Read Mousgoum Paakai zi sariya 2 Bible Online

Paakai zi sariya 2 - Mousgoum bible

Paakai zi sariya 2

¹Sleŋ na wiini EPIƊ-ƊAI a fakaɗi a Gilgal par a hala a Bokim, a muɗa maini nɵa: Mu milikisi edi war Egipte par, mu kikisi midini afti na mu za ha ɓa aga mu siŋɗi wiiɗi tamaiki. Mu muɗa ɓa: Aga mu ɗiya bonu n’arba gaiki ɗa duk kai zaŋ.

²Tiki aga ki zi bonu gaiɗi ɗai na midini afti hanɗa kai, ki hiɗi hlaiɗi zi ɓaka azumai lai, amma ki ɵini ma kai, tiki ki zi nɵa buri maɗa?

³Nɵa mu muɗa: Aga mu birgiɗi edi wuzaki kai, aga e simni arbaki, alawai na wiiɗi aga a bunda aŋ azaw buriki lai.

⁴Won hlai na ɵeŋ na wiini EPIƊ-ƊAI a vada gaini seŋni zi miɗi li, aliɗi Izrayel paŋ e ɗûûli, e tûwi lai.

⁵E ɵini yiki wiini hlai hanɗa ɓa: Bokim, a dara a muɗa: Ɗai zi tuwi. E zi ɓaka wiini EPIƊ-ƊAI war hlai ni ɗa.

⁶Yosva a tikiɗi piɗi ɗai ɗa, aliɗi Izrayel paŋ e wiyi ɗif paŋ aha midini aftini aftini n’a sa sini aŋ bulum ɗa.

⁷Aliɗi Izrayel e zi ɵeŋni EPIƊ-ƊAI ha sini mrini Yosva, haa sini mriɗi n’abakai n’e ɵi wuze n’e zi sda gaini Yosva ɗa lai. Nagai n’e tili sda na abakai n’EPIƊ-ƊAI a zaŋ siɗi Izrayel ɗa.

⁸Yosva n’ahini Nun, ɵeŋ na wiini EPIƊ-ƊAI a mra sek ɗa, buza miya gai doogo.

⁹E piŋ a Timnat-Heres midini afti na wiini, midini hlai zi huwuŋ na wiini Efrayim, tiɗi huwuŋ Gas war gal n’azumai sek ɗa.

¹⁰Nagai na war vuna hanɗa e zi maiɗi tamaiɗi ɵa, amma vuna asakalɗi nagai par ɗa, e siɗi EPIƊ-ƊAI kai, e siɗi sda n’abakai n’a za buriɗi Izrayel ɗa kaalai.

¹¹Aliɗi Izrayel e zi wala na meefeŋ wuzani arni EPIƊ-ƊAI, e tiki piɗi e hûrgi azumai aŋ siiwi tini alawai na yikiŋ ɓa Baal.

¹²E hini EPIƊ-ƊAI, Alaw na wiiɗi tamaiɗi edi, Ni n’a piliɗisi edi war Egipte par, e hili pini alawai na zamai, pini alawai na wiiɗi pinziba n’e guniɗi azumai ɗa, e hûrgi azumai wuzaɗi, nɵa EPIƊ-ƊAI agulni te lumaŋ siɗi.

¹³E hini EPIƊ-ƊAI edi, e hûrgi azumai wuzani alawai Baal gaini alawai Astarte.

¹⁴EPIƊ-ƊAI a za hiy siɗi Izrayel. A siɗi war tiɗi ɗai zi vram, e virmiɗi, a siɗi war tiɗi gawɗi n’e guniɗi azumai, gdaŋɗi a kiɗa a ɗiya wuzaɗi ɗai hanɗa kai.

¹⁵Won hlai n’e hili li edi min hatam paŋ, EPIƊ-ƊAI a ɵasi pini gaiɗi gawɗi par, kapai e siɗi gir, maini n’EPIƊ-ƊAI a miɗiŋɗi nɵa, maini n’a ha wala mini ɓ'aga a zaŋ ɗa nɵa. E siɗi gir viya gara a suwa pɗemni.

¹⁶EPIƊ-ƊAI a siɗi gaŋgalaŋai zi spak arbaɗi, kapai e piliɗisi edi war tiɗi nagai n’e virmiɗi ɗa par.

¹⁷Amma gaini hanɗa paŋ, e ɵini miɗi gaŋgalaŋai zi spak n’e ɗa arbaɗi ɗa kai, e hili pini alawai na zamai, e hûrgi azumai wuzani lai. Futi na tamaiɗi e tikiti ɗa, e hiniti edi gai yafai kai, e ɵinini pini gadai na wiini EPIƊ-ƊAI maiɗi nɵa kai, e zi maiɗi nɵa kaalai.

¹⁸Won hlai n’EPIƊ-ƊAI a siɗi gaŋgalaŋai zi spak ɗa li ɗa, a za gaiɗi ɗai hanɗa, a piliɗi Izrayel edi tiɗi gawɗi par gaini ɗif hanɗa haa sini mrini ta, buri gir hanɗa a tika pini a fiɗini sini, burini tuwiɗi na tini gir na ɗai e ɗa ziŋɗi gaini tuurli n’e ɗa turliɗi amai ɗa.

¹⁹Amma asakalni mrini gaŋgalaŋ ɗa par ɗa, e wiyi war futiɗi na maafini a sûwiɗi tamaiɗi pra, e tiki futi pini alawai na zamai, e hûrgi azumai wuzaɗi lai, sdaɗi na maafanai, gaini hriŋ na wɗi ɗa e hiniŋ edi kai.

²⁰EPIƊ-ƊAI a za hiy siɗi aliɗi Izrayel; a muɗa: Ɗai hanɗa e diri e zi pin bonu na wiya kai, bonu na mu zaŋsi gaiɗi tamaiɗi par, amma e zi pini kai.

²¹Ta lai, aga mu ɵimiɗi gawɗi edi wuzaɗi kir kai, nagai na Yosva a mra sek a hiniɗi ka ca ca ɗa.

²²Gaiɗi pinziba hanɗa, EPIƊ-ƊAI aga a titimiɗi aliɗi Izrayel, kapai a sɗa ɓa aga e ɵini pini zaw, e ɵini pini kai ɗi ɗa, maini na tamaiɗi e ziŋ ɗa nɵa.

²³Nɵa pinzibaɗi ɗai hanɗa, EPIƊ-ƊAI a ɵimiɗi edi witaw kir kai, a hiniɗi gaini hangalɗi. A siɗi war tini Yosva kai.