Read Mousgoum Paakai zi sariya 3 Bible Online

Paakai zi sariya 3 - Mousgoum bible

Paakai zi sariya 3

¹Hanɗa a pinziba n’EPIƊ-ƊAI a za wala na meefeŋ sini kai kapai a titimiɗi aliɗi Izrayel gaiɗi, nagai n’e gaw n’a za buri tikiɗi Kanaan ɗa kai ɗa.

²A zaŋ nɵa ɓa kapai aliɗi Izrayel n’e wi asakal sek ɗa, e tili gaw ɗa lai, e hitri hatam lai, a suwa paŋ nagai n’e sɗiŋ ka duk kai ɗa.

³Nagai n’EPIƊ-ƊAI a za wala na meefeŋ siɗi kai ɗa, a pini e ɗi ɗai hanɗa: paakai na ɵim n’e ɓi midiɗi Filistrekai, Kananiyakai paŋ, ɗai na Sidon, gaiɗi Hivitekai n’e simni amai midini hlai zi huwuŋ na Liban ɗa lai, Siɗi huwuŋ Baal-Hermon par haa aha miɗi Lebo-Hamat ta.

⁴Ɗai hanɗa, EPIƊ-ƊAI a za sda gaiɗi kapai a titimiɗi aliɗi Izrayel na ɓa aga e ɵini pini gadai n’EPIƊ-ƊAI a siŋɗi wiiɗi tamaiɗi war tini Musus ɗa, zaw e ɵini kai ɗi ɗa.

⁵Nɵa aliɗi Izrayel e zi fuŋ arbaɗi Kananiyakai, Hititekai, Amoritekai, Perezitekai, Hivitekai gaiɗi Yebuzitekai lai.

⁶E mili aliɗi na falakaiɗi aŋ falakaiɗi, e siɗi aliɗi na falakai wiiɗi aliɗi ɗai nagai na maɵagai ɗa lai. E zi ɵeŋɗi alawai na wiiɗi ɗa lai.

⁷Aliɗi Izrayel e zi wala na meefeŋ wuzani arni EPIƊ-ƊAI, midiɗi a wula gaini Epiɗ-ɗai Alaw na wiiɗi, e tiki piɗi aŋ zi ɵeŋni alawai Baal gaini alawai Asera.

⁸EPIƊ-ƊAI a za hiy siɗi aliɗi Izrayel, haa a siɗi edi tini Kusan-Riseyataiim pai na Mezopotamiya. Aliɗi Izrayel e simni aŋ bagakainiKusan-Riseyataiim haa buza mitwis.

⁹Aliɗi Izrayel e tûwi sini EPIƊ-ƊAI, EPIƊ-ƊAI a siɗi ɗif aŋ piliɗisi edi, Otniyel ahini Kenas na tawalni Kaleb n’agwi.

¹⁰Seze na wiini EPIƊ-ƊAI a niya sini. A bunda aŋ gaŋgalaŋ zi spak war Izrayel. A niya edi aŋ hatam, EPIƊ-ƊAI a sa Kusan-Riseyatauim pai na Mezopotamiya war tini.

¹¹Afti na wiiɗi Izrayel a sumna ɵeŋ haa buza doogo doogo puɗu. Asakal hanɗa Otniyel n’ahini Kenas a mra.

¹²Aliɗi Izrayel e wiyi aŋ zi wazagai na maafanai wuzani arni EPIƊ-ƊAI pra, nɵa EPIƊ-ƊAI a sini gdaŋ wiini Eglon pai na Mowab aŋ rɗa amai midiɗi aliɗi Izrayel buri e zi wazagai na maafanai wuzani arni EPIƊ-ƊAI.

¹³Eglon a tipiɗi pinzibani Ammon gaiɗi pinzibani Amalek pini a niya edi aŋ hitimiti Izrayel, a tikiti Yeriko, fuŋ n’abai zi Hura.

¹⁴Aliɗi Izrayel e simni aŋ bagakaini Eglon haa buza doogo pi mitwis.

