Read Mousgoum Paakai zi sariya 21 Bible Online

Paakai zi sariya 21 - Mousgoum bible

Paakai zi sariya 21

¹War Mispa aliɗi Izrayel e hi wala miɗi maini nɵa: Arbamu par ɗa ɗif aga a siti ahini aŋ muni wiini pinzibani Benyamin kai.

²Ɗai e hilisi war Betel, e simni woni wuzani Alaw haa koskoi. E tuuwi, e tuuwi gara,

³e miɗi: EPIƊ-ƊAI, Alaw na Izrayel, wala na maini hanɗa nɵa a za warɗi Izrayel ɗa buri maɗa? Girna ɗa piniziba ktai arbaɗi alini Izrayel ɗa a fuɗa edi su, a za ɵa buri maɗa?

⁴Dawaini ɗa, ɗai e fiki amai gorof, e rgi gûwiŋ zi ɓaka, zi ɓaka zi yi gaini ɓaka zi ɵeɗ lai.

⁵Aliɗi Izrayel e miɗi: Arbaɗi pinzibaɗi Izrayel ɗa, ɗif n’a halasi amai mini diŋgi n’a za wuzani EPIƊ-ƊAI war Mispa kai ɗa, asiya ɗa? Buri ɓa mu humu wala mumu ɓa: Ɗif n’a halasi amai mini diŋgi n’a za war Mispa kai ɗa, ni ɗa e fiɗiŋ edi.

⁶Paŋ ktai aliɗi Izrayel ɗa, hiinini haw na buriɗi tawalakaiɗi na pinzibani Benyamin ɗa, a nafu warɗi, e miɗi ɓa: Girna piniziba ktai arbamu par war Izrayel a fuɗa edi su.

⁷Nagai n’e hini karɗi ɗa aga mu zuɗumu maɵa maɵa ɗa war gal na wiiɗi falakai zi tiki ɗa? Buri mu humu wala mumu wuzani EPIƊ-ƊAI ɓa: Mu suɗuɗumu alimu na falakai aŋ falakai kai.

⁸Nɵa e zilbi maini nɵa: Arbaɗi pinzibaɗi Izrayel ɗa, ɗif n’a hala amai mini EPIƊ-ƊAI war Mispa kai a na ɗi? E niviŋ ɓa: War Yabes na war Galaad par ɗa, ɗif ktai maa a halasi amai mini kaŋ woni hlai na diŋgi a za woni kai.

⁹E piɵiɗi ɗai n’e ɗa taaha ɗa, e nivi ɗif na Yabes na war Galaad par ktai maa arbaɗi kai.

¹⁰Nɵa, diŋgi a ɵina ɗai dubu doogo pi sulu arbaɗi nagai na agulɗi a huna kai ɗa par, a siɗi miɗi maini nɵa: Hili, ki fiɗiɗi ɗai na Yabes na war Galaad ɗa edi gaini kaɵkar, gaiɗi falakaiɗi lai, aliɗi lai.

¹¹Aga ki zi maini nɵa: Ahi na wus paŋ, gaiɗi muni na te fana gaini wus paŋ ki fiɗiŋ edi.

¹²E nivisi arbaɗi ɗai na Yabes na war Galaad par, ɓulamai puɗu n’e fini gaini ɗif kai, e fini gaini wus duk kaalai, e kiɗisi warni kaŋ na Silo midini afti na Kanaan.

¹³Ɗai e ɵini piɗi pinzibani Benyamin n’e ɗisi edi sini huwuŋ na Rimmon ɗa, buri e tuuyi gaiɗi marɗi.

¹⁴War mefeŋ ni ɗa, pinzibani Benyamin e wiyisi aha, falakai na Yabes na war Galaad par n’e hini karɗi ɗa e siɗiɗi ca, amma e kiɗi midiɗi paŋ kai.

¹⁵Aliɗi Izrayel ɗa hiinini-haw a yimiɗi burini pinzibani Benyamin, buri EPIƊ-ƊAI a mala baŋa arbaɗi pini zibaɗi Izrayel.

¹⁶N'abakai n’arbaɗi ɗai e miɗi: Nagai n’e hini ɗa, mu zuɗumu maɵa maɵa ɗa? Kapai mu nuvuɗumsi falakai wata par ɗa? Buri muni te hina war pinzibani Benyamin kir kai.

¹⁷E miɗi: Pinzibani Benyamin n’e hini ɗa, e hini midini aftiɗi ɵa, kapai piniziba ktai a fuɗa edi warɗi Izrayel par kai.

¹⁸Amma aga mu suɗumu alimu na falakai aŋ falakaiɗi kai, buri aliɗi Izrayel e hi wala miɗi ɓa: Ɗif n’a siti li ahini aŋ muni wiini pinzibani Benyamin ɗa, tusa a sumna midini.

¹⁹Nɵa, e miɗi: Buza buza paŋ, aga mu zumu fet wiini EPIƊ-ƊAI war Silo, war gal n’azumai tiɗi Betel, ɵimani futi na te halasi a Betel par a Sikem sek, piɗi futi na dawai par, war gal n’amai par tiɗi Lebona lai.

²⁰Nɵa a miɗiɗi wiiɗi pinzibani Benyamin: Hili ki ŋûyi edi arbani luwuŋ zi vin ɗa cok cok aŋ ripti,

²¹won hlai na ki tiliɗi li ɓulamai na Silo par e niyisi li edi aŋ didimi ɗa, ki niyisi edi arbani luwuŋ zi vin ɗa par, ɗif paŋ a yima ɓulmi na Silo par ktai ktai, ki hili gaiɗi midini afti na wiini Benyamin.

²²Na ɓa tamakaiɗi, zaw tawalakaiɗi e hiliɗi li miyi ɗa, aga mi miɗiɗi ɓa: Hiini-haw buriɗi, burini warni hatam n’a za ɗa, tumu mu nuvumusi falakai midiɗi paŋ kai. Ki siɗi ali hanɗa ki ɗi tiki kai. Na ɓa ki siɗifu ki ɗi tiki ɗa, ki zi ɗa a wala na meefeŋ.

²³Pinzibani Benyamin ɗa e zi maini hanɗa ɵa, e mili falakai midini kiɗiɗi ta, arbaɗi ɓulamai n’e didimi ɗa par, asakal par e hili, e wiyi aha midini aftiɗi. E wiyi e rgi fuŋɗi n’abakai amai, e simni woni.

²⁴War sarti ni ɗa, aliɗi Izrayel e fiki woni par, ɗif paŋ a waya aha war pinzibani, war piɗi humunini, e fiki woni par, ɗif paŋ a waya aha midini aftini sek sek.

²⁵War mefeŋ ni ɗa, pai aha warɗi Izrayel kai, ɗif paŋ a za maini n’a dara nɵa.