Read Mousgoum Paakai zi sariya 20 Bible Online

Paakai zi sariya 20 - Mousgoum bible

Paakai zi sariya 20

¹Aliɗi Izrayel paŋ e zizini siɗi mini hatam, gaini hlaiɗi paŋ e tipi amai maini ɗif ktai nɵa, a Dan par haa a Berseba, haa midini afti na Galaad par lai. E diŋgisi wuzani EPIƊ-ƊAI war Mispa.

²Ɗai n’abakai na wuzaɗi ɗai, gaiɗi abakai na war pini zibaɗi Izrayel ɗa paŋ, e ɗifu kafa war diŋgi na wiiɗi ɗai na wiini Alaw. Askarai n’e kiɗi e hitimi gaini kaɵakar ɗa e zi dubu miya puɗu.

³Ɗai na war pinzibani Benyamin ɗa e ɵini ɓa aliɗi Izrayel e hilisi e ɗi war Mispa, aliɗi Izrayel e miɗi: Miɗiyi haw, sda na meefeŋ hanɗa a za ɵa maɵa maɵa ɗa?

⁴Nɵa ɗif na Levit na mafaɗi muni n’e fiɗiti ɗa, a muɗa: Mu halasi a Gibeya midini afti na wiini Benyamin gaiɗi muniya aŋ fana woni.

⁵Ɗai na Gibeya ɗa e fiki amai sa, duvuk ɗa e guni dalam na m’aŋ woni ɗa azumai gun. E firiyi e fiɗiŋa mal ɗa muta, amma e ziɗi gir wiiɗi muniya haa te mra mini.

⁶Nɵa, kopoŋɗi muniya ɗa, mu ɗuklaŋ edi daf daf, mu ɵinaŋ midini afti n’a sa aŋ wiiɗi Izrayel buri ɓa e zi ɗa a wala zi siyer, a wala na hi-hir lai warɗi Izrayel.

⁷Tiki aliɗi Izrayel, ki ɗi woni na kafa, zilbi marki, ɗiyi seŋ tai zaw.

⁸Ɗai paŋ hiiniɗi a ɗiya maini na wiini ɗif ktai nɵa, e miɗi: Ɗif arbamu par nɵa a waya aha kai, ɗif a waya aha war dalamni kai.

⁹Tiyana ɗa aga mu zumu siɗi Gibeya ɗa maini nɵa: Mu hulumu aŋ hutumu tumu ɗa pini waa zi vili n’aga a za ɗa.

¹⁰War pini zibaɗi Izrayel paŋ par ɗa, ɗai miya ɗaw ɗa, mu mulumu ɗai doogo, ɗai dubu ɗaw mu mulumu ɗai miya ɗaw, kapai e hili e piyisi wala zi simi wiiɗi ɗai ɗa, kapai haa e wiyisi ta ɗa, mu zumu Gibeya na midini afti na wiini Benyamin ɗa midini kiɗini meefeŋ n’e ziŋ warɗi Izrayel ɗa.

¹¹Nɵa ɗai na Izrayel paŋ e tipi sini fuŋ n’abai hanɗa, war hiini ktai maini ɗif ktai nɵa.

¹²Pini zibaɗi Izrayel ɗa paŋ e ɵini ɗai edi arbaɗi pinzibani Benyamin ɗa par aŋ miɗiɗi maini nɵa: Sda na meefeŋ na maini hanɗa nɵa ɗa a za arbaki maɵa maɵa ɗa?

¹³Tiyana ɗa, siɗiyi ɗai na hangalɗi meefeŋ n’e ɗa war Gibeya n’e zi hanɗa kapai mi fiɗiɗi edi. Nɵa wala na meefeŋ n’na arbaɗi aliɗi Izrayel ɗa kapai a tika edi. Amma pinzibani Benyamin e diri e ɵini seŋ n’aliɗi Izrayel na tawalakaiɗi e ɗa miɗiŋɗi kai.

¹⁴Pinzibani Benyamin e niyisi edi warni fuŋɗi n’abakai par, e diɓgisi a Gibeya buri e hitimi gaiɗi aliɗi Izrayel.

¹⁵War mefeŋ ni ɗa, pini ziban Benyamin n’e hilisi edi war fuŋ n’abakai zamai zamai par ɗa e zi ɗai dubu caaɓa pi ɵaara n’e siɗi hatam na gaini kaɵkar. Ɗai n’aha warɗi Gibeya mal ɗa, e zi ɗai miya muguzak na tiɗi a pa azumai kadai kai.

¹⁶Arbaɗi askarai hanɗa, ɗai na tiɗi a pa azumai kadai kai, na danaɓai ɗai miya muguzak, nagai paŋ koo ayir na midini ɗif ɗi e biliŋ li ɗa sai e ɗigiriŋ fas.