¹⁵Aliɗi Izrayel e tûwi sini EPIƊ-ƊAI, EPIƊ-ƊAI a siɗi ɗif aŋ piliɗisi edi, ɗf hanɗa yikini ɓa Ehud, a ahini Gera na pinzibani Benyamin, a ɗif na danaŋ. Aliɗi Izrayel e ɵiniŋ gaini katu buri a kiŋni Eglon pai na Mowab.

¹⁶Ehud a paya kaɵkar n’a suma tini sulu paŋ, mogoni kil ɗaw, a nag'aŋ wuzani, a wa sapani wuzani midiɗi tini na wus ɗa sek.

¹⁷A sini katu ɗa wiini Eglon pai na Mowab, Eglon a ɗif na gaini liki abai gara.

¹⁸Won hlai n’a sa katu ɗa ya ɗa, a hiniɗisi nagai n’e kisi katu wiini pai ɗa afuti ta.

¹⁹Amma won hlai n’a co haa sini alawai zi rgi n’a na gobi gaiɗi Gigal ɗa, a wayasi miɗini ezini a muɗa: Jaamus, seŋ ktai aŋ ma gaiku. Pai a miɗiɗi wiiɗi nagai n’e ɗa gaini buri e yimi siɗi anene. Ɗai paŋ e yimi siɗi anene.

²⁰Eglon a nafu amai warɗi dilimini n’amai, na warɗi ɗarak na te zizina burini ɗa dam. Ehud a hala sini, a miɗini: Alaw a muɗaŋasi seŋ buri mu muɗuŋku, nɵa pai a fakasi amai midiɗi paramaini par,

²¹Ehud a wûti tini na danaŋ ɗa, a sotosi kaɵkarni edi wuzani par, a ɓulaŋ warni.

²²Kaɵkar ɗa a sumaŋ viya, haa luwuŋ na pini paŋ a niya amlai warni paŋ. Ehud a rɗaɓsi edi kai, haa emel na warni pai a yima midini. Ehud a prasi anene arni hlai par ɗaw.

²³Asakal par a niyasi anene mini diɓir par ɗaw, a si kawakai n’e ɵi miɗi dilimini pai ɗa gaini amai duk, a ɵaŋ gaini lakle kaa lai.

²⁴Won hlai n’a hala li, ɗai na wiini pai e hilisi e tili mini hlai gaini ɵi kaa ɗa, e miɗi: Ablaŋtaŋkai, a na pirna huwaini amlai warɗi dilimi na warɗi ɗarak ɗi.

²⁵E biyi viya haa e kiyi ca, pai a mala miɗi dilimi edi kai ɵa; e tiki lakle, e mili miɗi dilimi ɗa edi, e nivi epin-gezaɗi azumai waŋ gaini mri su.

²⁶Won hlai na ɗai na wiini pai e ɗa biyi hai ɗa, Ehud a ka sini, a hina ka hlai na wiini alawai zi rgi pini ta. A pra a Seyira sek.

²⁷Won hlai n’a co war Seyira, a yiba faana na wiini rɗi n’amai midini hlai zi huwuŋ na wiini Efrayim. Aliɗi Izrayel e niyisi azumai sini amai midiɗi huwuŋ par, a ɵa wuzani vokɗi.

²⁸A miɗiɗi: hilisi pa, EPIƊ-ƊAI a siɗi Muwabitekai na gawki war tiki li. E niyisi azumai e tipi pini. E ciki mini hlai zi hûwi na wiini Yurdan ɗa, n’a na midiɗi Muwaɓa tar ɗa. E hini ɗif a vuga kai.

²⁹War mefeŋ ni ɗa, e fiɗi piɗi ɗai na Mowab par gobi dubu doogo, paŋ e ɗi ɗai na gaini liki gaini futini, na agulɗi a huna kai, ɗif ktai maa a pra edi piɗi par kai.

³⁰War mefeŋ ni ɗa, ɗai na Mowab e tiki siyer wuzaɗi Izrayel. Afti na Izrayel a sumna ɵeɗ haa buza doogo doogo mitwis.

³¹Asakalni Ehud par ɗa, a Samgar n’ahini Anat, a fuɗa Filistrekai miya ɵaara gaini amaraŋa na kawai mini tiɓ n’e ɓili ɵaakai gaini kapai a hala wuzani ɗa, ni lai a piliɗi aliɗi Izrayel edi tiɗi gawɗi par.