa: Mi hilisi a Betlehem na war Yuda par, edi ezini hlai zi huwuŋ na wiini Efrayim ɗa par, mu na woni par. Mu hala war Betlehem na war Yuda; mu hala na ɗa amlai war dalam na wiini EPIƊ-ƊAI, amma ɗif n’a yimaɓa sini aŋ kai.

¹⁹Mi ɗi na ɗa gaini evekyi gaini kuzumyi na mi siŋni wiini ablehökaiyi tiyi, mi ɗa gaini wazagaiyi zi simi tiyi, gaini wala zi ci na buri ta gaiɗi muniya, gaini ɗif zi sda n’aŋ piyi ɗa tiyi lai. Mi zilba wala tini ɗif par kai.

²⁰Ɗif na wel a muɗa: Ku huwya suku kai, Wala n’a suwuku paŋ ɗa aga mu piyuŋku, aga ku fana edi warni faada hanɗa kai.

²¹A kiɗi ahani, a sini kuzum mini ablehökaini kai, ɗai na morkokai e mi eziɗi, asakal par e simi, e ci lai.

²²Won hlai na hangalɗi a tika pini a wayasi siɗi ɗa, ɗai na war fuŋ n’abai hanɗa par, na hangalɗi meefeŋ e guni dalam ɗa azumai gun, e tiki piɗi aŋ ɵiɓi mini magalani ɗif na wel ɗa, e miɗini maini nɵa: Ɗif n’a niyaɗi ahaku ɗa, ɵaŋsi anene kapai mi fini gaini.

²³Epiɓezani dalam ɗa a niyasi anene miɗi a miɗiɗi: Zaw kai tawalakaya, mu siiwiki, ki zi wala na meefeŋ na maini hanɗa ɵa kai. Ɗif hanɗa a niyasi ahaya dak, ki zi wala na hi-hir maini hanɗa nɵa sini kai.

²⁴Ahiya na ɓulmi te na, munini ɗif hanɗa te na lai, zi barka, hiniŋa mu siɗikisi anene, yimiɗi, zi gaiɗi maini na ki diri nɵa, amma ki zi wala na hi-hir maini hanɗa nɵa sini ɗif hanɗa kai.

²⁵E firiyi e ɵini mini kai, nɵa ɗif na Levit ɗa, a yimitisi munini a kitiɗisi anene. E fini gaiɗi, e fini gaiɗi gaini gdaŋ ɵa haa gorof. Won hlai na hlai a sɗasi rum rum ɗa e hinitisi.

²⁶Gorof par, muni hanɗa te halasi te kɵa mini magalani ɗif na wel na mafaɗi a sumna aha woni ɗa, te hina woni waŋ ɵa haa hlai a sɗasi edi.

²⁷Gorof par, mafaɗi muni ɗa a fakasi amai, a mala mini magala edi, a niyai anene buri a kiti morkoini na wuzani sek ɗa. Amma a nivitisi munini ɗa gainikɵi azumai mini hlai su, tini mini hlai gaini yimi kaai.

²⁸A miɗiɗi: Faka amai, hulumu. Amma te ki ɗa te wiyini seŋ kai. Nɵa mafaɗi a tikiti amai duɓani ablehöni, a hala gaiɗi aha.

²⁹A niya amlai warni dalamni, a tikasi muguɗ, a ɗukuliti munini azumai daf daf haa doogo pi sulu. A ɵina neɓɗi midini aftiɗi pinzibani Izrayel paŋ.

³⁰Ɗai n’e tili wala hanɗa paŋ ɗa e miɗi: Wala na maini hanɗa ɵa ɗif a talaŋ ka kai, a za ka duk kaalai, haa sini mefeŋ na aliɗi Izrayel e niyisi edi war Egipte par haa girna. Hiini pɗem, yiki diŋgi ka, miɗi seŋ ktai.