¹⁷E piɵiɗi aliɗi Izrayel na zamai ɗa, pinzibani Benyamin ɗa arbaɗi kai, e zi ɗai dubu miya puɗu n’e kiɗi e hitimi gaini kaɵkar, e ɗi ɗai n’e hitri midini hatam lai.

¹⁸Aliɗi Izrayel e hili a Betel aŋ zilbi dirini Alaw, e miɗi: Arbaii ɗa, pinziba n’aga a hala avut aŋ hitima gaini pinzibani Benyamin ɗa a na wata ɗa? EPIƊ-ƊAI a wiyiɗi seŋ a muɗa: Pinziba n’aga a hala avut ɗa, a pinziba na wiini Yuda ɗa.

¹⁹Gorof par cup, aliɗi Izrayel e hili e pi kaŋɗi miɗi Gibeya tiɓ.

²⁰Aliɗi e hitimi gaiɗi pinzibani Benyamin, ɗai na Izrayel e giri siɗi gaara mini hatam na gaiɗi wuzaɗi Gibeya.

²¹Pinzibani Benyamin e niyisi edi war Gibeya par warni mefeŋ ni ɗa, e fiɗi piɗi ɗai na Izrayel ɗa ɗai dubu caaɓa pi sulu.

²²Ɗai na Izrayel e pi arɗi, e hili e giri siɗi mini hatam pra, won hlai n’e giri ka woni avut ɗa.

²³Aliɗi Izrayel e hili e tuwi mini EPIƊ-ƊAI haa koskoi. E zilbi EPIƊ-ƊAI e miɗi: Aga mi wiyi katawai aŋ hitimi gaini pinzibani Benyamin na tawalyi ɗaai ɗai? EPIƊ-ƊAI a wiyiɗi seŋ a muɗa: Hili.

²⁴Nɵa aliɗi Izrayel e wiyisi ka aŋ hitimiɗi pinzibani Benyamin war mefeŋ n’ag'aŋ sulu.

²⁵War mefeŋ n’ag'aŋ sulu hanɗa, pinzibani Benyamin e niyisi edi war Gibeya arɗi, e fiɗi ɗai piɗi ɗai na Izrayel ɗa dubu doogo pi mitwis, gaini hlaiɗi paŋ e ɗi ɗai n’e siɗi hatam na gaini kaɵkar.

²⁶Ɗai na Izrayel ɗa gaini hlaiɗi paŋ e hili a Betel, e hini woni ca aŋ tuwi mini EPIƊ-ƊAI. Mefeŋ ni ɗa e tiki sai haa kosku ɗaw, e zi ɓaka zi yi gaini ɓaka zi ɵeɗ wiini EPIƊ-ƊAI.

²⁷Aliɗi Izrayel e zilbi dirini EPIƊ-ƊAI, war sarti ni ɗa, zunduk zi bonu na wiini Alaw a nafu war hlai hanɗa,

²⁸war sarti ni ɗa, ɗif n’a na za sda ɗa, a Fineyas n’ahini Eleyazar, na tiyni Aaron ɗa. Aliɗi Izrayel e miɗi: Aga mi hili mi hitimiɗi alini Benyamin na tawalyi ɗaai zaw mi hili kir kai ɗi? EPIƊ-ƊAI a waya seŋ a miɗiɗi: Hili hitimiɗi, dawai ɗa aga mu siɗi war tiki.

²⁹Nɵa aliɗi Izrayel e mili ɗai edi par siɗi Gibeya ca ca.

³⁰Aliɗi Izrayel e hili aŋ hitimiɗi alini Benyamin war mefeŋ n’ag'aŋ hu pra, e giri siɗi mini hatam maini na e ziŋ avut ɗa nɵa.

³¹Alini Benyamin e niyisi edi arɗi ɗai na Izrayel ɗa, ɗai na Izrayel ɗa e tiniɗi piɗi haa edi gaigai sini fuŋ n’abai ɗa par. E tiki piɗi aŋ fiɗi piɗi ɗai na Izrayel ɗa maini n’avut ɗa nɵa; warɗi futi na ktai te hala a Betel sek, na ktai te hala a Gibeya sek edi warni basga ɗaw ɗa, ɗai e zi gobi doogo doogo hu.

³²Pinzibani Benyamin e miɗi gaini warɗi maini nɵa: Aga mu fuɗuɗumu maini n’avut ɗa nɵa. Amma aliɗi Izrayel e miɗi gaini warɗi ɓa: Ruvumu, kuɗumu edi gaigai sini fuŋ n’abai ɗa par, war futi.

³³Ɗai na Izrayel e niyisi edi warni hlaiɗi n’e ɗa warni ca ca ɗa par, e girisi siɗi mini hatam war Baal-Tamar, nagai n’e ɗifu aŋ ripti ɗa e niyisi edi warni hlai na e ɗi woni par, war Maare-Geba par.

³⁴Askara na tiɗi a pa edi kadai kai na wiiɗi aliɗi Izrayel dubu doogo e hilisi midiɗi Gibeya tar. Hatam ɗa a za gdaŋ, amma pinzibani Benyamin ɗa, e hiini ɓa gir aga a niviɗi nɵa kai.

³⁵EPIƊ-ƊAI a sa rɗi n’amai wiiɗi aliɗi Izrayel warni mefeŋ ni ɗa, pinzibani Benyamin ɗa, ɗai e mri dubu caaɓa pi ɵim gaini miya ɗaw, e ɗi ɗai n’e siɗi hatam gaini kaɵkar.

³⁶Pinzibani Benyamin e tili siɗi ɗa, e sûwiɗi su, amma aliɗi Izrayel e yimi siɗi edi war baŋa wuzaɗi pinzibani Benyamin, buri e pɵi midiɗi askarai n’e ŋûyi edi par siɗi Gibeya cok cok aŋ riɓti ɗa.

³⁷Ɗai hanɗa e hili midiɗi nagai n’e hinisi aha war fuŋ n’abai ɗa, e tikiŋ, e fiɗiɗi ɗai edi gaini kaskar.

³⁸Pin wala n’e kitiŋ arbaɗi, askarai na Izrayel e biyi ɓa nagai n’e ŋûyi aŋ riɓti, aga e pi agiyiŋ amai war fuŋ n’abai ɗa par, kapai a siŋkiɗi ɓa e tiki hlai ɗa ya.

³⁹Ɗai na Izrayel e bindisi arɗi siɗi pinzibani Benyamin aŋ hitimi gaiɗi. Won hlai ni hanɗa, pinzibani Benyamin e fiɗi ɗai piɗi doogo doogo hu ya. E hiini warɗi ɓa, ga e rɗi amai midiɗi maini war hatam n’avut ɗa ɵa ɗaai, aga e mili tiɗi par kai.

⁴⁰Won hlai n’e tili arɗi ɗa, agiyiŋ a pa amai war fuŋ n’abai ɗa par, maini ɗugul ɵa. Pinzibani Benyamin e bindi arɗi duɓaɗi sek, e tili ɗa, agiyiŋ a pa amai war fuŋ n’abai ɗa war gal paŋ par.

⁴¹Ɗai na Izrayel e bindisi arɗi, pinzibani Benyamin hunai n’abai te yimiti, buri e tili gir n’a niviɗi ɗa.

⁴²E pri edi wuzaɗi aliɗi Izrayel arɗi edi warni basga na kaɗataŋ sek. Amma e mili mini hatam par kai, nagai n’e wiyisi mini hatam par ɗa, e fiɗiɗi edi buri ɓa e hini arba ca.

⁴³E hiriɗi pinzibani Benyamin ɗa amlai har, e hiniɗi smer siɗi kai e tiki futi piɗi haa gobi aha miɗi Gibeya, piɗi futi na dawai sek.

⁴⁴Pinzibani Benyamin ɗa, ɗai e mri piɗi dubu doogo pi mitwis, e ɗi ɗai zi hatam na agulɗi a huna kai ɗa kafa.

⁴⁵Arbaɗi nagai n’e pri edi warni basga na kaɗataŋ siɗi huwuŋ Rimmon sek ɗa, e yimi ɗai piɗi warɗi futi dubu ɵim, e tiki futi piɗi n’e hini haa a Gideyon, e fiɗi zamai dubu sulu pra.

⁴⁶Pinizbani Benyamin n’e mri warni hlai hanɗa e zi ɗai dubu caaɓa pi ɵim, gaini hlaiɗi e ɗi ɗai zi hatam na agulɗi a huna kai.

⁴⁷Arbaɗi par ɗai miya ɵaara e pri edi war basga na kaɗataŋ siɗi huwuŋ na Rimmon ɗa sek, e simni edi woni ɵa haa tile ɵaara.

⁴⁸Ɗai na Izrayel e wiyisi midiɗi pinzibani Benyamin ɗa, e fiɗiɗi edi gaini kaɵkar. E vigi warni fuŋ n’abakai paŋ, e fiɗiɗi ɗai gaini wazagai n’ezini puɗu puɗu na e niviŋ aha warni ɗa edi, e ɵi afu pini fuŋ n’abakai na e niviŋ paŋ lai.